Afroamerikalıq Djordj Floydtıñ qazasına baylanıstı sot ükimi şıqtı. Kisi öltiru babı boyınşa küdikke ilingen Minneapolis policiyasınıñ bwrınğı oficeri Derek Şoven 22,5 jılğa bas bostandığınan ayırıldı.

Jergilikti basılımdarğa swhbat bergen Floydtıñ advokatı: «Bügin AQŞ-tağı şeşuşi sätterdiñ birine kuä boldıq. Derek Şoven Minnesota ştattınıñ tarihındağı eñ wzaq merzimge sottalğan policiya qızmetkeri atandı. Bwl osımen toqtauğa boladı degen söz emes. Öytkeni qara näsildi amerikalıqtardı öltirudi doğaru kerek. Näsilşildikke jol joq. Esteriñizde bolsın, ädilettilikti ornatu üşin äli talay küresuge tura keledi. Mısalı, sol küni älgi ozbırlıq orın almağanda Djordj qazir bizben birge, otbasımen birge bolatın edi», – deydi.

Bıltır 25 mamırda Minneapolis qalasında 46 jastağı Djordj Floyd policey ökilderiniñ köz aldında jan tapsırğan. Düken kassiri marqwm jalğan banknotpen esep ayırıspaq boldı degen uäjben policiya şaqıradı. Artınşa oqiğa ornına kelgen tärtip saqşıları küdiktiniñ qolına kisen salğannan keyin oficerlerdiñ biri onıñ jelkesin ayağımen 7 minuttay basıp twrğan. Dauısı qarlıqqan afroamerikalıq öziniñ dem ala almay jatqanın aytadı, biraq oğan policeyler qwlaq aspağan. Osıdan keyin «Men twnşığıp qaldım!» tirkesi şerudiñ bastı wranına aynaldı.

29 mamırda Minnesotada Djordj Floydıñ ölimine tikeley qatısı bar dep ayıptalğan bwrınğı policey Derek Şovin twtqındaldı. Kuägerler tüsirgen videokadrdı saraptağan mamandardıñ aytuınşa, Derek Şovin Djordj Floydtıñ «demala almay jatırmın» degenine qaramastan moynın qısıp wstap birneşe minut bosatpağan. Bwl aqparat qoğam arasında qızu talqığa tüsip, birneşe sağattıñ işinde jwrt köşege şığa bastadı. Jergilikti policeylerdiñ Floydtı twtqındap jatqan säti tüsirilgen video äleumettik jelilerde tarap, artınan onıñ qaytıs bolğanı belgili bolğan soñ Minneapolis pen basqa da qalalardı jappay ereuilder şarpıdı.

Sotqa deyin jüzdegen adam qwqıq qorğau organdarı tarapınan körsetiletin zorlıq-zombılıqqa qarsı beybit miting ötkizdi. Osığan baylanıstı Minneapolis meriyası qaladağı policiya bölimşeleriniñ qorşauların bekituge 1 million dollar qarjı bölgen. Sebebi bıltırğı tärtipsizdikter kezinde ereuilşiler Djordj Floydtıñ ölimine qatısı bar oficer jwmıs istegen jerge ot qoyğan bolatın.

1964 jıldan beri AQŞ biligi näsilşildik, wlttıq bölinu, genderlik teñsizdikke qarsı birneşe zañ qabıldağan. 2008 jılı Amerikada Barak Obama prezident bolıp saylanğanda «näsildik bölinu» kezeñi ayaqtalğanı turalı pikir keñ taradı. Eñ alğaş afroamerikalıqtıñ Aq üy basşısı boluı näsildik teñsizdikke tosqauıl boladı dep eseptegender sanı arttı. Obama bilik etken uaqıtta aq pen qara näsildilerdiñ teñdigine senetin afroamerikalıqtardıñ sanı 76%-dan 64%-ğa deyin azayğan. Alayda barlıq memlekette negizgi mäsele sanalatın tap pen näsil teñsizdigi örkenietti Amerikada äli de bar.

"The Qazaq Times"