Bügin Şığıs Qazaqstan oblısındağı Zaysan audandıq sotı tört aydan beri el köz tikken etnikalıq Qıtay qazaqtarı Qaster Mwsahanwlı men Mwrager Älimwlınıñ isine qatıstı ükim şığardı.

Sud'ya Ospanova «memlekettik şekaranı zañsız kesip ötti» dep ayıptalğan etnikalıq eki qazaqtı elde qaldırıp, bir jılğa bas bostandığınan ayıru jazasına kesti.

Kündiz sot otırısında ötken jarıssözde prokuror Erjan Äzimbaev atajwrtına pana izdep kelgen eki jigitti bir jılğa türmege qamap, 10 AEK köleminde ayıppwl töletudi swrağan. Sonday-aq «jeñildetilgen jağdaydı eskerip» olardı Qıtayğa qaytarmaudı swrağan.

Al qoğauşılar olardıñ Qıtaydıñ azşılıq wlttarğa jasap otırğan qısımınan seskenip «şekaradan zañsız ötuge» mäjbür bolğanın, olardı tolıq aqtauın  swradı.

Sotqa eldiñ är aymağınan köptegen belsendiler jinaldı. Degenmen sot zalı şağın bolğandıqtan, köbi sırtta jäne dälizde kütip türdı. Qoldauşılar «Bostandıq» dep wrandasıp jatqan kezde, Şımken qalasında bir top azamattıq belsendiler de eki qazaq jigitiniñ bosatıluın talap etip şıqtı.

Ötken jıldıñ 14 qazanında Almatıdağı adam qwqığın qorğau byurosında ötken baspasöz mäslihatında Qaster Mwsahanwlı Şıñjañdağı «sayasi lager'de qamauda bolğanın», Mwrager Älimwlı Qıtayda «qısım körgenin» mälimdegen. Osıdan keyin WQK ekeuin «şekaranı zañsız kesip ötti» degen ayıppen wstap, erteñinde Şığıs Qazaqstan oblısına alıp ketken. Qazan ayınıñ 30-ı küni WQK Şekara qızmetiniñ direktorı Darhan Dilmanov şekaranı zañsız bwzıp ötu faktisi boyınşa qılmıstıq is qozğalıp, tergeu jürip jatqanın jäne birqatar lauazımdı twlğalar tärtiptik jauapkerşilikke tartılğandığın habarlağan.

Qazannıñ 4-i Qazaqstannıñ sırtqı ister ministri Mwhtar Tileuberdi «Şıñjañdağı lager'lerde qazir qazaqtar joq» dese, 4 jeltoqsan prezident Toqaev Germaniyağa jwmıs saparı qarsañında Deutsche Welle telearnasına bergen swqbatında  halıqaralıq wyımdar wsınıp jatqan köptegen aqparat şındıqqa janaspaytının aytıp, «Şıñjañdağı qayta tärbieleu ortalığında birdi-ekili ğana qazaq otırğan bolar» degen. Al 5 jeltoqsan WQK törağasınıñ orınbasarı, Şekara qızmetiniñ direktorı Darhan Dilmanov «sot isi ayaqtalğannan keyin şekaranı zañsız kesip ötken eki etnikalıq qazaq Qıtayğa qaytarılatının» aytqan edi.

Soñğı kezderi Qazaqstan sotı Qıtaydan qaşıp şekara kesip ötken qandastarğa elde qaldıru ükimin şığara bastadı. Desede arğı bette otırğan, tipti Qazaqstan azamattığı bar etnikalıq qazaqtar äli künge deyin ärtürli sıltaumen qayta tärbileu lagerleri men türmede qamauda otır.

"The Qazaq Times"