Foto: Azattıq radiosı

Bügin Aqsu audandıq sotında «şeteldiktermen töbelesti» delingen Qızılağaştıñ bes twrğınına ükim oqıldı.

Azamattardıñ advokatı Janar Balğabaevanıñ habarlauınşa, sot Berik Rısaldinov pen Sarqıt Salhanovtıñ ärqaysısınıñ bas bostandığın eki jıl altı ayğa şektedi. Qalğan üş azamat: Nwrbol Mwhametalin, Beybit Mwhametalin jäne Erkin Salhanovtıñ bas bostandığı eki jılğa şekteldi. Sot sonımen birge bes azamatqa 100 sağat qoğamdıq jwmıs isteudi mindettedi.

Biıl 8 qazanda Qızılağaş auılınıñ bes azamatı bir top qıtay jabılğan töbelesinen zardap şekken qazaqtıñ esesin qaytarmaq nietpen Qıtaydıñ jiırma şaqtı azamatın soqqığa jığıp, onıñ 11-i jeñil, üşeui orta deñgeyde jaralanğan. Bir qızığı, qıtay azamattarı eline qaytarılıp, bes qızılağaştıqqa qatıstı Qılmıstıq kodekstiñ «qaru nemese suıq qaru qoldanıp densaulıqqa ziyan keltiru» (293-bap) babımen is qozğalğan.

Almatı qalalıq policiya departamentiniñ baspasöz qızmetiniñ mälimdeuinşe, janjal aldımen Qıtaydıñ tört jwmısşısı arasında bastalıp, keyin töbeleske wlasqan. Barlığı – «Citic Construction» kompaniyasınıñ jwmısşısı. Töbelesten Qazaqstanda twraqtı twruğa rwqsatı bar Qıtay azamatı, etnikalıq qazaq jaraqattanğan.

Departamenttiñ mälimetinşe, «kelesi küni jergilikti twrğındar men "Citic Construction» kompaniyasında jwmıs isteytin Qazaqstan azamattarı "istiñ bayıbına barmay Qıtaydan kelgen jwmısşılardı wrıp-soqqan". Etnikalıq qazaqpen töbelesken Qıtay azamattarı äkimşilik jazağa tartılıp, 10 künge qamalğan. Keyin olardıñ elden şığarılğanı da habarlanğan. Tekseris kezinde «Sitic Constraction» kompaniyasında 33 şeteldik zañsız jwmıs istep jürgeni anıqtalğan.

"The Qazaq Times"