AQŞ prezidenti Donal'd Tramp jaqında ötken prezident saylauında qarsılası Jo Bayden dauıstı bwrmalau nätijesinde ozıp şıqtı dep mälimdep kelgen. Bir kün bwrın Qwrama Ştattardıñ bas prokurorı Uil'yam Barr jasağan mälimdeme bwğan qayşı bolıp şıqtı. Ol dauıs sanauda eşqanday zañ bwzuşılıq bolmağının aytqan.

Uil'yam Barr prezident Tramptıñ jaqtası qatarında sanalıp kelgen. Sebebi, onı bwl orınğa Tramptıñ özi wsınıs etken. Qazirge deyingi dauıs nätijesi belgili bolğan ştattardağı qorıtındı boyınşa Jozef Bayden alda twr. Eger Tramp advokattarınıñ keybir ştattardağı talap-arızdarınan nätije şıqpasa Bayden prezident bolğanı. Sebebi, ol qazir de saylau alqasınıñ 305 dauısın alıp twr.

Degenmen, Tramp komandası özderin jeñilis taptıq dep sanağan emes. Respublikaşıldar men zañgerler tarabınan saylau isi boyınşa sotqa 36 arız joldanğan, biraq onıñ 25-i sot tarabınan keri qaytarıldı. Sonda da saylauda zañ bwzıldı degen jaña faktilerdi alğa tartıp, qaytalay arızdar joldanuda.

Qazir Respublikaşıldarğa qarsı CNN, BBC sekildi iri aqparat qwraldarı Tramptı 2024 jılğı saylauğa qatısa ma degendi talqılap jatır. Prezident Tramp kelesi prezidenttik saylauğa qatısu nietin özi de bildirgen bolatın. Trampqa jaqtas Fox News arnasınıñ Aq üydegi habarşıları aldağı uaqıtta Tramp bwnı resmi türde jariyalaytının da aytqan.

Tramp komandasında onıñ 2024 jılğı prezident saylauğa qatısuı jayında talqı bolğanın, Tramptıñ bwl turalı resmi mälimdemeni qaşan jasaytını turalı aqıldasqanı jayında birqatar amerikalıq basılımdar da özderiniñ aqparat közderine süyne otırıp jazıp jatır.

Biılğı saylaudıñ nätijesi qanday bolğanına qaramastan, AQŞ-ta Tramptıñ qoldauşıları äli de köp. Respublikaşıldardı qoldaytın saylauşılar arasında jürgizilgen saualnama boyınşa 53 payız saylauşı Tramptıñ qayta prezident boluın qoldağan.

“The Qazaq Times”