Bügin, Almatıdağı QR Wlttıq kitaphanasınıñ N.Däuletova atındağı oqırman zalında «Ortalıq Aziyadağı geostrategiyalıq procesterdiñ damu baqıtı jäne Qazaqstan: Aymaqtağı qauipsizdik jäne twraqtılıq» mäseleleri attı ğılımi konferenciya ötti. Könferenciyağa otandıq sayasattanuşılar men sarapşılar jäne BAQ ökilderi qatıstı.

The Qazaq Times aqparattıq, qoğamdıq-sayasi portalı men wyımdastırğan şarağa QR Wlttıq kitaphanası men «Er Jänibek» halıqaralıq qoğamdıq qorı qoldau körsetken.

Şarada otandıq jäne şeteldik sayasattanuşı sarapşılar Ortalıq Aziyağa qatıstı geosayasi mäselelerdi, aymaqqa äser etip otırğan sırtqı küşterdiñ strategiyalıq qadamdarı qatarlı mäselelerdi talqılap, öz pikirlerin ortağa saldı.

Oflayn jäne onlayn formatta ötken şarada otandıq sayasattanuşı sarapşılardan, äl-Farabi atındağı Qaz-WU-dıñ Şığıstanu fakul'tetinen sayasattanuşı, qıtaytanuşı sarapşılar Nwrat İliyas jäne  Nwrtälip Şäripqazı, sonday-aq Evraziyalıq ğılımi zertteu institutınıñ ğılımi qızmetkeri Ömirbek Qanay, Euraziya Wlttıq universitetiniñ doktarantı Qanat Qahar qatarlı sarapşılar qatıstı. Bwdan tıs Türkiyadağı Mugıla Sıtqı Koşman Universitetiniñ professorı, Orta Aziya jönindegi körnekti sarapşılarınıñ biri Serdar Ylmaz ben Ankasam sayasat pen dağdarıstardı zertteu ortalığınıñ ğılımi qızmetkeri, tarihşı, türkolog Eldes Orda qatarlı sarapşılar qatıstı.

Konferenciyada Serdar Ylmaz, Ömirbek Qanay, Qanat Qahar jäne Estay Bojan qatarlı sarapşılar men jurnalister Ortalıq Aziya elderindegi integraciya mäselesi, Ündi-Tınıq mwhitı aymağındağı procesterdiñ Ortalıq Aziyağa ıqpalı, aymaqtağı ekonomikalıq bağdarlamalar bäsekelestiginiñ aymaqqa alıp keletin jaña mümkindikteri men qiındıqtarı, sonday-aq, aymaqtıq geostrategiyalıq geosayasi procesterdıñ aqparattıq qauipsizdikke jasaytın ıqtimal sın-qaterleri taqırıbındağı bayandamalar jasap, öñirdegi qazirgi sayasi jağday men bolaşaq tuındauı ıqtimal qaterlerge qatıstı öz pikirlerin ortağa saldı.

Konferenciyanıñ ekinşi böliminde sarapşılar men BAQ ökilderi erkin pikir almasıp, taqırıpqa qatıstı swraq-jauap türindegi pikir sayısın ötkizdi. Pikir sayısqa türkiyalıq sarapşılarda qatısıp, aymaqqa ıqpal etuşi küşterdiñ jaña qadamdarı turalı talqı öristetildi.

Şara qorıtındısında wlttıq, ekonomikalıq, aqparattıq qauipsizdikke qatıstı özekti mäseleler boyınşa qwzırlı organdar men memlekettik aqparat qwraldarına qajetti wsınıstar jasaldı.

“The Qazaq Times”