Almatıda 1 mlrd teñge jwmsalğan köpqabattı twrğın üydiñ qwrılısı bwzılmaq. Qwrılıs jasaytın qwjattarım dwrıs äri barlıq talapqa say üy saldım degen kompaniya basşısı redakciyamızğa habarlasıp, bwl iske araşa boluımızdı swradı.
2021 jılı «Art Tehnoss» qwrılıs kompaniyası twrğın üy keşenin salu üşin Naurızbay audanındağı «Şwğıla» şağın audanınan 1 ga jer telimin satıp alğan.

Äkimdiktiñ rwqsatın alıp, tehnikalıq talaptardı belgileytin qajetti qwjattardı jinağan qwrılıs saluşı jobanı jüzege asıruğa kirisedi. Eki ay işinde jerastı avtotwraqtarın salıp, gaz ben elektr quatın tartqan. Bwğan 1 milliard teñgege juıq qarjı jwmsalğan. Biraq arhitektura bölimi säulet-josparlau tapsırmasın bermegen jäne bwl qwrılıs zañsız degen şeşim şığarğan.

Osıdan keyin qwrılıs kompaniyasınıñ iesi Mwhtar Abitov bwl jobağa salğan aqşasın qaytara almay sotqa jügingen. Alayda, sot qwrılıs zañsız degen şeşim şığarğan. Al investor barlıq talaptardıñ zañdı türde orındalğanına senimdi.

Joba boyınşa aumağı 23 mıñ şarşı metr bolatın 12 qabattı eki üy salınu kerek bolğan. Qazir eki qabattan twratın jerastı avtotwrağı men üydiñ eki qabatı salınıp bitken. Qwrılıs alañına gaz, elektr quatı tartılğan.

«2021 jıldıñ naurızında üydiñ qwrılısı bastaldı, jospar boyınşa jeltoqsanda salınıp bitui kerek bolğan. Ayına eki qabattan köteru közdeldi, yağni 12 qabattı üydi altı ayda salıp bitiruimiz qajet bolğan. Qwrılıs eki ay jürdi, keyin toqtatıp tastadı. Aldımen Almatı qalası Qala qwrılısın baqılau basqarmasınıñ adamdarı kelip qwrılıs zañsız dedi. Qwjattarımnıñ barlığı ornında, tek Säulet-josparlau tapsırmasın (SJT) bermey jatqanın ayttım. Sol sebepti olar mağan ayıppwl saldı. Eki ret 291 mıñ teñgeden töledim. SJT-nı säulet bölimi beru kerek, solar bermey otır»,-deydi qwrılıs kompaniyasınıñ iesi M.Abitov.

 

Säulet basqarması qwrılıstı rwqsatsız salıp jatırsıñdar degen uäj aytqan. Biraq kompaniya olarğa 9 ret hat jazıp, mardımdı jauap ala almağandarın aytadı.

«Olarğa 9 märte hat jazdım. Ünemi «motivirovannıy otkaz» dep jazadı. Olar birinşi ret jauap bergende üydi ne üşin saluğa bolmaytının, qanday kemşiligim barın naqtı körsetu kerek edi, soğan qarap men kemşiligimdi tüzeytin edim. Degenmen men barlığın normativke say jürgizip jatırmın»,-deydi ol.

Bastapqıda säulet basqarması qwrılıs kompaniyasın ekonomikalıq sotqa bergen. Alayda sot üy süriluge jatpaydı degen şeşim şığaradı. Keyin komapniya iesi äkimşilik sotqa isk bergen. Olar aldımen SJT alu kerek, sodan keyin eskizdik jwmıstar jürgizilsin degen şeşim şığaradı.

«2021 qaraşa ayında Almatı qalasınıñ jergilikti sud'yaları appelyaciyada qaradı, ol kezde meniñ paydama şeşip berdi. Biraq ol şeşimdi sanaulı kün bwrın joğarı sot bwzıp, qwrılıstı zañsız dep tanıdı. Meni bwl jayt tañqaldırıp otır, öytkeni jergilikti sottar bwl isti eki ayday zerttep barıp şeşim şığarğan. Al, bwl istiñ män-jayın bilmeytin joğarı sot onı 5 minut qarap, zañsız dep şeşim şığarğanın tüsine almaymın»,-deydi qwrılıs kompaniyasınıñ basşısı.

Joğarı sot bwzsın dep şeşim şığarğan qwrılısqa 5 mıñ kub beton, mıñ tonna armatura ketken eken. Mwhtar Abitov bwl osı jerge qızıqqan adamdardıñ istep otırğanı ma dep küdiktenedi.

«Qazir 1990 jıldardağıday reyderlik tartıp alu qayta kelip jatqan siyaqtı. Prezident investorlarğa jağday jasañdar, qoldau körsetiñder dep aytqanımen atqaruşı organdar kerisinşe jasap otır, tipten jasağanıñdı tartıp alıp qoyıp jatır. Basqaşa qalay aytamın? Gosaktide bwl jerge köpqabattı üy saluğa bolatını körsetilgen. Su tartu, käriz jelisine qosılu, gaz tartu boyınşa tehnikalıq şarttarı da bar. Elektr jelisin tartıp, transfomartor qoydım, oğan qosa osı mañdağı köşelerdi jarıqtandırdım. Qwrılısqa qatıstı J-5 degen qwjatım da bar. Qala äkiminiñ orınbasarı Mwhit Äzirbaevtıñ qabıldauına kirgenimde ol kisi qwjattarımnıñ barlığın körip, «ağa, sizde J-5 qwjatı bar ma?» dep swradı. Bar dep edim, «J-5» bolsa sizde eşqanday problema bolmau kerek» dedi. Mwnday talaptardıñ barlığı orındalğanda arhitektura bizge SJT-nı mindetti türde beru kerek. Qasımdağı üyde twratın körşiler qwrılıstı saluğa qarsı emes ekenderin bildiretin hattı da jazıp berdi, olar kerisinşe bwl jerde balabaqşa, därihana salınatın boldı dep quanıp otır. Bwl jerde tek SJT ğana wstap twr, onı nelikten bermey jatqanın tüsinbedim»,-dep nalidı M.Abitov.

«Art Tehnoss» qwrılıs kompaniyası bwğan deyin qalada birneşe qwrılıs nısandarın twrğızğan. 450 orındı balabaqşa, mektepter salğan, biraq ol kezde mwnday mäsele bolmağan, deydi kompaniya basşısı.

«Naurızbay audanı äkimdigine eşqanday narazılığım joq. Olar bizdi investor esebinde tirkedi. Olardan eşqanday kedergi joq. 2-3 mlrd teñge qwyamın degenimde äkimdik kerisinşe quandı. Bwl üydi twrğızuğa öz aqşamdı salıp otırmın. 12 qabattı eki üyden 176 päter qoldanısqa berilu kerek edi, onıñ işinde 5-6 päterin jağdayı naşar, üyi joq jandarğa bersem dep niet etip jürgenmin»,-deydi ol.

Qwrılıs alañında 55 adam jwmıs istegen, olarğa 380-450 mıñ teñge köleminde ortaşa aylıq tölenip kelipti.

Investorlarğa atqaruşı organdar tarapınan jasalğan qısımdar men kedergiler memleketke qarsı jasalğan qılımıs retinde qaralsın, degen prezidenttiñ sözin alğa tartqan M.Abitov «endigi ümitim memleket basşısında» deydi.

Qwrılısı jartılay bitken bwl nısan nelikten jaramsız bolıp qaldı jäne säulet-josparlau tapsırmasın nege bermedi, älde basqaşa közdegeni bar ma? Bwl turalı Almatı qalasınıñ äkimdigine swrau salğan edik.

Aldağı uaqıtta onıñ jauabın da jariyalaymız.

The Qazaq Times