Foto: eadaily.com

Qazirgi uaqıtta Europada migranttar men kelimsekter mäselesi şienisti jağdayğa jetip twr. Bwdan bwrın Italiya jäne Mal'ta elderiniñ 600 migrantı bar «Aquarius» kemesin  qabıldaudan bas tartqandarı turalı jazğanbız. Endi, soñğı mälimetterge qarağanda, osı atalğan eki el arasındağı eregestiñ tuındauına sebep bolğan 600-ge juıq migranttı qabıldauğa Ispaniya kelisim berdi.  

Ispaniya ükimet basşısı vedomostvasınıñ habarlauınşa, bwl şeşim prem'er-ministr Pedro-Sançez tarapınan qabıldanğan. «Gumanitarlıq qayğılı jağdaydıñ aldın aluğa tiispiz. Sonımen qatar, osı twlğalar üşin qauipsiz aylaq aşu mäselesin de nazardan tıs qaldırmauımız kerek», - degen ol. Ayta ketu kerek, Italiya —  bosqındardıñ Soltüstik Afrikadan Europağa ötuleri üşin ıñğaylı äri negizgi el bolıp sanaladı. Alayda, osığan qaramastan Italiya migranttardı qabıldaudan bas tartıp, Mal'tanı «eñ jaqın äri qauipsiz» dep atap, Siciliya jağalauına bet alğan boyı, orta jolda qalğan migranttardı qabıldau jauapkerşiligin Mal'tağa artqan edi. Aqırı, «Aquarius» kemesi jeksenbi küni jaña ministr Matteo Sal'vini olardı qabıldaudan bas tartqannan keyin bir täulik boyı Jerorta teñizinde qalğan.

Kemedegiler kimder?

«Akvariustağılardıñ» köpşiligi Liviyada qwtqarılğandar. Olar —  Saharanıñ oñtüstigindegi Afrika elderinen Italiya men Mal'ta arqılı Europağa zañsız ötuge tırısqan kelimsekter. Jerorta teñizinde qwtqarılğan osı migrantardıñ şamamen 400-i italiyalıq äskeri qızmetkerler men jağalaulıq küzetter tarapınan iriktelip alınğan. Sodan keyin olar «Akvariusqa» otırğızılğan. Ayta ketu kerek, olardıñ arasında 123 jetkinşek, 11 bala jäne jeti jükti äyel bar. Qazirgi uaqıtta osı kemedegilermen birge jürgen tilşi Aneliz Borjdıñ habarlauınşa, jetkinşekter 13-17 jas aralığında. Olar Eritrei, Gana, Nigeriya jäne Sudan elderinen qaşıp keledi.

Italiyanıñ olardı qabıldamau sebebi nede?

Jeksenbi küni Italiya İİM basşısı «Italiyanıñ adam saudası men zañsız köşi-qondı jaqtamaytının» aytıp: «Mal'ta eşkimdi qabıldamaydı. Franciya adamdardı şekarağa keri qaytaruda. Ispaniya şekarasın qarumen küzetude» dep, bosqındar men kelimsekter mäselesinde jaltarıp jatqanın aytqan edi. Ötken aptada Sal'vini de Rimniñ migranttardı köbirek deportaciyalauı kerek ekenin mälimdep, al bassauğa alğandardı Euroodaqqa müşe-elderge taratqısı keletinin eskertken bolatın. Alayda, EO-tıñ keybir elderi bwl josparğa üzildi-kesildi qarsı şığuda.

Italiya ükimetin sınauşılardıñ oyınşa, Rimniñ migranttardı otandarına keri qaytaru josparı— orındaluı qiın jospar. Sondıqtan bwl — näsilaralıq alauızdıqtı örşitip, gumanitarlıq mäseleni sayasilandıratın ğana bastama.

Al Mal'ta nege qabıldamadı?

Mal'ta ükimetiniñ baspasöz hatşısı da öz kezeginde Mal'ta eliniñ «bosqındar men kelimsekter mäselesin retteuşi nemese jauaptı wyım» emes ekenin aytıp, mälimdeme jasağan edi. Odan bwrın Sal'vini: «Mal'ta ükimeti 126 kelimsekter tielgen «Sifahs» kemesi osınday jağdayda da qalğanda öz mindetin atqarmadı» , - dep ayıptağanı belgili. YAğni, Mal'ta «Sifahs» kemesine kömek qolın sozudan bas tartqan. Artınşa, senbi, 9 mausım küni «Sifahs» siciliyalıq port «Pozalloğa» toqtauğa rwqsat alğan bolatın. Al, Mal'ta ükimeti özderiniñ köşi-qon mäselesindegi mindetterin qajetti deñgeyde atqarudamız dep mälimdedi.

Migranttar mäselesiniñ osılay şielenisti jağdayğa jetuine baylanıstı keşe, 11 mausımda BWW-nıñ bosqındar isi boyınşa Joğarı komissarı da mälimdeme jasadı. "Mal'ta men Italiya elderiniñ jüzdegen migranttı solay kemede qañtarıp qoyu qwqıqtarı joq. Eki jaqtıñ biri şwğıl türde olardı qabıldauğa tiis. Qazirgi tañda memleketaralıq mäseleni qoya twrıp, adamdardı qwtqaru mäselesin tezirek şeşu kerek. Olar qiın jağdayda, as-suları tausıluda. "Migrnattarğa kim jauaptı nemese osı jauapkerşilikti memleketter arasında qalay böluge boladı" degen sındı auqımdı mäselelerdi keyinirek şeşuge boladı", - dedi BWW-nıñ arnayı ökili Vinsent Koşotel'.

“The Qazaq Times”