ناۆالنىي پەسكوۆتى سوتقا بەردى

الەكسەي ناۆالنىي رەسەي پرەزيدەنتىنىڭ ءباسپاسوز حاتشىسى دميتري پەسكوۆتى سوتقا بەردى. شاعىمدى ماسكەۋدىڭ پرەسنەنسكي سوتىنىڭ ءباسپاسوز قىزمەتى راستادى.

ناۆالنىي پەسكوۆتىڭ ەكى مالىمدەمەسىن ورىنسىز جانە ابىرويعا نۇقسان كەلتىرەدى دەپ تانۋدى تالاپ ەتىپ وتىر. ءبىرىنشى مالىمدەمە: «تسرۋ ماماندارى ناۋقاسپەن جۇمىس ىستەيتىنىن ەسكەرسەك، ناۆالنىي سول ۇيىممەن تىعىز بايلانىستا». ەكىنشى: «بۇل ۇيىم ناۆالنىي ارقىلى ەمەس، بىزبەن تىكەلەي ديالوگ جۇرگىزۋى كەرەك».

1 قازاندا پەسكوۆ وپپوزيتسيونەردىڭ امەريكا قۇراما شتاتتارىنىڭ ورتالىق بارلاۋ باسقارماسىمەن (تسرۋ) جۇمىس ىستەيتىنىن حابارلاپ، جوعارىدا كەلتىرىلگەن مالىمدەمەلەردى ايتقان.

ناۆالنىي مۇنى «كۇلكىلى ايىپتاۋ» دەپ، كرەمل وكىلىن سوتقا بەردى. ازىرگە، رەسەي پرەزيدەنتىنىڭ ءباسپاسوز حاتشىسى وپپوزيتسيونەردىڭ شاعىمىنا تۇسىنىك بەرۋدەن باس تارتىپ وتىر.

2017 جىلى الەكسەي ناۆالنىي دميتري پەسكوۆتىڭ ۇلى جايىندا بەينەروليك جاريالاعان. الەكسەي ناۆالنىيدىڭ سوزىنشە، پەسكوۆتىڭ وسى ۋاقىتقا دەيىن ۇلىبريتانيادا تۇرىپ كەلگەن نيكولاي چوۋلز ەسىمدى ۇلى رەسەيگە قايتىپ ورالعان. بىراق ول رەسمي تۇردە ەشقانداي جەردە جۇمىس ىستەمەسە دە قۇنى 10 ميلليون رۋبل تۇراتىن Tesla اۆتوكولىگىن ءمىنىپ، ماسكەۋدىڭ قاق ورتاسىندا 110 شارشى مەترلىك پاتەردە تۇرىپ جاتىر.

ناۆالنىيدىڭ جەمقورلىققا قارسى قورىنىڭ زەرتتەۋلەرى بويىنشا، پەسكوۆتىڭ ۇلى نيكولاي چوۋلز  رەسەيدە 116 رەت  جول ەرەجەسىن بۇزعان جانە ەشقانداي جازاعا تارتىلماعان. ال ۇلىبريتانيادا جۇرگەن كەزىندە ءبىر جىلعا تۇرمەگە قامالعان. قازىرگى ۋاقىتتا نيكولاي چوۋزدىڭ يەلىگىندە Tesla اۆتوكولىگىنەن باسقا ماسكەۋدىڭ رۋبلەۆكا اۋدانىندا پاتەرى مەن سوڭعى ۇلگىدەگى رەيندج روۆەر، فەرراري كولىكتەرى بار.

ەستەرىڭىزگە سالايىق، الەكسەي ناۆالنىيدىڭ جەمقورلىققا قارسى قورى بۇعان دەيىن رەسەي پرەمەر-ءمينيسترى دميتري مەدۆەدەۆتىڭ مەنشىگىندەگى دۇنيە-مۇلىك جايىندا «ون ۆام نە ديمون» ءفيلمىن جاريالاعان بولاتىن.

"The Qazaq Times"