كورەي تۇبەگىندەگى جاڭا جاعدايعا وراي قىتاي اقش-قا ەسكەرتۋ جاسادى

قىتاي سىرتقى ىستەر مينيسترلىگىنىڭ مالىمدەمەشىسى، وسى كەزەكتى ءباسپاسوز ماجىلىسىندە، رەسمي بەيجىڭ تارابىنىڭ اقش-تىڭ وڭتۇستىك كورەياعا ورناتىپ جاتقان «سااد» (Thaad) جۇيەسىنە تۇبەگەيلى قارسى ەكەنىن ءبىلدىردى. بۇل تۋرالى سول ەلدىڭ «شينحۋا» اقپاراتتىق اگەنتتىگى حابارلاپ وتىر.

قىتاي سىرتقى ىستەر مينيسترلىگىنىڭ ءباسپاسوز حاتشىسى گىڭ شۋاڭ (Geng Shuang) مالىمدەمەسىندە: «اقش پەن وڭتۇستىك كورەيانىڭ ورناتقالى جاتقان زىمىرانعا قارسى «سااد» جۇيەسى، سولتۇستىك كورەيانىڭ قاۋىپسىزدىك جاقتاعى الاڭىن كۇشەيتەدى. ءوڭىردىڭ ورنىقسىزدىعىن ارتتىرا تۇسەتىن بولادى. ناتيجەسىندە، تۇبەك جاعدايى تىپتەن شيەلەنىسىپ كەتەدى. ءتىپتى، تۇتاس شىعىس-ازيانىڭ تىنىشتىعى مەن تۇراقتىلىعىن كەرى اسەر جەتكىزەدى. ستراتەگيالىق قاۋىپسىزدىك ماسەلەلەرىنە كەسىرىن تيگىزەدى»، – دەپ ايىپ تاقتى.

"ساد" جۇيەسىنىڭ قامتۋ ايماعى. فوتو: YongHU

قىتاي جاق ءوز ەلىنىڭ ستراتەگيالىق قاۋىپسىزدىك مۇددەلەرىن قورعاۋ جانە ايماقتىڭ شيەلەنىسىن بولدىرماۋ ماقساتىندا، اقش ۇكىمەتىنەن كورەياعا ورناتىلىپ جاتقان «سااد» جۇيەسىن توقتاتىپ، قۇرىلعىلاردى ەلىنە الىپ كەتۋىن تالاپ ەتىپ وتىر. ەگەر ولاي بولماسا قالىپتاسقان جاعدايعا بايلانىستى قىتاي ءوز شارالارىن جۇزەگە اسىراتىنىن ايتىپ ەسكەرتۋ جاسادى.

The Qazaq Times