قازاقستاندا كىتاپ ساتاتىن رەسەيلىك ينتەرنەت دۇكەندەردىڭ سايتتارى بۇعاتتالدى

قر اقپارات جانە كوممۋنيكاتسيالار مينيسترلىگى سوت شەشىمى بويىنشا  كىتاپتار ساتاتىن بىرنەشە رەسەيلىك باسپالار مەن ينتەرنەت-دۇكەندەردىڭ سايتتارىن بۇعاتادى. سەبەبى سايتتار قازاقستاندا تىيىم سالىنعان كىتاپتاردى ساتۋعا قويعان. بۇدان بولەك «ەكسترەميستىك» مازمۇنداعى اقپارات تابىلعانى ءۇشىن Pikabu.ru ويىن-ساۋىق پورتالى دا بۇعاتقا قويىلعان.

تاراعان اقپاراتقا سۇيەنسەك، كىتاپ دۇكەندەرىنىڭ سايتتارىندا 2013 جىلى جەزقازعان مەن ريددەر قالالارىنىڭ سوت شەشىمى بويىنشا ەكستريميستىك باسىلىم رەتىندە تانىلعان "يسلام اقيداسى" كىتابى ورنالاسقان. وسىعان بايلانىستى رەسەيلىك ەكسمو سايتى بۇعاتتالدى. سونداي-اق، استانا سوتى بويىنشا 2009 جىلى شامسۋدين ابۋ ابدۋللا مۋحامماد يبن كايميم ال-جاۋزيانىڭ «ءال-فاۋايد» كىتابىن ساقتاۋعا جانە ساتۋعا تىيىم سالىنعان ەدى. الايدا بۇل كىتاپ تەك  ەكسمو سايتىندا عانا ەمەس، وzon, Labirint.ru جانە Book24.ru ينتەرنەت دۇكەندەرىندە دە ساتىلىمعا قويىلعان ەكەن. وسىعان بايلانىستى وسى سايتتار دا قازاقستاندىقتار ءۇشىن قولجەتىمدى بولىپ وتىرعان جوق. ال Ficbook.net سايتى بولسا  "قاراپايىم ءموبيلدى دەتوناتوردى قالاي جاساۋعا بولادى؟" دەگەن كىتاپ بار بولعانى ءۇشىن بۇعاتتالدى. سەبەبى بۇل قازاقستاندا ەكستريميستىك كىتاپ رەتىندە تانىلعان. وسىلايشا قازىرگى ۋاقىتتا 5 بىردەي رەسەيلىك سايت بۇعاتقا قويىلعان.

ال مينيسترلىكتىڭ مالىمەتىنشە، اتالعان ينتەرنەت رەسۋرستاردىڭ اكىمشىلىگىمەن بايلانىس جاسالىپ جاتىر. ەگەر ولار قازاقستاندا تىيىم سالىنعان كىتاپتاردى سايت بەتتەرىنەن جويعان جاعدايدا، وندا ينتەرنەت رەسۋرستار قايتا قالپىنا كەلەتىن بولادى.