Fotokollaj: Türkiya, Qazaqstan jäne AQŞ prezidentteri

Uaşington Süriyadağı jağdaydı retteuge arnalğan astana formatın sınğa aldı.

Idlib provinciyasındağı jağdaydı talqılauğa arnalğan qauipsizdik keñesiniñ otırısında AQŞ-tıñ BWW-dağı twraqtı ökili Kelli Kraft: «Astana procesi mäseleni rettey almaydı. Bwl process bayağıda «sınğan» jäne qayta qalpına kelmeydi. Biz bwdan bılay astanalıq formatqa qaytıp oralmaymız. Idlibtegi qaqtığıstı toqtatu, Süriya mäselesin şeşudi astana kelissözine tapsıra almaymız», – dep mälimdedi.

Kraft sözinde NATO men AQŞ Türkiyanıñ qadağalau beketterine jasalğan şabuıldardan qorğanuğa bağıttalğan äskeri operaciyaların qoldaytının ayttı. Osı aptada Türkiyanıñ Sırtqı ister ministri Mevlut Çavuşoğlwmen söylesken NATO Bas hatşısı Yens Stoltenberg «Biz Reseydiñ Süriya äskerine qoldau körsetip otıranın jaqsı bilemiz jäne Kreml'diñ bwl qadamın qoldamaymız. Aldağı uaqıtta jağday uşığıp ketpes üşin Resey şeginui tiis. NATO Türkiyağa qoldau bildiredi», – degen bolatın. k

2011 jılı Süriyada qarulı qaqtığıs bastalğalı beri astanada Süriya mäselesin retteu jönindegi kelissöz jeti märte wyımdastırıldı. Astana kelissözine qoldau körsetuşi elderdiñ arqasında, Süriyadağı qaqtığıs uaqıtşa toqtatıldı. Resey, Iran jäne Türkiya atalğan mäsele jönindegi kelisimşarttı orındauşı kepilger-elder sanaladı.

Eske sala keteyik, küni keşe Süriya ükimet küşteriniñ äue soqqılarınan 33 türik äskeriniñ qaza bolğanın resmi Ankara rastadı. Bwğan jauap retinde Türkiya Süriya ükimetine tiesili barlıq nısannıñ şabuıl nısanasına aynalatının ayttı. 28 aqpan keşki uaqıtta Türkiya prezidenti Rejep Tayıp Erdoğan Resey prezidenti Vladimir Putinmen telefon arqılı söylesti. Qazirgi uaqıtta Idlibtegi ahual jiti baqılauda.

"The Qazaq Times"