Belarus' prezidenti Aleksandr Lukaşenko. Foto: https://liter.kz

Aleksandr Lukaşenko Belarus' prezidenti retinde qızmetine kiristi. Şirek ğasırdan astam uaqıt el basqarğan prezidenttiñ kezekti wlıqtau räsimi däl qazir Minsktegi Täuelsizdik sarayında ötip jatır. Al AQŞ, Kanada jäne Europalıq odaq elderi saylau nätijesin jäne Lukaşenkonı legitimdi prezident retinde moyındaudan resmi türde bas tarttı.

BelTA agenttiginiñ habarlauınşa, prezident wlıqtau räsimine jüzden astam adam şaqırılğan. Olardıñ qatarında joğarı lauazımdı şendiler, Ökilder Palatasınıñ deputattarı jäne respublika keñesiniñ müşeleri, memlekettik organdar men wyımdardıñ, jergilikti atqaruşı jäne ökimşi organdardıñ, respublikalıq bwqaralıq aqparat qwraldarınıñ basşıları, ğılım, mädeniet jäne sport qayratkerleri bar.

El Konstituciyasına säykes prezident mınaday mazmwndağı ant bergennen keyin qızmetine kirisedi: «Belarus' Respublikasınıñ prezidenti qızmetine kirise otırıp, halıqqa adal qızmet etuge, adam men azamat qwqıqtarı men bostandıqtarın qwrmetteuge jäne qorğauğa, Belarus' Respublikasınıñ Konstituciyasın saqtauğa, özime jüktelgen joğarı mindetterdi abıroymen jäne adal atqaruğa saltanattı türde ant etemin».

Konstituciyağa oñ qolın qoyıp, Aleksandr Lukaşenko Belarus' tilinde ant berdi. Sodan keyin ol ant beru turalı aktige qol qoydı. Belarus'tiñ saylau jäne respublikalıq referendumdar jönindegi ortalıq komissiyasınıñ törağası Lidiya Ermoşina Aleksandr Lukaşenkoğa Belarus' Respublikası Prezidentiniñ kuäligin tabıs etti.

Aleksandr Lukaşenkonıñ otstavkasın talap etken narazılıq şaraları 9 tamızdan beri ötip keledi. Narazılar prezident saylauınıñ qorıtındısı bwrmalandı dep esepteydi. Belarus' Ortalıq saylau komissiyasınıñ mälimeti boyınşa, qazirgi memleket basşısı Aleksandr Lukaşenko 80,10% dauıspen jeñiske jetken. Onıñ bastı bäsekelesi, oppoziciya atınan qatısqan Svetlana Tihanovskaya 10,12% dauısqa ie bolğan.

Keyinnen Tihanovskaya saylau qorıtındısı boyınşa Ortalıq saylau komissiyasına şağım tüsirdi. Ekzit-poldıñ nätijeleri 9 tamız keşke jariyalanğannan keyin Minsktiñ ortalığında jäne respublikanıñ keybir basqa qalalarında jappay narazılıq şeruleri bastaldı. Şeruge şıqqandardı qwqıq qorğau organdarınıñ qızmetkerleri soqqığa jığıp, köz jasauratatın gaz qoldanğan.

AQŞ pen Euroodaq belorus biliginiñ äreketin sınap, dauıs wrlau men küş qoldanuğa qatısı bar şeneunikterge sankciya qoldanu mäselesin qarastırıp jatır. Sankciya 21 qırküyekte küşine enui tiis edi. Alayda taraptardıñ pikirleri ortaq bolmağandıqtan, Belarus'ke sankciya engizu mäselesi tağı keyinge şegerildi. Al Belarus' oppoziciyasınıñ ökili Svetlana Tihanovskaya Lukaşenko men onıñ tobına (zañdı jäne jeke twlğalar) qarsı qatañ qaulı qabıldaudı wsınıp keledi.

Lukaşenkonı «kezekti ayqın jeñisimen» birinşi bop qwttıqtağan memleketter qatarında Qıtay, Resey, Qazaqstan Äzirbayjan, Özbekstan, Täjikstan basşıları bar.

"The Qazaq Times"