AQŞ prezidentiniñ keñsesi. Foto: Mashable.

Jaqında Aq üyden birqatar qwpiya mälimetter aqparat qwraldarına jariyalanğannan keyin Trampqa degen jwrtşılıq narazılığı tağı örşidi. Bwl jolı bastı taqırıp bolğanı Tramptıñ qızmet kün tärtibi boldı. AQŞ prezidentiniñ kün tärtibi tüsiniksiz äri beybereket jazılatını jwrttı tañ qaldırğan. Bwl turalı BBC saytı habar tarattı.

Aq üyden tarağan qwpiya materialdarda belgili bolğanday Tramp birinşi jwmıs jinalısın sağat 11:00-de ötkizedi, oğan deyingi üş sağatta ol qwjattarmen aynalısadı. «Qızmet sağatı» Tramptıñ kün tärtibinde tek şarttı ğana, kerisinşe «kütpegen jayttar» köp bolıp şıqtı. Kün tärtip erejesi boyınşa bwl sağattarda Tramp mindetti türde prezident keñsesinde otıruğa tiis. Alayda, Tramp öziniñ qalağan jerinde teledidar körip, Twitter-ge mälimdemeler jazıp otıratını belgili bolğan.

Qwpiya aqparattar AQŞ-tağı Axios aqparattıq saytına jariyalanıp ketkennen keyin, Aq üy tarabı dereu mälimdeme jasap: «Prezident Tramp bwl sağattarda mañızdı qoñıraular qabıldaydı jäne qoñıraular şaladı», – dep tüsindirgen. Oğan qosa Tramptıñ jwmısqa köp uaqıtın arnaytının atağan. Alayda, AQŞ jurnalisteri Axios saytında tarağan prezident qızmetiniñ kün tärtibi men Aq üy resmi mälimdemesiniñ arasındağı anıq körinip twrğan ayırmaşılıqtardı alğa tartuda. Atalğan sayt Tramp teledidar aldında birşama köp uaqıt otıratının aytqan.

Axios  saytınıñ mälimetinşe, sağat 11-de Tramp resmi qızmetke kirisedi. Alğaşqı jiın ädette arnayı qızmet ökilderimen boladı. Odan keyin de bir-eki kezdesulerdi ötkeredi. Ortasında «dokumentter men operaciyalar» dep atalatın demalıstar bolıp twradı. Keşki sağat altılar şamasında prezident öziniñ twrar-jayına qaytıp keledi delingen. Bwdan arı atalğan sayt «üzilisterdiñ bwl kün tärtipte jazılmay twrğanı, prezident onday üzilisterdi qızmet bölmesine jaqın as bölmede, televizorlardan jañalıqtar qarap ötkizedi» dep jazğan.

Axios Tramptıñ qızmet kün tärtibin bılay körsetip berdi:

11:00 – «Sayasi bağıttı jüzege asıru» degen şarttı atpen jwmıs jiını ötedi.

12:00 – «Qwjattar men şeşimder» üşin tınığu.

12:30 – Lanç

13:30 – «Qwjattar men şeşimder» üşin tınığu.

Alğaşında Tramptıñ kün tärtibi basqaşa bolğan deydi atalğan internet basılım. Ol alğaş prezidenttik qızmetke kirisken kezinde tañğı astıñ aldında Ruzvel't zalında jinalıs ötkizip tastap, keyin özge kün tärtipti orındauğa kirisetin. Biraq, birte-birte Aq üy qojayını erkinsip ketse kerek.

Köptegen AQŞ prezidentteriniñ qızmet kün tärtibi tım tığız qızmettik ornalastırularğa tolı bolğan eken. Olardıñ köbi jwmıs tärtibin özderiniñ jağdaylarına qaray belgilegen eken. Aytalıq Barak Obama qızmetke tañğı sağat 9-10 şamasında bastap kirisetin bolğan, sebebi ol oğan deyin tañğı jattığular jasaytın ädeti bolğan. Al, tüstenu kezinde otbası müşelerimen uaqıt ötkizu üşin üyine qaytıp keledi eken. Al, Djorj Buş är küni qızmetke tañğı sağat 06:45-te kirisedi eken. Sebebi, ol Obamaday emes erte wyıqtauğa dağdılanıptı. Obama tüngi sağat bir-ekige deyin jwmısta otırğan.

AQŞ-tıñ bwrınğı prezidentteri arasında, Lidon Jonson men Bill Klinton jwmısqa kirsu uaqıtın tün jarımına qoyğandı wnatqan. Al, Ronal'd Reygannıñ jwmıs uaqıtı onıñ prezident merziminiñ soñğı kezderinde qısqarıp ketse kerek. Sol kezdegi prezident kömekşileriniñ aytuınşa, soñğı eki jılda ol kün tärtibin ärdayım jattap alatın bolğan. AQŞ-tıñ 39-prezidenti Jimmi Kater eñbek süygiş bolğan. Bilimdi bolğanımen, bolmaytın wsaq-tüyek jwmıstarğa deyin köbirek bas qatıratın adam bolğan.

Aq üydiñ qazirgi basşısı, AQŞ-tıñ 45-prezidenti Donal'd Tramp Aq üy tabaldırığın alğaş attağan kezinde qızmetke tım belsendi türde kirisken eken. Onıñ Tvitter paraqşasında onıñ tañerteñ erte jäne tün ortasında bolğanı turalı derekter köbirek wşırasatın. Biraq, amerikalıqtar «prezidentimiz jalqau bolıp baradı» dep narazılıq tanıta bastadı.

Axios saytı Aq üy baspasözine joldağan swrağında, telefonğa söylesu kezinde üş sağat boyı qanday telefondar qabıldaytının jäne kimderge qoñırau şalatının swrağan. Aq üy tarabı oğan: «Bwl uaqıttarda prezident öz komandasına tapsırma beredi, şetel basşılarımen jäne Kongress ökilderimen söylesedi», – dep jauap bergen.

“The Qazaq Times”