يران يسلام رەسپۋبليكاسى سىرتقى ىستەر مينيسترلىگىنىڭ ءباسپاسوز وكىلى اقش پەن يران اراسىندا كەلىسسوزدەردىڭ باستالعانى تۋرالى اقپاراتتى جوققا شىعاردى. بۇعان دەيىن كۋۆەيت لاۋازىمدىلارىنىڭ ءبىرى قايشىلىقتاردى شەشۋ ماقساتىندا يران مەن اقش اراسىندا كەلىسسوزدەر باستالعانى تۋرالى حابارلاعان. 

يران ءسىم وكىلى ابباس مۋساۆي ءبىر كۇن بۇرىن جاساعان مالىمدەمەسىندە، يران مەن اقش اراسىندا كەزەكتى قايشىلىقتارعا بايلانىستى ەشقانداي كەلىسسوز بولماعانىن ايتتى. بۇعان دەيىن ير-نىڭ رۋحاني كوسەمى اياتوللا حومەيني اقش-تىڭ قازىرگى ۇكىمەتىمەن "كەلىسسوزگە كەلۋ مۇمكىن ەمەس" دەگەن پىكىرىن بىلدىرگەن. بۇعان قوسا يران رەجيمى اقش-قا بەرەتىن جاۋابىمىز "قارسىلىق" دەگەندى ءجيى قايتالاعان ەدى.

كۋۆەيتتىڭ سىرتقى ىستەر ءمينيسترىنىڭ ورىنباسارى جەكسەنبى كۇنى جۋرناليستەرگە بەرگەن جاۋابىندا، اقش پەن يران اراسىندا كەلىسسوزدەر باستالعانىن، يران تارابى قالايدا كەلىسسوزگە كەلەدى دەگەن ويىن ايتقان.

اقش پەن يران ۇكىمەتتەرى كەزەك-كەزەك سوعىستى قالامايتىنىن ءبىلدىرىپ، ءبىرىن-ءبىرى ايىپتاۋدا. وعان قوسا ىرىقسىز سوعىس تۋىلعان جاعدايدا بار كۇشىن سالاتىنىن دا ەسكەرتۋمەن كەلەدى. بۇل ايماقتاعى ەلدەردى جانە الەم ەلدەرىن بولۋى مۇمكىن سوعىس قاتەرىمەن الاڭداتۋدا. قازىر، اق ءۇي ورتا شىعىستاعى اقش اسكەرلەرىنىڭ سانىن كوبەيتۋ تۋرالى پەنتاگوننىڭ ۇسىنىسىن قاراۋدا. يران تارابى پارسى شىعاناعى ماڭىندا امەريكالىق اسكەري كۇشتەردىڭ كوبەيۋى وزدىگىنەن قاتەرلى قاقتىعىستى تۋدىرادى دەپ قارايدى.

“The Qazaq Times”