بۇگىن قازمەديا ورتالىعىنىڭ كۇزەت ءبولىمىنىڭ قىزمەتكەرلەرى ۆلاست باسىلىمىنىڭ استانالىق بيۋروسىنىڭ جەتەكشىسى تامارا ءۆاالدى قورشاپ الىپ، قولىن قايىرىپ دوق كورسەتكەن.

Vlast.kz ينتەرنەت-جۋرنالىنىڭ حابارلاۋىنشا، قازمەديا ورتالىعىنداعى ورتالىق كوممۋنيكاتسيالار قىزمەتىندە وتكەن كەزەكتى بريفينگتەن سوڭ ۆيتسە-پرەمەر رومان سكلياردان پىكىر الماق بولعان ءجۋرناليستى ەكى كۇزەتشى جالما-جان ۇستاپ، قولىن قايىرعان.

«مەن ارىپتەستەرمەن بىرگە بريفينگ بىتكەن بويدا نۇرلان ءجۇماسۇلتانوۆتىڭ «Bek Air»-عا رەسمي قاتىستىلىعى جانە ونىڭ نەلىكتەن اۋەكومپانيا اتىنان مالىمدەمە جاساعانى جايلى رومان سكلياردىڭ پىكىرىن بىلۋگە تىرىستىق. دەگەنمەن پوليتسيا فورماسىنداعى جانە ىسكەرلىك ۇلگىدە كوستيۋم كيگەن ەكى كۇزەتشى بىزگە بوگەت جاسادى. كەدەرگىدەن وتۋگە تىرىسقانىم سول ەكەن، ولار بىردەن شاپ بەرىپ ۇستادى دا، قولىمدى قايىرا باستادى.

بوساپ شىعۋعا ارەكەتتەنىپ جاتقان كەزىمدە، ارىپتەسىم سىتىلىپ ۇلگەرىپ، ۇكىمەت باستىعىنىڭ ورىنباسارىن قۋىپ جەتە ءبىلدى. الگىلەر ارىپتەسىمە قاراي بەرگەندە مەن دە قاشىپ شىقتىم»، – دەيدى باسىلىم ءجۋرناليسى.

سونداي-اق، رەداكتسيا قازمەديا ورتالىعى مەن ورتالىق كوممۋنيكاتسيالار قىزمەتىنىڭ باسشىلىعىنا ءتىلشىنىڭ «قوعامدى ماڭىزدى وقيعا تۋرالى حاباردار ەتۋ» مىندەتىن ەسكە سالىپ، قاجەت دەپ تاپقان سۇراعىن سپيكەرگە تەك رەسمي جيىندا عانا ەمەس، كەز كەلگەن جەردە، سونىڭ ىشىندە قازمەديا عيماراتىنىڭ دالىزىندە دە قويا الاتىنىن ەسكەرتتى.

سونىمەن قاتار باسىلىم قازمەديا ورتالىعىنىڭ قاۋىپسىزدىك-كۇزەت قىزمەتى ءجۋرناليستىڭ كاسىبي مىندەتىنە فيزيكالىق تۇردە كەدەرگى كەلتىرۋىن «جول بەرۋگە بولمايتىن» ءادىس دەپ سانايدى. جانە رەداكتسيا ءوز مالىمدەمەسىندە ەلىمىزدىڭ مەدياحابى اتانۋدى كوزدەيتىن ورتالىق باسشىلىعى ءجابىر كورگەن جۋرناليستەن كەشىرىم سۇراۋىن، ءارى كۇزەت قىزمەتىنىڭ قولدانۋعا بولاتىن امال-ارەكەتىنىڭ نۇسقاۋلىعى تۋرالى تولىق اقپار بەرۋىن تالاپ ەتكەن.

جالپى قازاقستاندا جۋرناليستەردىڭ كاسىبي قىزمەتىنە قاتىستى قىسىم ءجيى جاسالادى. بىلتىر ساياسي وزگەرىستەر كەزىندە كوپتەگەن ميتينگ-جيىنداردا تىلشىلەردىڭ ءتۇسىرىلىم-ەفير جۇمىسىنا ءارتۇرلى ادىسپەن كەدەرگى كەلتىرگەن. كامەرا كوزىن گازەت قاعازىمەن، قاپ-قارا قولشاتىرمەن كولەگەيلەۋ ارەكەتى دە كوپ كەزدەستى. ءتىپتى جازدا ازاتتىق، الماتى.تۆ جۋرناليستەرى مەن وپەراتورىنا جۇرت اۋزىندا «ىشكى ساياساتتىڭ جانسىزدارى» دەلىنەتىن «تەتۋشكالار» توبى تاپ بەرىپ، شابۋىل جاساعان ەدى. قازىر كامەرا-ميكرافوندى سىندىرىپ، تىلشىگە تۇرا ۇمتىلعان «مەملەكەتشىل ايەلدەرگە» قاتىستى قىلمىستىق ءىستىڭ ءىزى تۇگىل، دەرەگى دە جوق.

ماۋسىمدا بولعان پرەزيدەنتتى سايلاۋ وقيعاسىنان كەيىنگى سانكتسيالانباعان شەرۋلەردىڭ بىرىندە Tengrinews.kz ءتىلشىسىن ارنايى جاساق سوزگە كەلمەستەن كۇش كورسەتىپ، سوققىعا جىققانى كوپتىڭ ەسىندە بولسا كەرەك.

تاعى ءبىر «ىلگەك» ماسەلە، وتاندىق باق-تىڭ «باسقاشا ويلاتىن» ماماندارىنا قارسى قك-ءتىڭ «جالا جابۋ» جانە «قورلاۋ» باپتارىن تاڭۋ تەحنيكاسى ءجيى قولدانىلادى. كۇنى كەشە عانا الەۋمەتتىك جەلىدەگى جازباسى ءۇشىن 27 ايعا سوتتالىپ، ناقاقتان ناقاق ءتورت اي تۇرمەدە وتىرعان ءوڭىر (تۇركىستان وبلىسى، سارىاعاش اۋدانى) ءجۋرناليسى امانگەلدى باتىربەكوۆ حالىقارالىق ادام قۇقىقتارى ۇيىمدارىنىڭ قايتا-قايتا ارالاسۋىمەن وبلىستىق سوت ۇكىمىمەن اقتالدى. سونداي-اق، جۋىردا تىكەلەي ەفيردە ساراپشىنىڭ سىلتەمەلى سوزىنە بولا سوتقا شاقىرىلعان قوعام بەلسەندىسى، جۋرناليست ساۋلە ابىلداحانقىزىنىڭ ۇستىنەن ارىزدانعان بەلگىلى كاسىپكەر ارمان شوراەۆتىڭ 10 ميلليون تەڭگە وتەماقى تۋرالى تالابى قاراۋسىز قالعان بولاتىن.

RSF حالىقارالىق ۇيىمىنىڭ رەيتينگىسىندە قازاقستان ءسوز بوستاندىعى  بويىنشا 180 ەلدىڭ ىشىندە 158-ورىندا تۇر. سونداي-اق «ءادىل ءسوز» ءسوز بوستاندىعىن قورعاۋدىڭ حالىقارالىق قورىنىڭ ەسەبىنشە، «جۋرناليستەردىڭ زاڭدى كاسىبي قىزمەتىنە كەدەرگى جاساۋ» رەەسترىندە ءححى عاسىر باستالعالى بەرى، 2000 جىلدىڭ قاڭتارى-2019 جىلدىڭ قىركۇيەگى ارالىعىندا تىلشىلەر جۇمىسىنا 839 كەدەرگى كەلتىرۋ فاكتىسى تىركەلگەن.

"The Qazaq Times"