Jaqında Jenevada ötken BWW Adam qwqıqtarı jönindegi keñesi 46 sessiyası halıqaralıq qauımdastıq pen Batıs elderiniñ Reseydegi adam qwqığı mäselesine, sayasi twtqındar men ükimettiñ quğın-sürgin äreketterine basa nazar audarıp otırğanın körsetti. Şeteldik sarapşılardıñ pikirinşe, Putin rejimi işki sayasi quğın-sürgindi küşeyte tüsken kezde halıqaralıq qauımdastıqtıñ qoldauı asa qajetti dep sanaydı. Osınıñ bäri aldağı uaqıtta Reseyge bağıttalğna qısımnıñ auırlay tüsetininen derek beredi.

45 eldiñ Reseyge şüyligui

Jenevadağı otırısta  45 el Reseyge qarsı birlesken mälimdeme jasadı. Onıñ eñ aldımen Putin biliginen oppoziciya jetekşisi Naval'nıy men özge de belsendilerdi tez arada bosatudı talap etken. Birlesken mälimdeme Resey ükimetiniñ, äsirese sot jüyesiniñ belsendilerge qatıstı şeşimderiniñ derliktey sayasi astarı bar ekenin, bwl Reseydiñ halıqaralıq mindettemelerin bwzğanın körsetedi degen qorıtındını alğa tartadı. Bwğan qosa, 45 el Naval'nıydıñ ulanu oqiğasın tekserudi talap etken.

Atalğan elder arasında, bwrınğı Keñestik elder qatarınan Gruziya men Ukraina bar, odan tıs AQŞ, Kanada, Australiya jäne Japoniya sekildi ıqpaldı elder de bar. Mälimdeme arasında, Naval'nıydiñ ulanu isin tolıq teseru talabı da bar.

Reseyge degen älem nazarı

Oppoziciya jetekşisi Naval'nıydiñ ulanuı jäne ol qamalğannan keyingi narazılıq şaralarına degen Kreml'diñ reakciyası älemniñ nazarın audardı. Putin rejimi reseylikterdiñ sayasi talaptarı, olardıñ talap-tilekteri men azamattıq qwqıqtarın eskerusiz öz degenin küşpen bolsın jasaytının añğartuı işki-sırtqı narazılıqtı küşeytti. Jeneva otırısı qarsañında Europa Keñesindegi 47 SİM bas qosqan Ministrler keñesi de Reseyden Naval'nıydi tez arada bosatıp, onıñ ulanuına qatıstı isti teregeudi talap etti.

BWW Adam qwqıqtarı jönindegi keñesi de naurız ayınıñ bas şeninde osığan wqsas mälimdeme jasağan edi. Onda oppoziciya jetekşisiniñ ulanuına Resey biligi tikeley jauaptı ekenin aytqan. Äri bwnı ükimetti sınağandarğa qarsı eskertu dep bağalağan. Ärine, Naval'nıy isi boyınşa Resey sankciyasız da qalğan joq.

Sırtqı teke-tires işki repressiyanı küşeytti

Ötken senbide de Mäskeude 200-ge juıq oppoziciyalıq belsendini policiya qamauğa aldı. Olar demokratiyalıq birlesken otırıs ötkizuge jinalğan bolatın. Qamalğandar köp ötpey bosatılğanımen, bilik bwnday otırıs ötkizuge jol bermeytin sıñay tanıttı. Olardıñ arasında bwrınğı şeneunikter de bar jäne köbi Putin biliginiñ soyılı tigender.

Qazirgi Putin biliginiñ minez-qwlqına qarağanda, Batıs elderimen ımırasız teke-tireske kiriskenin bayqaymız. Kreml' bwl wstanımında Batıs qwndılığın alğa tartqan reseylikterdi de aymaymın degen eskertuin jasap otır. Reseylik sayasattanuşı Morozov osığan deyin bwnı sırtqı terke-tirestiñ işki repressiyanı küşeytui dep däl bağalağan edi. Ol Putinniñ oppoziciyanı elden alastağısı keletinin de aytqan.

Reseydegi oppoziciyalıq belsendiler de, şeteldik sayasattanuşılar da Putin rejiminiñ quğın-sürgini küşeygen twsta, halıqaralıq qauımdastıq pen adam qwqığın qorğau wyımdarınıñ qoldauı asa mañızdı degen uäj aytadı. Sebebi, osığan deyin ereuilderde wstalğan adamdar rekordtıq sanğa jetip boldı. Bwl Reseydiñ bilik jüyesiniñ de sipatın özgertkendey boldı. Ärine, Naval'nıy isi boyınşa Reseyge qarsı Batıstıñ şarası Kreml' tarapınan işki isine aralasu qatarı ayıptaldı. Putin osını jeleu ete otırıp, eldegi azamattardıñ qwqığın eskeurdi de wmıtqanday.

“The Qazaq Times”