Irandağı narazılıq şarası. Foto: VOA.

Irannıñ ruhani kösemi ayatolla Hameney janarmay bağasın 50 payızğa köteru turalı ükimettiñ şeşimin qoldadı. Bwl şeşim demalıs künderi auqımdı narazılıq şarasına türtki boldı. Eldiñ ruhani kösemi narazılıq şarasın «arandatuşılar» wyımdastırğan dep ayıptağan.

Hameneydiñ mälimdemesinen keyin, Tehran biligi narazılıqtı basu üşin eldiñ ğalamtorın jauıp tastadı. Ayatolla Hameney «dürbeleñ» kezinde birneşe adamnıñ qaza bolğanın ayttı, biraq naqtı mälimet bermegen. Ol jäne qauipsizdik küşterine bwyrıqtı orındauğa tapsırma bergen.

Eldegi narazılıqqa bilik tarabı tärtipsizdik jäne arandatuşılıq degen bağa berip otır. Bwğan qosa Irannıñ barlau organı mälimdeme jasap: «Soñğı eki kündegi tärtipsizdikke kinäli adamdar tabıldı jäne tiisti jazağa tartıldı», –degen. Bwğan qarap, keybir sarapşılar Iran resmi tarabınıñ bwl mälimdemeleri narazı jwrttı jappay qırıp-joyu äreketterinen derek beredi dep qaraydı.

Islam respublikasınıñ resmi aqparat agenttikteri ereuilşiler bir policiyanı öltirgenin aytsa, jartılay resmi aqparat agenttigi sanalatın ParsToday mıñnan astam belsendiniñ qamauğa alınğanın jazdı.

Irandağı narazılıq akciyasına jäne oğan qarata ükimettiñ reakciyasına Amerika Qwrama Ştattarı nazar audarıp otırğanın bildirdi. Tramp Tehrannıñ narazılıq şarasına qaratqan poziciyasın sınğa aldı. Aq üy öz mälimdemesinde: «Tehran zımıran jäne yadrolıq bağdarlamalardı ıntalandıruda. Olar Irandı terrorizmdi qoldaytın jäne sol tüzimin maqtan etetin elge aylandırıp otır. Nätijesi bileuşi taptıñ halıqtı tastap, jekelegen baylıq pen bilik üşin küresudiñ qanday bolatının körsetip otır», – degen.

Iran ükimetiniñ janarmay qwnın köteru turalı şeşimi Irannıñ onnan astam qalasında narazılıq şeruine sebep bolğan.

“The Qazaq Times”