Iran Islam Respublikası Sırtqı ister ministrliginiñ baspasöz ökili AQŞ pen Iran arasında kelissözderdiñ bastalğanı turalı aqparattı joqqa şığardı. Bwğan deyin Kuveyt lauazımdılarınıñ biri qayşılıqtardı şeşu maqsatında Iran men AQŞ arasında kelissözder bastalğanı turalı habarlağan. 

Iran SİM ökili Abbas Musavi bir kün bwrın jasağan mälimdemesinde, Iran men AQŞ arasında kezekti qayşılıqtarğa baylanıstı eşqanday kelissöz bolmağanın ayttı. Bwğan deyin IIR-nıñ ruhani kösemi Ayatolla Homeyni AQŞ-tıñ qazirgi ükimetimen "kelissözge kelu mümkin emes" degen pikirin bildirgen. Bwğan qosa Iran rejimi AQŞ-qa beretin jauabımız "Qarsılıq" degendi jii qaytalağan edi.

Kuveyttiñ sırtqı ister ministriniñ orınbasarı jeksenbi küni jurnalisterge bergen jauabında, AQŞ pen Iran arasında kelissözder bastalğanın, Iran tarabı qalayda kelissözge keledi degen oyın aytqan.

AQŞ pen Iran ükimetteri kezek-kezek soğıstı qalamaytının bildirip, birin-biri ayıptauda. Oğan qosa ırıqsız soğıs tuılğan jağdayda bar küşin salatının da eskertumen keledi. Bwl aymaqtağı elderdi jäne älem elderin boluı mümkin soğıs qaterimen alañdatuda. Qazir, Aq üy Orta Şığıstağı AQŞ äskerleriniñ sanın köbeytu turalı Pentagonnıñ wsınısın qarauda. Iran tarabı Parsı şığanağı mañında amerikalıq äskeri küşterdiñ köbeyui özdiginen qaterli qaqtığıstı tudıradı dep qaraydı.

“The Qazaq Times”