Birikken wlttar wyımı «COVID-19 twsında jäne odan keyingi damudı qarjılandıru» taqırıbında halıqaralıq onlayn konferenciya ötkizdi. Jiında Qasım-Jomart Toqaev qazir Qazaqstan törağalıq etip otırğan «Teñizge şığatın jolı joq damuşı elder tobınıñ» atınan söz söyledi.

Konferenciyağa Kanadanıñ prem'er-ministri Djastin Tryudo, Germaniya kancleri Angela Merkel', Franciya prezidenti Emmanuel' Makron, Japoniya prem'er-ministri Sindzo Abe, Birikken wlttar wyımınıñ bas hatşısı Antoniu Guterriş, özge de memleketter men halıqaralıq wyımdardıñ basşıları qatıstı. BWW-nıñ Bas hatşısı pandemiya jağdayında qarjılıq dağdarıstı eñseru, gumanitarlıq kömek körsetu sındı mäselelerdi söz etti.

Öz bayandamasında nesi qarızın eskeru turalı wsınıs bildirgen Toqaev: «Pandemiya barlıq eldiñ damuın tejep tastadı. Äsirese, jahandıq indettiñ zardabın teñizge şığatın jolı joq damuşı elder tobı qattı sezinip jatır. 2030 jılğa deyingi kün tärtibiniñ orındaluı üşin birde-bir memlekettiñ artta qalmauı maqsatında halıqaralıq qoğamdastıq birigude. Bizdiñ top BWW men onıñ seriktesteri kürdeli kezeñde qabıldap jatqan şaralardı qoldaytının jetkizgim keledi. Teñizge şığatın jolı joq damuşı elder tobınıñ atınan kelesi salalarda özara üylesimdi äreket etuge şaqıramın. Eñ birinşi nesie qarızın eskeruimiz kerek. Halıqaralıq deñgeyde bereşegi bar elderdiñ qarızın öteuge moratoriy jariyalau mañızdı. Halıqaralıq qarjı wyımı damuşı elderdiñ densaulıq saqtau salasına qosımşa qarajat bağıttaudı wsınuı qajet. Älemdegi azıq-tülik qauipsizdigin qamtamasız etkenimiz jön. Auılşaruaşılıq sektorına män beru kerek. Jahandağı key elderdiñ azamattarın auız sumen qamtu da kün tärtibindegi mäsele boluı tiis. Jasıl tehnologiyalarğa qoljetimdilikti arttıru qajet. Jekelegen investorlar älemde cifrlandıru teñdigin qalıptastırıp, interneti joq elderdi ğalamtorğa qosuğa ınta bildirgeni läzim. Osı bağıtta investiciya salu mañızdı. Halıqaralıq sauda qatınasın jandandıru da özekti», – dep atap ötti.

Germaniya kancleri Angela Merkel': «Bwl dağdarıstı tek jwmıla äreket etu arqasında ğana eñsere alamız. Bügingi kezdesu qorıtındısı boyınşa osı ıntımaqtasa äreket etudiñ naqtı şeşimderi qabıldanadı degen ümittemiz. Koronavirustan japa şekken elderdiñ ekonomikasın qoldau üşin auqımdı şaralar qajet. Mäselen, jekemenşik kreditorlardı tartu kerek. Bwl dağdarıstı eñseru üşin bizge Halıqaralıq valyuta qorı, Düniejüzilik densaulıq saqtau wyımı, Düniejüzilik bank jäne BWW-nıñ kömegi qajet boluı mümkin», – dedi.

Ayta keteyik, älemde Covid-19 koronavirusın 5,6 millionnan astam adam jwqtırğan. Qaytıs bolğandar 355 mıñnan astı. Düniejüzilik densaulıq saqtau wyımı Qıtaydan tarağan bwl virustı «pandemiya» dep jariyalağan. Koronavirustı alğaş jwqtırğandar Qıtaydıñ Hubey provinciyasınıñ Uhan' qalasında tirkeldi.

 "The Qazaq Times"