Foto: googleusercontent.com

Europada koronavirustıñ üşinşi tolqını bastaldı. Qazir Euroodaq elderi karantindi qaytadan qatañdata bastadı. Sonımen qatar, vakcinaciya bastağan elder AstraZeneca ekpesin satıp aludan bas tartıp otır. Sebebi, «preparattıñ qan aynalımın naşarlatıp, trombılardıñ tüziluine ıqpal etetini» anıqtalğan.

Jaqında ğana karantin şekteuleri jeñildey bastağan Germaniyada britandıq ştam deregi artqan. Germaniya densaulıq saqtau ministrligi halıqtıñ 80%-ı vakcina qabıldağanda ğana koronavirustıq şekteuler alınatının mälimdedi. Ekinşi toqsanda nemis halqı 60 million doza saldıradı. Onıñ jartısı BioNTech jäne Pfizer preparatına tiesili. AstraZeneca vakcinasınan birqatar el bas tartıp otırsa da, Germaniya bwl ekpeniñ 17 million dozasın satıp almaqşı. Bilik atalğan preparattı jası 65-ten asqan twrğındarğa eguge rwqsat bergen. Bwğan deyin nemis eliniñ 6 million azamatı kovidten qorğaytın alğaşqı dozanı alğan. Al ekinşi dozanı äzirge 2 million 700 mıñday twrğın saldırdı.

Vengriyada virus bwrınğıdan göri tez tarap baradı jäne jwqtırğandar arasında jastar köp. Sonday-aq, auruı asqınğan nauqastar köbeygen. Elde bıltır qaraşada engizilgen komendanttıq sağat äli küşi joymadı. Meyramhanalarda tamaqtı tek özimen birge äketuge ğana boladı. YAğni işte otıruğa rwqsat joq. Joğarı sınıp oquşıları men studentter qaşıqtan bilim aladı. Al endi ahualdıñ uşığuına baylanıstı şekteu şaraları küşeytildi: bastauış mektepter, balabaqşalar jabıq; dükenderdiñ basım böligi jwmısın toqtatqan.

Avstriyanıñ densaulıq saqtau ministri elde koronavirustıñ üşinşi tolqını bastalğanın jariya etti. Osı rette bilik öñirlerde baqılau-ötkizu beketterin qoydı. Sonday-aq twrğındardı özge aymaqqa kirerde test tapsıruğa mindettedi. Negizi, eldegi epidemiologiyalıq ahual osı ayda naşarladı. Öytkeni karantin jeñildetilgen. Söytip qazir kündelikti ösim 3 mıñ şamasında. Al qatañ karantin kezinde, mäselen, aqpanda bwl körsetkiş 2 mıñnıñ mañayında bolatın.

Pandemiyadan zardap şekken elderdiñ biri – Italiyada bilik bar öñirlerdiñ törtten üşin qızıl aymaqqa jatqızıp, 6 säuirge deyin karantin jariyaladı. Qızıl aymaqtağı mektepter men joğarı oqu orındarı jabıladı. Meyramhanalar men barlar qonaqtar qabıldamaydı. Tamaqtı tek özimen birge äketuge boladı. Negizi ötken aptada mwnda 150 mıñ adamnıñ tapsırğan testi oñ nätije körsetken.

Virustıñ aldın alu üşin ötken düysenbiden bastap Çehiyada mektepter men dükender jabıldı. Auruhanalarda orın az bolğandıqtan, Çehiya biligi nauqastardı Pol'şağa jiberuge mäjbür. Qazir bwl memlekette Europada virus jwqtıru deregi boyınşa antirekord ornağan – soñğı 14 künde million adamğa şaqqanda 15 mıñ jağday tirkelgen.

Alğaşqı tolqın äleumettik, ekonomikalıq jağdayına auır soqqı bolğan Europanıñ tağı bir eli Ispaniyada virus deregi, kerisinşe, kürt tömendedi Qañtardıñ soñında 100 mıñ adamğa şaqqanda 900-ge juıq jağday tirkeldi. Al 10 naurızda 153 keys anıqtaldı. Jaqında Ispaniyada barlıq densaulıq saqtau qızmetkerleri: auruhanalardan emhanalarğa deyin, qarttar üylerinen jedel järdem medbikelerine deyin ereuilge şıqtı. Olar 35 sağattıq üzilissiz jwmıstan şarşağanın aytıp, bilikten därigerlerdiñ jağdayın jaqsartudı talap etti.

"The Qazaq Times"