ترامپتىڭ قىزمەت كۇن ءتارتىبى قانداي: امەريكالىقتار جالقاۋ پرەزيدەنتكە نارازى

جاقىندا اق ۇيدەن بىرقاتار قۇپيا مالىمەتتەر اقپارات قۇرالدارىنا جاريالانعاننان كەيىن ترامپقا دەگەن جۇرتشىلىق نارازىلىعى تاعى ءورشىدى. بۇل جولى باستى تاقىرىپ بولعانى ترامپتىڭ قىزمەت كۇن ءتارتىبى بولدى. اقش پرەزيدەنتىنىڭ كۇن ءتارتىبى تۇسىنىكسىز ءارى بەيبەرەكەت جازىلاتىنى جۇرتتى تاڭ قالدىرعان. بۇل تۋرالى BBC سايتى حابار تاراتتى.

اق ۇيدەن تاراعان قۇپيا ماتەريالداردا بەلگىلى بولعانداي ترامپ ءبىرىنشى جۇمىس جينالىسىن ساعات 11:00-دە وتكىزەدى، وعان دەيىنگى ءۇش ساعاتتا ول قۇجاتتارمەن اينالىسادى. «قىزمەت ساعاتى» ترامپتىڭ كۇن تارتىبىندە تەك شارتتى عانا، كەرىسىنشە «كۇتپەگەن جايتتار» كوپ بولىپ شىقتى. كۇن ءتارتىپ ەرەجەسى بويىنشا بۇل ساعاتتاردا ترامپ مىندەتتى تۇردە پرەزيدەنت كەڭسەسىندە وتىرۋعا ءتيىس. الايدا، ترامپ ءوزىنىڭ قالاعان جەرىندە تەلەديدار كورىپ، Twitter-گە مالىمدەمەلەر جازىپ وتىراتىنى بەلگىلى بولعان.

قۇپيا اقپاراتتار اقش-تاعى Axios اقپاراتتىق سايتىنا جاريالانىپ كەتكەننەن كەيىن، اق ءۇي تارابى دەرەۋ مالىمدەمە جاساپ: «پرەزيدەنت ترامپ بۇل ساعاتتاردا ماڭىزدى قوڭىراۋلار قابىلدايدى جانە قوڭىراۋلار شالادى»، – دەپ تۇسىندىرگەن. وعان قوسا ترامپتىڭ جۇمىسقا كوپ ۋاقىتىن ارنايتىنىن اتاعان. الايدا، اقش جۋرناليستەرى Axios سايتىندا تاراعان پرەزيدەنت قىزمەتىنىڭ كۇن ءتارتىبى مەن اق ءۇي رەسمي مالىمدەمەسىنىڭ اراسىنداعى انىق كورىنىپ تۇرعان ايىرماشىلىقتاردى العا تارتۋدا. اتالعان سايت ترامپ تەلەديدار الدىندا ءبىرشاما كوپ ۋاقىت وتىراتىنىن ايتقان.

Axios  سايتىنىڭ مالىمەتىنشە، ساعات 11-دە ترامپ رەسمي قىزمەتكە كىرىسەدى. العاشقى جيىن ادەتتە ارنايى قىزمەت وكىلدەرىمەن بولادى. ودان كەيىن دە ءبىر-ەكى كەزدەسۋلەردى وتكەرەدى. ورتاسىندا «دوكۋمەنتتەر مەن وپەراتسيالار» دەپ اتالاتىن دەمالىستار بولىپ تۇرادى. كەشكى ساعات التىلار شاماسىندا پرەزيدەنت ءوزىنىڭ تۇرار-جايىنا قايتىپ كەلەدى دەلىنگەن. بۇدان ارى اتالعان سايت «ۇزىلىستەردىڭ بۇل كۇن تارتىپتە جازىلماي تۇرعانى، پرەزيدەنت ونداي ۇزىلىستەردى قىزمەت بولمەسىنە جاقىن اس بولمەدە، تەلەۆيزورلاردان جاڭالىقتار قاراپ وتكىزەدى» دەپ جازعان.

Axios ترامپتىڭ قىزمەت كۇن ءتارتىبىن بىلاي كورسەتىپ بەردى:

11:00 – «ساياسي باعىتتى جۇزەگە اسىرۋ» دەگەن شارتتى اتپەن جۇمىس جيىنى وتەدى.

12:00 – «قۇجاتتار مەن شەشىمدەر» ءۇشىن تىنىعۋ.

12:30 – لانچ

13:30 – «قۇجاتتار مەن شەشىمدەر» ءۇشىن تىنىعۋ.

العاشىندا ترامپتىڭ كۇن ءتارتىبى باسقاشا بولعان دەيدى اتالعان ينتەرنەت باسىلىم. ول العاش پرەزيدەنتتىك قىزمەتكە كىرىسكەن كەزىندە تاڭعى استىڭ الدىندا رۋزۆەلت زالىندا جينالىس وتكىزىپ تاستاپ، كەيىن وزگە كۇن ءتارتىپتى ورىنداۋعا كىرىسەتىن. بىراق، بىرتە-بىرتە اق ءۇي قوجايىنى ەركىنسىپ كەتسە كەرەك.

كوپتەگەن اقش پرەزيدەنتتەرىنىڭ قىزمەت كۇن ءتارتىبى تىم تىعىز قىزمەتتىك ورنالاستىرۋلارعا تولى بولعان ەكەن. ولاردىڭ كوبى جۇمىس ءتارتىبىن وزدەرىنىڭ جاعدايلارىنا قاراي بەلگىلەگەن ەكەن. ايتالىق باراك وباما قىزمەتكە تاڭعى ساعات 9-10 شاماسىندا باستاپ كىرىسەتىن بولعان، سەبەبى ول وعان دەيىن تاڭعى جاتتىعۋلار جاسايتىن ادەتى بولعان. ال، تۇستەنۋ كەزىندە وتباسى مۇشەلەرىمەن ۋاقىت وتكىزۋ ءۇشىن ۇيىنە قايتىپ كەلەدى ەكەن. ال، دجورج بۋش ءار كۇنى قىزمەتكە تاڭعى ساعات 06:45-تە كىرىسەدى ەكەن. سەبەبى، ول وباماداي ەمەس ەرتە ۇيىقتاۋعا داعدىلانىپتى. وباما تۇنگى ساعات ءبىر-ەكىگە دەيىن جۇمىستا وتىرعان.

اقش-تىڭ بۇرىنعى پرەزيدەنتتەرى اراسىندا، ليدون جونسون مەن بيلل كلينتون جۇمىسقا كىرسۋ ۋاقىتىن ءتۇن جارىمىنا قويعاندى ۇناتقان. ال، رونالد رەيگاننىڭ جۇمىس ۋاقىتى ونىڭ پرەزيدەنت مەرزىمىنىڭ سوڭعى كەزدەرىندە قىسقارىپ كەتسە كەرەك. سول كەزدەگى پرەزيدەنت كومەكشىلەرىنىڭ ايتۋىنشا، سوڭعى ەكى جىلدا ول كۇن ءتارتىبىن ءاردايىم جاتتاپ الاتىن بولعان. اقش-تىڭ 39-پرەزيدەنتى جيممي كاتەر ەڭبەك سۇيگىش بولعان. ءبىلىمدى بولعانىمەن، بولمايتىن ۇساق-تۇيەك جۇمىستارعا دەيىن كوبىرەك باس قاتىراتىن ادام بولعان.

اق ءۇيدىڭ قازىرگى باسشىسى، اقش-تىڭ 45-پرەزيدەنتى دونالد ترامپ اق ءۇي تابالدىرىعىن العاش اتتاعان كەزىندە قىزمەتكە تىم بەلسەندى تۇردە كىرىسكەن ەكەن. ونىڭ تۆيتتەر پاراقشاسىندا ونىڭ تاڭەرتەڭ ەرتە جانە ءتۇن ورتاسىندا بولعانى تۋرالى دەرەكتەر كوبىرەك ۇشىراساتىن. بىراق، امەريكالىقتار «پرەزيدەنتىمىز جالقاۋ بولىپ بارادى» دەپ نارازىلىق تانىتا باستادى.

Axios سايتى اق ءۇي باسپاسوزىنە جولداعان سۇراعىندا، تەلەفونعا سويلەسۋ كەزىندە ءۇش ساعات بويى قانداي تەلەفوندار قابىلدايتىنىن جانە كىمدەرگە قوڭىراۋ شالاتىنىن سۇراعان. اق ءۇي تارابى وعان: «بۇل ۋاقىتتاردا پرەزيدەنت ءوز كومانداسىنا تاپسىرما بەرەدى، شەتەل باسشىلارىمەن جانە كونگرەسس وكىلدەرىمەن سويلەسەدى»، – دەپ جاۋاپ بەرگەن.

“The Qazaq Times”