Türkiya prezidenti Rejep Tayıp Erdoğan. Foto: http://live.saudigazette.com.sa

Türkiya Süriyada jürgiziletin äskeri operaciyağa dayındıqtı ayaqtadı. Bwl turalı el prezidenti Rejep Tayıp Erdoğan mälimdedi.

Erdoğan sözinde: «Türkiya Siriyada bastaytın äskeri operaciyağa dayındıqtarın tämamdadı. AQŞ bizdiñ strategiyalıq seriktesimiz. Sonday-aq NATO qwramında odaqtas elmiz. Degenmen, biz resmi Vaşingtonnıñ lañkestik wyımdarğa jasağan qoldauına köz jwma almaymız. Büginde aymaq «Irak pen Levant lañkestik wyımnan» azat etildi. Alayda, onıñ ornına Siriyadağı wsaq wyımdardan birikken «Demokratiyalıq küş» tobı şıqtı. Onıñ basqa lañkestik wyımdardan eş ayırmaşılığı joq», – deydi.

Türkiya bastağan äskeri jorıq kürtterdiñ baqılauındağı jerlerdi sodırlardan tazartudı maqsat etedi. Alayda, bwl qadamnıñ qaşan oñ nätije bereri beymälim.

6 qırküyekte türik prezidenti Rejep Tayıp Erdoğan Süriyanıñ soltüstiginde qauipsizdik aymağın qwru üşin Türkiyağa halıqaralıq qoldau körsetilmese, milliondağan bosqındar üşin Europağa şekara ayqara aşılatının eskertken bolatın. Sonımen qatar, resmi Ankara Europa elderinen logistikalıq kömek swrağan. Osığan baylanıstı, bosqındar men beybit twrğındardıñ Süriyadağı qauipsizdigin qamtamasız etuge qoldau körsetetin birden-bir memleket AQŞ bolğandıqtan, Türkiya atalğan mäseleni amerikalıq äskerlermen birlese şeşuge bel buğan.

9 qırküyekte Türkiya men AQŞ äskerleri Süriyanıñ Evfrat özeninen şığıs audandarda qauipsizdik aymağın qwru maqsatında birlesken operaciya ötkizgen. Keyinnen resmi Ankara Uaşingtonnıñ bwl istenemqwraydılıq tanıtıp otırğanın habarlağan.

"The Qazaq Times"