Qazaqstanda koronavirus jwqtırğanı resmi rastalğanımen, basqa aurudıñ sebebinen qaytıs boldı delingen esep jürgiziledi. Ministrlik olardıñ ölimi «basqa dertterden boladı, koronavirus tikeley äser etpeydi» dep sanaydı. 18 mausım 54 jağdayğa, 2 şilde 101-ge, 23 şilde 319-ğa, 11 qırküyek 576-ğa artqanı habarlanğan. DenMin wsınğan 15 qazan küngi resmi derek boyınşa, qwrbandar sanı 672-ke jetken. Ministrlik bwl turalı mälimetti özdiginen twraqtı türde jariyalamaydı. Är apta sayın onlayn brifingter men swrau hattar arqılı ğana aqparat beredi.  

DDSW infekciya jwqtırğandardıñ özge auruların koronavirustan bölek qarastırmay, birge sanaudı wsınıp, köptegen elder birıñğay sanaq jürgizip keledi. Aşıqtıqqa negizgi princip retinde qaraytın batıs elderi bwl indetten köz jwmğandardı sanağanda Düniejüzilik densaulıq saqtau wyımınıñ hattamasına süyenedi. Wyım älem elderine qaytıs bolğan adamnan COVID-19 ülgisi anıqtalsa, basqa qanday auruı barına qaramastan onı koronavirustan qaytqandar tizimen engizudi wsınğan. Tek «ärtürli apattan (jol apatı, oqıs jağday) jäne miokard infarktinen qaytıs bolğandardan koronavirus tabılsa, olardı jalpı esepke qospauğa boladı» degen.

Densaulıq saqtau ministrliginiñ resmi ökili Bağdat Qojahmetov 17 tamızda janama äserden qaytıs bolğandardıñ 68%-ınıñ sebebi retinde qan aynalımı jüyesiniñ auruları ekenin aytqan. Keyinnen qırküyektiñ ortasında bwl aqparat tolıqtırıldı: 576 adamnıñ 52,4%-ı tınısalu organdarınıñ aurularınan, al  29%-ı qan aynalım jüyesi aurularınan qaytqanı belgili boldı. Al sarapşılar pikiri «nauqastar psihika ne oqıs jaraqat-soqqı sebebinen qaytpasa, onda olardıñ deni koronavirustıñ qwrbanı retinde qarastırıluı tiis» degen ortaq arnağa toğısadı.

Baqıt Tümenova, «Aman-saulıq» qoğamdıq qorınıñ prezidenti, KSRO densaulıq saqtau isiniñ üzdigi:

Koronavirus jürek, ökpe, qant diabeti sekildi sozılmalı aurulardı qozıdruı mümkin. Qaytıs bolğanda jüregi toqtap, tromboz boluı ıqtimal. Mümkin koronaviruspen auırmasa, qoldauşı terapiya alıp tiri jüre beruşi edi. Qaytqan adamnıñ diagnozı men ölim sebebinde baylanıs bolatını anıq.

Virus jwqqandıqtan tromb mölşeri wlğayıp, qan wyıp jürek, ökpe ne miğa salmaq saladı. Osınıñ saldarı da äser etpeydi dey almaymız. Pnevmoniya auruın PTR-dıñ barı-joğına qaramastan klinikasına qaray koronavirustıq sipatta qarastıru qajet dep basınan beri aytıp kelemiz.

Serik Twrsın, Şveycariyadağı qazaq därigeri, medicina bilimderi boyınşa oqıtuşı-tälimger:

Qazaq «auruın jasırğan öledi» deydi. Koronvirus turalı statsitikanıñ dwrıs berilmeui tek qazaqstandıqtardı ğana emes, bizdi de oylandıradı. DDSW-nıñ belgilegen kod aqpan ayında naqtılanğan. Al Qazaqstan biligi nege tamızdan bastap engizdi. Bwğan jauap berui kerek. Qaytıs bolğan adamnıñ boyında basqa auruı bolğanına qaramastan, ağzasınan virus tabılsa, birden koronavirus sebebinen dep esepteui tiis. Öytkeni virus angiotenzin konverting receptorı arqılı denege kiredi. Ekinşi türi qan tamırları arqılı boyğa taraydı. Sondıqtan virus barlıq tinge jayılıp, eñ älsiz twsınan wstaydı. Jası ülken adamdardıñ sozılmalı auruın qozdırıp, saldarı ölimge aynalıp jatır. Bwl sözsiz koronavirus statistikasına enui tiis. Jıldıñ basınan bergi barlıq pnevmoniyanı aqökpe dep aydarlap, negizgi esepten böldi. Bwl qate qadam. Mwnı Qıtaydağı twmau mausımında örşigen pnevmoniyanı KT arqılı ajıratatın ğılımi täjiribe däleldedi.

Eskerusiz qalğan 256 mıñ pnevmoniya turalı aytsaq, auruhanalardağı nauqastardıñ jeke tarihın qarau – ministrlik aytqanday auır şarua emes. Därigerler jay dayın esepti ötkizedi. Al onı statistikağa qosu nauqastarmen kontaktige tüspeytin vedomstvo qızmetkerleri. Mwnı aqjağalı şeneunikterdiñ sıltauı dep qana wğuğa boladı.

Mıñjılqı Berdiqojaev, Qazaqstandıq joğarı sanattı neyrohirurg-däriger:

Qaterli isigi ne qan qısımı joğarı adamğa em dwrıs jasalsa, olar ömir süre berer edi. Koronavirustıñ janama äserinen qaytqanı jönindegi derekke tolıq köz jetkizu üşin öte kürdeli  zertteu –saraptama jürgizu kerek. Onı jasap jatatın eşkim joq şığar. Sondıqtan resmi mälimetke senuge mäjbürmiz.

Keybir elder koronavirus basqa aurulardıñ asqınuına sebep boldı dep eseptese, keybir elder öz aldına bölek jürgizedi.

Qayırğali Köneev, nevrolog-däriger, medicina ğılımdarınıñ kandidatı:

Koronavirus infekciyası tromboz tudırğandıqtan joğarıda körsetilgen qayğılı jağdayğa alıp keletini anıq. Köptegen elderde koronavirus jwqqan adamdar oqıs jağdaydan basqa kezdiñ bärinde qwrbandardı indet sebebinen dep qarastırılıp keledi.

Resmi derekke säykes, qazan ayınıñ 20 küninde koronavirus jwqtırğan 1 787 adam anıqtalıp, 69 adam qaytıs bolğan. Däl osı uaqıtta koronavirus pnevmoniyasına 3 232 adam şaldığıp, 33 adam qaytqan. Pnevmoniyadan auırğandardıñ sanı koronavirusqa qarğanda eki ese köp bolğanımen, – qaytıs bolğandar PTR arqılı rastalğan kovidten eki ese az.

13 naurızdan beri COVID-19 infekciyasın jwqtırğandar qatarı 110 mıñğa juıqtap, 1 tamızdan bergi koronavirus pnevmoniyası 36 mıñnan asqan. DDSW mälimetinşe, Qazaqstanda auırğandardıñ sanı 145,5 mıñday. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı jiını virus jwqqandardıñ 2863-i (KVI+ / U07.1 – 1803, KVI- / U07.2 – 388, ilespe aurulardan – 672) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 672 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"