Foto: sputniknews.com

Üstimizdegi jıldıñ 26 naurız küni mwnaydıñ aldağı uaqıtqa arnalğan f'yuçers saudası yuan' arqılı bekitildi. Beyjiñ biligi Amerika dollarınan bas tartu sebebin endigi jerde Qıtaydıñ qara altındı importtauşı iri elge aynalğandığımen jäne bwdan keyingi sauda-sattıq kezinde özge eldiñ valyutasın paydalanudıñ negizsiz ekendigimen tüsindirdi. "Mwnay f'yuçersiniñ yuan'men saudalanuı "dollar territoriyasınıñ" ayasın tarıltuı mümkin. Qıtay Şanhay halıqaralıq energetikalıq birjasında öziniñ qwrlıqtıq böligindegi şeteldik investorlarğa arnalğan mwnay saudasına qatıstı şeşimin jariyaladı", - dep habaylaydı "Şinhua" agenttigi.

Sarapşılardıñ pikirinşe, mwnay f'yuçersi Qıtayğa bağanıñ bekitiluin qadağalau üşin jäne älemdegi eñ iri mwnay importauşı elge aynaluı üşin qajet. QHR-nıñ qwndı qağazdardı baqılau jönindegi Memlekettik Komitetiniñ osı sauda şeşiminen birneşe kün bwrın jariyalanğan mälimdemesinde mwnay f'yuçersiniñ yuan'men eseptelui Qıtaydıñ qarjı narığın wlğaytıp, mwnay salasındağı kompaniyaları üşin tiimdi qwral bolatını aytıldı.

2017 jılı Qıtay AQŞ-pen teñesip, älemdegi eñ iri mwnay importtauşı el atanğan edi. Sol jılı satıp alınğan mwnay kölemi künine 8,43 mln. barrel' qwrağan. Al bwl körsetkiş 2023 jılı orta eseppen künine 2,1 mln. barrel' boladı dep boljanuda. "YUan'men belgilengen mwnay f'yuçersi qıtaylıq narıqtıñ özgeristi kezeñi bolıp sanaladı" , - deydi "J.P. Morgan" halıqaralıq kliring departamentiniñ basşısı Devid Martin.

Ötkenge köz jügirter bolsaq, yuan'men eseptelgen alğaşqı mwnay f'yuçersi sonau 1993 jılı payda bolğan eken, alayda onıñ aynalımı bir jıldan keyin şikizat birjasındağı twraqsız jağdayğa bola, sonımen qatar yuan'nıñ älemdik valyuta narığında öte älsiz qaluına baylanıstı alınıp tastalğan. Tek 2016 jılı QHR wlttıq valyutasınıñ Halıqaralıq valyuta qorındağı salmağı artıp, älemdik nesie beruşiler yuan'dı "Arnayı qarız alu qwqığı" (SDR) qorjınına qosıp, mwnı "Qıtay ekonomikasınıñ ğalamdıq qarjı jüyesimen birigui jolındağı mañızdı kezeñ" dep tanığan. Osılayşa, yuan' Halıqaralıq Valyuta Qorınıñ rezervti valyuta qorjınındağı mañızdılığı jağınan dollar men eurodan keyingi üşinşi valyuta atanğan eken.

Biraq, Beyjiñniñ bwl qadamdarı AQŞ pen Qıtay arasındağı sauda qaqtığısına jasalıp jatqan dayındıqqa köbirek wqsaydı. Qosımşa keden salığı arqılı sauda jolı tosqauılğa wşırağalı twrğan Qıtay biligi AQŞ-tı kelisimge mäjbürleytin türli joldardı sınap köretini anıq. Alayda Qıtay älemde mwnay importtauşı birden bir el emes. Mwnay birjası AQŞ pen Qıtay arasında jaña soğıs maydanı bolsa, bwğan aralasuşı elder de köbeye tüsedi.

“The Qazaq Times”