ەردوعان يسلامشىل، اۆتوريتارلى مەملەكەت قۇرۋ ءۇشىن توڭكەرىس ۇيىمداستىردى (ۆيدەو)

اقش-تىڭ الدىڭعى قاتارلى گازەتتەرىنىڭ ءبىرى Wall Street Journal (WSJ) توڭكەرىس جاساۋعا ارەكەتتى پرەزيدەنت تايىپ ەردوعاننىڭ يسلامشىل، اۆتوريتارلى مەملەكەت قۇرۋ ءۇشىن ءوزى ۇيىمداستىرعانىن العا تارتتى. 

گازەتتىڭ 17 ءساۋىر كۇنى جاريالانعان باس ماقالاسىندا رەفەرەندۋمنىڭ ەردوعاننىڭ جوسپارلاعانىنداي جۇرمەي جاتقانى ايتىلىپ، «يسلامشىل ديكتاتور حالىقتان ءىرى قولداۋ كۇتتى، الايدا جەڭىسىنە داق كەلتىرگەن زاڭ بۇزۋشىلىقتارمەن ءسال عانا ايىرماشىلىقپەن باسىم ءتۇستى. ناتيجە تۇرىك قوعامىنىڭ بارعان سايىن پولياريزاتسيالانىپ، تۇراقسىزدىق ورىن الاتىندىعىن اڭداتۋدا» دەدى.

«ەردوعان 2034 جىلعا دەيىن بيلىكتە بولۋى مۇمكىن»

رەفەرەندۋمدا ەردوعاننىڭ ستامبۋل مەن انكارا سەكىلدى تۇركيانىڭ ەڭ ءىرى قالالارىندا جەتكىلىكتى داۋىس جيناي الماعانىن ايتقان WSJ جوعارعى سايلاۋ كوميسسياسىنىڭ (YSK) «سوڭعى مينۋتتا ءمورسىز كونۆەرتتەردى جارامدى ساناۋعا شەشىم قابىلداعانىن دا ەسكە سالىپ، 2.5 ميلليون داۋىستىڭ جارامدىلىعىنا سىزات تۇسكەنىنە نازار اۋداردى.

ەردوعاننىڭ «تۇرىك كوكتەمىنە جول بەرمەگەنىن قورعاعان گازەت «ەردوعان پرەزيدەنتتىك بيلىك ارقىلى ۋىسىنا كوپ كۇش جينايدى. رەفەرەندۋم 63 جاسار پرەزيدەنتتىڭ بيلىگىن 2029 جىلعا  دەيىن، مۇمكىن 2034 كە دەيىن سوزۋى مۇمكىن» دەدى.

«باتىسپەن قاتىناس شيەلەنىسە تۇسەدى»

رەفەرەندۋم ناتيجەسى تۇركيانىڭ باتىسپەن قاتىناسىن شيەلەنىستىرەتىنىن ءارى اقش-تىڭ تۇركيامەن ىنتىماقتاستىقتى ۇزبەۋى كەرەكتىگىنە كەڭەس بەرگەن  WSJ ماقالانى «ەردوعان يسلامشىل اۆتوريتارلى مەملەكەت قۇرۋ ءۇشىن دەموكراتيالىق رىچاگتى جامان جاعىنا بۇرىپ، ەل ىشىندە توڭكەرىس ۇيىمداستىردى» دەگەن سوزبەن اياقتادى.

سەرىك ماكەن

The Qazaq Times