كابۋلدا قوناق ۇيگە شابۋىل جاسالدى

اۋعانستاننىڭ استاناسى كابۋلداعى Intercontinental قوناق ۇيىنە قارۋلى توپ تاراپىنان جاسالعان شابۋىل توقتاتىلدى. ىشكى ىستەر مينيسترلىگىنىڭ مالىمەتىنشە، ءۇش شابۋىلشىمەن قاتار، التى قوناق (بىرەۋى - شەتەلدىك) وقيعا ورنىندا  قازا تاپقان. اۋعانستاننىڭ قاۋىپسىزدىك كۇشتەرى عيماراتتى بوساتۋ وپەراتسياسى بارىسىندا 160 ادامدى قۇتقارعان. ونىڭ 41-ءى - شەت ەل ازاماتى، جارالانعاندار - جەتەۋ. جەرگىلىكتى Tolo اقپاراتتىق اگەنتتىگى ءوز ءتىلشىسىنىڭ قوناق ءۇيدىڭ ىشىندە تاعى بىرنەشە ادامنىڭ ءولى دەنەسىن كورگەنى تۋرالى جازىپ، قۇربان بولعاندار سانى رەسمي دەرەكتەردەن ارتىق بولۋى مۇمكىن دەگەن بولجام جاسايدى. بۇل تۋرالى ۆۆس اقپاراتتىق اگەنتتىگى جازدى. 

اۋعانستاننىڭ Kam Air اۋە كومپانياسى قاتارىنداعى شەتەلدىك ازاماتتاردى قوسقاندا، قوناق ۇيدە 42 قىزمەتكەردىڭ بولعانىن، ونىڭ بەسەۋى شابۋىلشىلاردىڭ قولىنان مەرت بولىپ، 18-ءى ىزدەۋدە ەكەنىن جاريالادى. جوعارعى قاباتتاردا تۇراتىن قوناقتار ءوز قاباتتارىندا ءورت باستالعان كەزدە، توسەك جايمالارىنىڭ كومەگىمەن تەرەزەدەن جەرگە تۇسپەك بولعان. وسىنداي جولمەن ءومىرىن ساقتاپ قالماق بولعانداردىڭ ءبىرى مۇحاممەد مۇسا جەرگە قۇلاپ، جاراقات العانىن ايتادى.

Afghan Telecom كومپانياسىنىڭ وڭىرلىك ديرەكتورى ازيز تايەب قارۋلى توپ كىرىپ كەلگەندە سىرتقى ەسىككە قاراي بەتتەپ كەلە جاتقان. بىردەن جاسىرىنىپ ۇلگەرگەن ول، بىرنەشە سەكۋند بۇرىن الاڭسىز تاماق ءىشىپ وتىرعان ادامداردىڭ ءبىر ساتتە ايقايعا باسىپ، جۇگىرگەنىن، بىرەۋلەردىڭ وققا ۇشىپ، قۇلاعانىن ءوز كوزىمەن كورگەنىن ايتادى. ونىڭ حابارلاۋىنشا، قىلمىستىق توپ مۇشەسىنىڭ ءبىرى وزگە سەرىكتەستەرىنە: ء"بىرىڭ دە ءتىرى قالدىرماڭدار! ءبارىن اتىڭدار!" دەگەن بۇيرىق بەرگەن.

اۋعانستاننىڭ قاۋىپسىزدىك كۇشتەرى شەتەلدىك ارىپتەستەرىنىڭ كومەگىمەن قوناق ءۇيدىڭ توبەسىنە تىكۇشاقپەن قونىپ، قۇتقارۋ وپەراتسياسىن تاڭعا دەيىن جۇرگىزدى. ىشكى ىستەر مينيسترلىگى قوناق ءۇيدىڭ قاۋىپسىزدىك قىزمەتى وسىدان ەكى اپتا بۇرىن جەكە كومپانياعا بەرىلگەنىن ايتىپ، شابۋىلشىلاردىڭ عيماراتقا قالاي كىرگەنىن انىقتايتىنىن مالىمدەدى. قوناق ءۇي باسشىسى قارۋلى توپتىڭ اس ءۇي ارقىلى ىشكە ەنگەنىن ايتادى.

اقش-تىڭ كابۋلداعى ەلشىلىگى وقيعا بولاردان بىرنەشە كۇن بۇرىن كەلەسى ماتىندەگى ەسكەرتۋ جازباسىن جاريالاعان بولاتىن: "بىزگە ەكسترەميستىك توپتار كابۋلدىڭ قوناق ۇيلەرىنە قارسى شابۋىل دايىنداپ جاتقانى جونىندە اقپارات ءتۇستى. بۇل قوناق ۇيلەردەن بولەك، شەتەلدىكتەر كوپتەپ جينالاتىن قوعامدىق كولىك، جەرگىلىكتى بازار، نە باسقا دا ورىندار بولۋى مۇمكىن".

Intercontinental قوناق ءۇيى  وسى اتتاس الەمدىك قوناي ۇيلەر جەلىسىنە كىرمەيدى. ول  - ءارتۇرلى باعىتتاعى جيىندار وتكىزىپ،  شەتەلدىك قوناقتاردى قابىلداۋعا ارنالعان مەملەكەتتىك قوناق ءۇي. اتالعان قوناق ۇيگە جاسالعان شابۋىلدى ازىرگە "تاليبان" تەرروريستىك ۇيىمى ءوز موينىنا الىپ وتىر.

“The Qazaq Times”