Qazaqstan men Türkiya arasındağı äskeri ıntımaqtastıq kelisimin ratifikaciyalau turalı zañ jobası maqwldandı. Bwl jöninde QR Parlamenti mäjilisiniñ jalpı otırısında mälim boldı.

Eki el arasındağı äskeri kelisimge 2018 jılğı qırküyekte Ankarada qol qoyılğan. Kelisimniñ maqsatı — taraptar arasındağı teñ qwqıqtıq pen özara tiimdilik qağidattar negizinde äskeri ıntımaqtastıqtı damıtuğa negizdelgen. Qwjattı iske asıru boyınşa şaralar taraptarmen birlesip äzirlegen Jıldıq ıntımaqtastıq josparına säykes jüzege aspaq.

QR Qorğanıs ministriniñ orınbasarı Timur Dändibaev: «Joğarıda atalğan halıqaralıq şarttardıñ keybir erejeleri eki memlekettiñ qoldanıstağı zañnamasına säykes kelmeui jäne olarda is-şaralardı ötkizu boyınşa qarjılıq şığıstarmen qamtamasız etu tärtibiniñ bolmauına baylanıstı äskeri ıntımaqtastıq salasında jaña kelisim jasau turalı şeşim qabıldanğan bolatın», — deydi. Dändibaevtıñ aytuınşa, atalğan kelisim äskeri dayarlıq pen oqıtudı qosa alğanda, bwdan bwrın qamtılmağan birlesken oqu-jattığulardı ötkizu, äue keñistigi arqılı äskeri müliktiñ tranziti, medicinalıq kömek körsetu, zañ qwzırettiligin közdeydi.

Ayta keteyik, Türkiya Qazaqstannıñ mañızdı äri negizgi strategiyalıq seriktesteriniñ biri bolıp sanaladı. Osı uaqıtqa deyin eki memleket arasındağı äskeri saladağı ıntımaqtastıq 1993 jılğı 8 tamızdağı äskeri bilim salasındağı, sonday-aq 1994 jılğı 23 aqpandağı äskeri ğılım, tehnika jäne bilim salasındağı ıntımaqtastıq turalı kelisimder negizinde jüzege asırılıp keledi.

"The Qazaq Times"