Qañtar oqiğası kezinde oqqa wşqan nemese oqiğağa baylanıstı isti bolğan balaların aqtaudı talap etken birneşe ata-ana 10 tamızda Tarazdan astanağa qaray jayau attandı. Aqparatqa qarağanda, oblıs biligi olardı toqtatuğa tırısqan. Astanağa arız jetkizgisi kelgender aqırında Astanağa jetti. Bwl turalı Ortalıq Aziya jañalıqtar qızmeti jazdı.

Qañtar oqiğasında 18 jastağı wlı oqqa wşqan Baqıtjan Şıñğısbekovtıñ Azattıqqa aytuınşa, olardıñ elordağa saparı seysenbi küni keşke qaray bastalğan. Biraq kölikterin policiya birneşe ret toqtatıp, jürgizbegen.

– Tünnen beri kedergi jalğasıp keledi. Eki taksi, bir avtobusqa otırdıq. Jürgizbedi. Avtobus 500 metr jürip, bireu habarlastı ma, bizdi küre joldıñ boyına tüsirip ketti. Al taksilerdi jürgizbey, ayıppwl saldı. Sodan jayau kele jatırmız, - deydi ol 10 tamızda Azattıqqa.

Qazir olar Tarazdan 60 şaqırımdağı Aqırtöbe auılı mañına jetken. Özderiniñ saparın “ädildik talap etkender marşı” dep atadı.

"Marşqa" qatısqandar arasında Qañtar oqiğasında qaza bolğan Erjan Bayjanovtıñ anası Nigora Zakaryaeva men Toqtar Oşaqbaydıñ anası Jämila Rahimbekova jäne balaları qamauda otırğan Gauhar, Sveta esimdi äyelder bar.

Jol boyında baylanıs naşar bolğan soñ anıqtap söylesu de mümkin emes. Olar özderine osı künge deyin bilik türli uäde bergenin, onı küte-küte şıdamdarı tausılğanın aytadı.

- Aqırtöbede bizdi Jambıl oblısı äkimi men prokurorı quıp jetti. Olar “qaytıñızdar, özimiz şeşemiz” deydi. Bizdi astanağa aparıp tastaytın kölik te beremiz dedi. Kelispedik,- deydi Baqıtjan Şıñğısbekov.

Biıl qañtardıñ basında Qazaqstannıñ birneşe aymağında bir mezgilde jappay narazılıq bolıp, soñı qantögiske wlasqan edi. Qañtardıñ besine Qazaqstan prezidenti Qasım-Jomart Toqaev "eskertusiz oq atuğa" bwyrıq bergen bolatın.

Resmi derek boyınşa, Qañtar oqiğasında 232 adam qaza bolğan. Bwğan qosa, oqiğa kezinde wstalğan tağı altı adamnıñ tergeu izolyatorında ölgeni resmi habarlanğan. Bilik qaza bolğandardıñ atı-jöni men qanday jağdayda qaza bolğanı jaylı äzirge aqparat jariyalağan joq.