Putin men Tramptıñ kezdesui. Foto: Vox.

Qazirgi kezde älemdik aqparat keñistiginde qızu talqı taqırıptarınıñ biri - Resey men AQŞ prezidentteriniñ «qwpiya» kezdesui. Qwpiya deytinimiz bwl beyresmi kezdesu turalı eki el ükimetteri de resmi mälimet bermegen bolatın. Tek, 18 şilde küni ğana Aqüy Tramp pen Putinniñ ekinşi ret kezdesuin rastadı. Osığan deyin qwpiya saqtalıp kelgen kezdesudiñ maqsatı men söz bolğan taqırıptar äli de beymälim küyde. Alayda, Batıs medialarınıñ habarına qarağanda AQŞ şeneunikteri kezdesudiñ estelikteri men sipattamaları saqtaldı dep otır.

Amerikalıqtar men Uaşington aynalasındağı şendi-şekpendilerdiñ Putin pen Tramptıñ beyresmi kezdesuine qattı qadalatını dausız. Osığan deyin de Uaşington sayasi toptarı arasında Tramptı «Reseyşil» dep sanap kelgen közqarastar basım. Al, Uaşingtondağı eki jüz jıldan bergi «anti-Resey» wstanımı äli de bar boladı eken, Putinge beyresmi jolığıp, pikir almasqan Tramptıñ äreketi AQŞ-tı beyjay qaldıra almaydı. Qazirgi kezde Qwrama Ştattıñ türli basılımdarı Tramp pen Putinniñ ekinşi ret kezdesui turalı kün qwrğatpay jazuda. Osıdan-aq, AQŞ-Resey qarım-qatınası ğana emes, älemdik sayasat alañında da bwl kezdesudiñ salmağın bayqau qiın emes.

Olay bolsa, Tramp pen Putinniñ ekinşi ret kezdesui sirä qalay boldı? Osı turalı älemdik basılımdar men aqparat közderine şolu jasap körelik.

Tramp AQŞ prezident tağına otırğannan beri Putinmen alğaşqı kezdesui 7 şildedegi G20 sammitinde bolıp ötti. Jartı sağat dep josparlanğan kezdesu uaqıtı 2 sağatqa sozılğan. Al, qızmetinen ketip jatqan Aqüydiñ baspasöz mälimdemeşisi Şon Spayser men Wlttıq qauipsizdik qızmetiniñ mälimdemeşisi Maykl Anton 18 şilde küni AQŞ-Resey basşılarınıñ keşki asta birge bolğanın rastadı. Degenmen, kezdesudiñ qalay jäne qanşa uaqıtqa sozılğanı turalı aşıp aytpadı. Antonnıñ sözine sensek, bwl bir retki beyresmi kezdesu nemese resmi kelissöz bolıp sanalmaydı. Tramp pen Putin sayasat pen ükimet isinde emes, köbine erkin taqırıptarda äñgime örbitken. Sondıqtan bwl kezdesu kelissöz retinde sipattalmaydı.

Associated Press jäne basqa da bwqaralıq aqparat qwraldarınıñ habarında Tramp pen Putin qatısqan qonaqasını iesi sammitte otağası el bolıp otırğan Germaniyanıñ kancleri Angela Merkel' delingen. Bwl mälimetti atı-jönin bildirgisi kelmegen AQŞ şeneunikteriniñ biri bergen. Onıñ aytuınşa, Tramp bwl keşki qonaqasıda köptegen elderdiñ basşılarımen äñgimede bolğan, tek qonaqası ayaqtaluğa jaqındağanda ğana Putinniñ janına kelip, qısqa ğana pikirlesken eken. Eki basşısınıñ bwl «qısqa pikirlesuine» Putinniñ audarmaşısı qatısqan. Al, Tramptıñ janındağı audarmaşısı japon tili audarmaşısı bolıp, ol orıs tilin bilmeytin bolıp şıqqan. Sonday-aq, AQŞ şendisiniñ sözine qarağanda eki prezidenttiñ bwl pikir almasuı jwrt aytqanday kürdeli emes, qayta öte qalıptı jağday eken.

Al, Euraziya Gruptıñ törağası Ien Bremerdiñ bergen sipattaması bwdan säl özgeşe. Onıñ aytuınşa, sammitke qatısqan barlıq liderler men halıqaralıq wyımdardıñ basşıları tügeldey atalğan keşki qonaqasığa qatısqan. Olar orındarğa öz erkimen taldap otırğan. Tramp bolsa Putinniñ janına barıp orın alıp, ekeui bir sağat mölşerinde qızu äñgimelesken. Olar tipti ejelgi tanıs adamdarday erkin, jaydarı söylesip ketipti. Putinniñ audarmaşısı olarğa audarmaşılıq etken.

Bremerdiñ aytuınşa, Tramp pen Putinniñ janında bir ğana Putinniñ audarmaşısı ğana bolğan körinedi. Ol özge eşbir adamnıñ olardıñ ne turalı söyleskenin aytıp bere almaydı degendi aytadı. Sonımen birge Bremer: «Tramptıñ audarmaşı ertpey, Putindi keñeske tartuı AQŞ Wlttıq qauipsizdik erejesine qayşı, – dedi.

Tramp pen Putinniñ beyresmi kezdesui jäne köbirek pikirlesui Kreml'den göri Uaşingtondı tereñ uayımğa batırarı anıq. Älemge öktemdigin jürgizgisi keletin alpauıt elderdiñ biligi jöninen alıp qarağanda, prezidentteriniñ mwnday kezdesuin baqılaudan şığarıp aluı, şahmattağı bir retki ornı tolmas qatelikpen birdey. Aldağı uaqıtta eki partiyanı qamtığan şendilerdiñ Trampqa degen narazılıqtarınıñ küşeyui mümkin. Degenmen, Putin men Tramp osı bir emen-jarqın äñgime üstinde älemdik geosayasatqa tıñ özgeris engizudi söz etti me, kim bilsin?!

“The Qazaq Times”