كەلەسى اپتادان باستاپ كوكتەمدەگى كارانتين قايتا جاريالانباق. 

پرەزيدەنت توقاەۆ ەلدە ىندەت ورشىگەن تۇستا Twitter جەلىسىندە «ۇكىمەت 5 شىلدەدەن باستاپ 14 كۇنگە كارانتين جاريالاۋ تۋرالى (ول ۇزارتىلۋى دا مۇمكىن) جوسپارىن ۇسىندى» دەپ مالىمدەدى.

ونىڭ جازۋىنشا، 2 شىلدەدە دەنساۋلىق ساقتاۋ ءمينيسترى الەكسەي تسوي ۆەدومستۆوارالىق مەملەكەتتىك كوميسسيانىڭ جيىنىنان كەيىن تۇسىنىكتەمە بەرمەك.

ەلدە جازدىڭ باسىنان ۆيرۋس جۇقتىرعاندار سانى كۇرت ءوسىپ، وسى اپتانىڭدۇيسەنبىسىندە توقاەۆ ۇكىمەتكە ەلدە «ناۋرىز-مامىرداعىداي» قاتاڭ كارانتين شاراسىن قايتا قولعا الۋدى تاپسىرعان. 29 ماۋسىم كۇنگى كەڭەستە مەملەكەت باسشىسى كوروناۆيرۋس ءورشىپ كەتكەنىن مويىنداپ، قالا، ءوڭىر اكىمدەرى مەن مينيسترلەرگە ەسكەرتۋ جاساپ، سوگىس بەرگەن.

كۇنى كەشە، ماۋسىم ايىنىڭ سوڭعى كۇنىندە جۋىردا عانا تاعايىندالعان دەنساۋلىق ساقتاۋ ءمينيسترى الەكسەي تسوي ەلدە جارتى ايدان-ءتورت اپتاعا دەيىن قاتاڭ كارانتين جاريالاۋدى ۇسىندى. جاڭا ءمينيستردىڭ بولجامىنا قاراعاندا، ءبىر ايلىق كارانتين ەنگىزىلگەن جاعدايدا جازدىڭ سوڭىنا قاراي ەڭ «ءتاۋىر ستسەناري» بويىنشا تاۋلىگىنە 2,5 مىڭ ادامداي تىركەلۋى ىقتيمال. ول ەگەر كارانتين قايتا بولماسا، تامىز ايىنىڭ اقىرىندا «ەلدە كۇنىنە 27 مىڭ ادام ۆيرۋس جۇقتىراتىنىن» ايتىپ دابىل قاققان.

13 ناۋرىزدان بەرى قازاقستاندا ۆيرۋس جۇقتىرعانداردىڭ سانى 41 مىڭنان، ال COVID-19 ينفەكتسياسىنىڭ تۋرا-جاناما اسەرىنەن قايتىس بولعان قۇرباندار سانى 200-دەن اسقان.

"The Qazaq Times"