ساۋد-ارابياسى ايەل قۇقىعىنا اراشا تۇسۋشىلەرمەن كۇرەسۋدە

ساۋد-ارابياسىندا ايەل قۇقىعى ءۇشىن كۇرەسۋشىلەردى تۇتقىنداۋ ءىسى جالعاسۋدا. رامازان ايىنىڭ باسىنان بەرى ون ادام قاماۋعا الىندى، دەپ حابارلايدى liberation.fr اقپارات اگەنتتىگى.

ۇستالعانداردىڭ اراسىندا ساۋديالىق وپپوزيتسيونەرلەردىڭ قۇقىقتارىن قورعاۋشى ادۆوكات يبراگيم ءال-مۋدايمي مەن ايەلدەردىڭ قۇقىعى ءۇشىن كۇرەسۋشى بەلسەندىلەر — لۋدجاين ءال-ءحاسلۇل مەن ءازيزا ءال-يۋسۋف بار. بۇلاردىڭ بارلىعى بۇدان بۇرىن دا وسىنداي بەلسەندىلىكتەرى ءۇشىن تۇتقىندالعاندار. حالىقارالىق راحىمشىلىق ۇيىمى (Amnesty International) وكىلدەرىنىڭ پايىمداۋلارىنشا، وسى تۇتقىنداۋ شارالارىنا ۇستىمىزدەگى جىلدىڭ ماۋسىم ايىنان باستاپ ايەلدەردىڭ اۆتوكولىك جۇرگىزۋلەرىنە رۇقسات ەتىلۋى سەبەپ بولعان. ال، ساۋديالىق رەسمي اقپارات قۇرالدارى ايەل قۇقىقتارى ءۇشىن كۇرەسۋشىلەردى «ساتقىن» دەپ اتاپ، «ولار ءدىني قاعيدالاردى اياق استى ەتۋدە» دەپ مالىمدەدى. سونىمەن قاتار، ولار «شەتەلدىك اگەنتتىكتەردىڭ تىڭشىلارى» بولىپ تابىلادى ءارى «سول قىزمەتتەرى ءۇشىن شەتەلدىك ەلشىلىكتەردەن اقشا» الادى دەپ سانايتىندارىن جاريالادى. بيلىكتىڭ بۇل ارەكەتى الەۋمەتتىك جەلىلەردە ۇلكەن داۋ تۋعىزۋدا. ماسەلەن، كەيبىر جەلى قولدانۋشىلارى حانزادا مۇحاممەد بين سالمان جۇرگىزەتىن رەفورما ساياساتتارىنا قاۋىپ توندىرە مە دەگەن ماسەلەدە پىكىر تالاستىرۋدا. كەيبىر بلوگەرلەردىڭ كوبىسى بيلىكتى قولداسا، كەيبىرى قاماۋعا الىنعانداردىڭ دەرەۋ بوساتىلۋىن تالاپ ەتۋدە.

“The Qazaq Times”