قاڭتار وقيعاسى كەزىندە وققا ۇشقان نەمەسە وقيعاعا بايلانىستى ءىستى بولعان بالالارىن اقتاۋدى تالاپ ەتكەن بىرنەشە اتا-انا 10 تامىزدا تارازدان استاناعا قاراي جاياۋ اتتاندى. اقپاراتقا قاراعاندا، وبلىس بيلىگى ولاردى توقتاتۋعا تىرىسقان. استاناعا ارىز جەتكىزگىسى كەلگەندەر اقىرىندا استاناعا جەتتى. بۇل تۋرالى ورتالىق ازيا جاڭالىقتار قىزمەتى جازدى.

قاڭتار وقيعاسىندا 18 جاستاعى ۇلى وققا ۇشقان باقىتجان شىڭعىسبەكوۆتىڭ ازاتتىققا ايتۋىنشا، ولاردىڭ ەلورداعا ساپارى سەيسەنبى كۇنى كەشكە قاراي باستالعان. بىراق كولىكتەرىن پوليتسيا بىرنەشە رەت توقتاتىپ، جۇرگىزبەگەن.

– تۇننەن بەرى كەدەرگى جالعاسىپ كەلەدى. ەكى تاكسي، ءبىر اۆتوبۋسقا وتىردىق. جۇرگىزبەدى. اۆتوبۋس 500 مەتر ءجۇرىپ، بىرەۋ حابارلاستى ما، ءبىزدى كۇرە جولدىڭ بويىنا ءتۇسىرىپ كەتتى. ال تاكسيلەردى جۇرگىزبەي، ايىپپۇل سالدى. سودان جاياۋ كەلە جاتىرمىز، - دەيدى ول 10 تامىزدا ازاتتىققا.

قازىر ولار تارازدان 60 شاقىرىمداعى اقىرتوبە اۋىلى ماڭىنا جەتكەن. وزدەرىنىڭ ساپارىن “ادىلدىك تالاپ ەتكەندەر مارشى” دەپ اتادى.

"مارشقا" قاتىسقاندار اراسىندا قاڭتار وقيعاسىندا قازا بولعان ەرجان بايجانوۆتىڭ اناسى نيگورا زاكارياەۆا مەن توقتار وشاقبايدىڭ اناسى ءجاميلا راحيمبەكوۆا جانە بالالارى قاماۋدا وتىرعان گاۋحار، سۆەتا ەسىمدى ايەلدەر بار.

جول بويىندا بايلانىس ناشار بولعان سوڭ انىقتاپ سويلەسۋ دە مۇمكىن ەمەس. ولار وزدەرىنە وسى كۇنگە دەيىن بيلىك ءتۇرلى ۋادە بەرگەنىن، ونى كۇتە-كۇتە شىدامدارى تاۋسىلعانىن ايتادى.

- اقىرتوبەدە ءبىزدى جامبىل وبلىسى اكىمى مەن پروكۋرورى قۋىپ جەتتى. ولار “قايتىڭىزدار، ءوزىمىز شەشەمىز” دەيدى. ءبىزدى استاناعا اپارىپ تاستايتىن كولىك تە بەرەمىز دەدى. كەلىسپەدىك،- دەيدى باقىتجان شىڭعىسبەكوۆ.

بيىل قاڭتاردىڭ باسىندا قازاقستاننىڭ بىرنەشە ايماعىندا ءبىر مەزگىلدە جاپپاي نارازىلىق بولىپ، سوڭى قانتوگىسكە ۇلاسقان ەدى. قاڭتاردىڭ بەسىنە قازاقستان پرەزيدەنتى قاسىم-جومارت توقاەۆ "ەسكەرتۋسىز وق اتۋعا" بۇيرىق بەرگەن بولاتىن.

رەسمي دەرەك بويىنشا، قاڭتار وقيعاسىندا 232 ادام قازا بولعان. بۇعان قوسا، وقيعا كەزىندە ۇستالعان تاعى التى ادامنىڭ تەرگەۋ يزولياتورىندا ولگەنى رەسمي حابارلانعان. بيلىك قازا بولعانداردىڭ اتى-ءجونى مەن قانداي جاعدايدا قازا بولعانى جايلى ازىرگە اقپارات جاريالاعان جوق.