Surette Mwqağali Maqataevtıñ Narınqol auılında qoyılğan eskertkişi beynelengen.

Almatı oblısında qoyılğan Mwqağali Maqataevtıñ 62 million teñgelik eskertkişine baylanıstı dau şıqtı.

«MAQATAEVQA EMES, MIRZALIEVKE KÖBİRİK WQSAYDI»

Rayımbek audanınıñ ortalığı Narınqol eldi mekeninde qoyılğan eskertkiştiñ tür-sipatı men ornalasqan jerine köñili tolmaytın jwrt müsinniñ dwrıs jasalmağanın aytadı. Eskertkiş kelbetine baylanıstı äleumettik jelide mäsele  kötergen jurnalist Qanat Äbilqayır «müsin Mwqağali Maqataevqa emes, Qadir Mırzalievke köbirek wqsaydı jäne boyı tım alasa» dep esepteydi. Onıñ sözinşe, eskertkişte beynelengen Mwqağalidiñ twrısında twru mümkin emes.

«Eskertkişte Mwqağalidiñ boyı alasa. Onıñ biik, asqaq kisi bolğanın bilemiz. Şeberhanada jasalğan kezde biik bolıp körinedi. Öytkeni eskertkiş  3,5 metr. Biraq twğırğa qondırğan kezde közge qoraş körinip twr. Bwl jerde eskertkiş Qadir Mırzalievtiñ keypine köp wqsap ketken. Barlığın aytatın bolsam, eskertkişti tolıqtay özgertu kerek boladı. Eskertkiştegi Mwqağalidiñ twrısında men twra almadım. Bir qol jambasta, ayağı qisayğan, ekinşi qolı belde twr. Adamda onday twrıs bolmaydı», - deydi Äbilqayır.

Qanat Äbilqayır Mwqağali Maqataevtıñ 62 million teñgelik eskertkişi men osıdan birneşe jıl bwrın 23 million teñgege jasalğan jazuşı Didahmet Äşimhanwlınıñ müsinimen salıstaradı. Onıñ sözinşe, eki eskertkiştiñ arası jer men köktey.

«Didahmet ağanıñ eskertkişin jasaytın kezde eskizimen tanısqanbız. Biz oğan öz pikirimizdi aytqanbız. Sol kezde Didahmet ağanıñ eskertkişine tolığımen 23 million teñge ketken. Mına eskertkişti 30 million teñge deyik. Erteñ qolası sapalı dep aytuı mümkin. Ar jağında 10 million teñgege mañayın qatırıp twrıp abattandırıp tastauğa boladı. Bwlar «basında eskertkiş qoyuğa 10 sottıq jer bölgenbiz, keyinnen 30 sottıq bolıp ketti. Sodan eskertkiş solay körinip qaldı» dep otır. Biraq aydalağa aparıp qoysa da müsin özinikin aytıp twradı», - deydi jurnalist.

Fotoda aqın Mwqağali Maqataev pen jazuşı Didahmet Äşimhanwlınıñ müsinderi beynelengen.

Maqala jazu barısında Qanat Äbilqayır Facebook jelisinde Rayımbek audanında äleumettik jelide eskertkişti maqtau nauqanı bastalğanın aytıp jazba jariyaladı.

«ESKERTKİŞTİÑ BOLMISI WNADI»

Mwqağali Maqataevtıñ wlı Jwldız Maqataev eskertkişke köñili tolatının jäne salınğanğa deyin apta sayın barıp körip twrğanan aytadı.

«Twrğan jerin, fonın bilmeymin. Al eskertkiştiñ bitim, bolmısı jeke öz basıma wnaydı. Boyı kişi bolıp ketti dep jatır, ondayın men körmedim. Müsindi jasap jatqanda apta sayın şaqırıp, körsetip twrdı», - deydi aqınnıñ wlı.

Öz kezeginde Almatı oblıstıq mädeniet basqarmasınıñ basşısı Marlen Kölbaev BAQ ökilderine «eskertkişti köruge arnayı komissiya şıqqanın» mälimdedi.

DAULI ESKERTKİŞTİ KİM JASADI?

Memlekettik satıp alular portalında ilingen aqparatta Narınqol auılınıñ Jastar sayabağına Mwqağali Maqataevqa eskertkiş ornatuğa Rayımbek audanı äkimdiginiñ Baqqoja Mwqay atındağı audandıq mädeniet üyi tapsırıs bergendigi körsetilgen. Konkurstı «Tayqazan» JŞS jeñip alğan. Tenderdiñ jalpı qwnı 62 million teñge. Taraptar kelisimşartqa 2021.03.09 küni qol qoyğan.

Atalğan kompaniya 2008 jılı Almatı qalasında tirkelgen. Basşısı – Meyirlan Azmağanbetov. Kompaniya 2019 jıldan beri memlekettik satıp alu portalında tört kelisimşart jasasqan. Barlığında eskertkiş ornatuğa tapsırıs alğan. Tört kelisimşarttıñ üşeuin Taldıqorğan qalalıq twrğın üy-kommunaldıq şaruaşılığı bölimimen jasasqan. Kelisimşarttardıñ jalpı somması 500 million teñgeni qwraydı.

"Tayqazan" JŞS alğan tenderlerdiñ sızbası.

Kontent AQŞ damu agenttigi (USAID) arqılı amerika halqınıñ kömegimen "MediaCAMP – Ortalıq Aziya bağdarlaması" ayasında dayındaldı. (Wjımnıñ atı) aqparattıñ mazmwnına tikeley jauaptı jəne aqparat USAID-tıñ nemese AQŞ ükimetiniñ, sonımen qatar Internews wstanımına say kelmeui mümkin.

"The Qazaq Times"