Irannıñ “anti-amerika” wstanımı jäne Qazaqstan

Iran-AQŞ qarım-qatınası şieleniske tolı. Şığanaq soğısı jıldarınan tartıp, Orta-Şığıstağı Irannıñ äskeri, ekonomikalıq belsendiligin älsiretu Europa men AQŞ-tıñ bastı maqsatı bolıp keledi. Al Iran Islam Respublikası AQŞ-tı öziniñ sayasi arenadağı bastı qarsılasına balaydı. Sondıqtan da, AQŞ-qa bükil irandıqtardı qarsı qoyuda.

Soñğı kezderdegi AQŞ-Iran tağı da şieleniske bet aldı. AQŞ-tağı sayasi özgerister, Islam elderine qaratqan jaña wstanımdar Irandı qamtığan islam elderiniñ Amerikamen qayşılığın üdetti. Alda AQŞ qwrlıqtıq küşterdi Süriyağa attandıruı mümkin. Bwğan qosa, sarapşılardıñ aytuına qarağanda, AQŞ Iran men Resey arasına iritki-salatın kez-kelgen mümkindikti paydalanuğa tırısadı. Bilik basına kelgen Tramp ükimeti Iranğa qanday jaña şaralar jasaytını äzirge qwpiya, al Iran bolsa tas tüyin dayın otır. Ötkende ğana Iranda bolğan 22-şi bahman küngi ereuil, bir esepte irandıqtardıñ ideologiyalıq birligi men anti-amerika közqarasın ayqındasa, endi bir jağınan wşqarılıqtarın da körsetip twrğanday. Älemdegi eldermen aşıq jaulıqtı közdeytin sayasat ol eldegi işki-sırtqı jağdayğa qanşalıqtı tiimdiligin aldağı jıldar körseteri anıq.

Iran Islam revolyuciyasınıñ jetekşisi Ayatolla Hamneni särsenbi küni söylegen sözinde: Amerika äskeri soğıs jöninde qoqan-loqqı jasau aylasın qaytalap, Iran basşılarınıñ nazarın şın soğıstan, yağni ekonomikalıq soğıstan bwrudı közdep otır», – degen bolatın. Bwnısı AQŞ Iranğa aşıq äskeri soğıs jasauğa batıldıq ete almaydı degeni. Bwl pikirin bir esepten dwrıs deuge boladı. AQŞ-tıñ barlıq äskeri qadamı eseppen, sanmen jüriledi. Iraktağı nemese Orta-Şığıstağı barlıq äskeri äreketteriniñ öz esebi bar. Kesip aytuğa boladı, bwl şın soğıs emes. Qazirgi kezdiñ «şın soğısı» tek qana ekonomikalıq soğıs. Soğıstıñ özi de ekonomikağa qızmet etedi. Terrorizmge qarsı kürestiñ şekpenin jamılğan amerikalıqtardıñ şın közdegeniniñ ne ekeni, bwrın bolma sa da, qazir belgili närse.

Iranda Batıs sanasatın äskeri quat bar. Oğan qosa mwnay öndirisi jağınan älemdegi aldınğı elderdiñ biri. Arqasın Islam elderine tirese, bilegin Reseyge artıp, Amerikağa «kelseñ, kel»-diñ kebin kiip otır. Iran basşısı sözinde Irannan şetelge qonıs audarğandardı qamtığan sırtqı küşter Iranğa jıl sayın aqparattıq, ideologiyalıq şabuıldar jasap, irandıqtardı Islam revolyuciyasınıñ jolınan taydıruğa tırısatının ayttı. Onıñ oyınşa osı retki halıqtıq ereuildiñ kölemdi boluı sol sırtqı küşterdiñ auzına qwm qwyıptı. Milliondağan halıqtıñ alañda «Amerika ölim!» wranın köterui, Batıs elderin beyjay qaldırğan joq. Irandıqtar sanasına siñip ketken «atni-amerika» ideyasın juıp-şayu jaqın uaqıtta mümkin emestigin sezinse kerek.

Parsı jwrtımen tayau 500 jılda aşıq jaulığımız bolmasa da, odan bwrınğı köşpeli men otırıqşı eki mädeniet şekarasında qandı qırğın tolastağan emes-ti. Büginde tatu körşi elmiz. Iran men Qazaqstan arasındağı qarım-qatınas jıl sayın qoyulasıp keledi. Qazaqstan men Irannıñ transporttıq baylanıstarı tıñ deñgeyge köterildi. Eki-eldiñ mädeni, sauda-ekonomikalıq almasuları da bwrınğığa qarağanda jiiledi. Elimiz halqınıñ basım köbi mwsılman qauımı bolğanımen, biz zayırlı qwqıqtı, demokratiyalı joldı tañdadıq. Iranğa körşi el retinde bizdi Irandağı ideologiyalıq wşqarılıqtar alañdatadı.

Şın mänisinde älem tınıştığı qaşanda qıl üstinde twradı. Aytalıq, Iran jäne Orta-Şığıs mäselesi, Soltüstik Koreya yadrolıq jağdayı, Resey-AQŞ qırği-qabaqtıq baylanısı, Şığıs Aziya qayşılığı, Süriya men Ukraina mäselesin sındı birneşe tüyindi atap körsetsek te,  soğan sebep bola aladı. Bwl bilteniñ qay-qaysı da qattı tartılar bolsa twtas älemdi şarpığan jarılıstardı alıp keledi. Älem beybitşiligi men adamzat tınıştığı üşin islamdağı « mwsılman men käpir arasında tübi bir soğıs boladı» deytin ideyanı da salmaqtılıqpen oylap köru kerek. Qazaqstannıñ mäñgiligi men twtastığı üşin, aynaladağı elderdiñ qadam alısına saq qarap, qırağılıqpen köz tigip otıruğa müddelimiz.

“The Qazaq Times”