انتالياداعى كەزدەسۋ: كەلىسسوزدەن ناتيجە شىقپادى، تۇركيانىڭ ءۇمىتى سەلگە كەتتى

رەسەي ۋكرايناعا اسكەري شابۋىلىن باستاعاننان بەرى العاش رەت وتكەن ەكى ەل ءسىم باسشىلارىنىڭ كەزدەسۋى تاعى دا ناتيجەسىز اياقتالدى. كەزدەسۋ كەشە، 10 ناۋرىزدا انكارانىڭ ارا اعايىندىعىمەن تۇركيانىڭ انتاليا قالاسىندا وتكەن بولاتىن.

كەزدەسۋ ءبىر جارىم ساعاتقا سوزىلعان. كەلىسسوزدەن كەيىنگى مالىمدەمەسىندە ۋكراينا سىرتقى ىستەر ءمينيسترى كۋلەبا رەسەيلىك ارىپتەسى لاۆروۆپەن 24 ساعاتقا اتىستى توقتاتۋ بويىنشا ديالوگ جۇرگىزگەنىن، بىراق ەشقانداي ناتيجە بولماعانىن ايتتى. ول لاۆروۆتى كەلىسسوز ۇستەلىنە «ءداستۇرلى ريتوريكامەن كەلدى» دەپ ايىپتاي كەلە: «ءبىز اتىستى توقتاتۋدى دا تالقىلادىق، بىراق بۇل ماسەلەدە ىلگەرىلەۋشىلىك بولعان جوق»، – دەدى.

كۋلەبا ءباسپاسوز مالىمدەمەسى كەزىندە ۋكراينانىڭ قازىر دە، بولاشاقتا دا بەرىلمەيتىنىن، كۇرەستى توقتاتپايتىنىن ايتتى.

ال، رەسەي ءسىم جەتەكشىسى سەرگەي لاۆروۆ سوزىندە ماسكەۋدىڭ كەلىسسوزدەردى جالعاستىرۋعا دايىن دەپ ءبىلدىردى، ءارى پرەزيدەنت پۋتين ۋكراينا پرەزيدەنتى زەلەنسكيمەن «ناقتى ماسەلەلەردى تالقىلاۋدان» باس تارتپايتىنىن جەتكىزدى.

انتالياداعى كەزدەسۋ. فوتو: AP

انتالياداعى كەزدەسۋ وتۋدەن بۇرىن دا تاراپتاردىڭ ناقتى كەلىسىمدەرگە كەلۋى بويىنشا ءۇمىت از بولدى. پرەزيدەنت زەلەنسكي بولسا ءالى دە رەسەيلىك ارىپتەسىن بەتپە-بەت كەزدەسۋگە شاقىرىپ كەلەدى. ول تۇركياداعى كەلىسسوزدەن بۇرىن جاساعان مالىمدەمەسىندە: «ءبىز بۇل سوعىستى ەكى ەلدىڭ پرەزيدەنتتەرى تىكەلەي سويلەسكەندە عانا اياقتاي الامىز»، – دەگەن بولاتىن.

وسى اپتانىڭ باس شەنىندە كەزدەسۋ تۋرالى مالىمدەي وتىرىپ تۇركيا سىرتقى ىستەر ءمينيسترى چاۆۋشوعلۋ ونى «بۇرىلىس نۇكتەسى، بەيبىتشىلىك پەن تۇراقتىلىققا باعىتتالعان ماڭىزدى قادام» بولادى دەپ ۇمىتتەنەتىنىن ايتىپ ەدى. سونداي-اق، بۇل كەزدەسۋدە «تۇراقتى اتىستى توقتاتۋدىڭ ەسىگىن قاعىلادى» دەپ كۇتكەنىن دە جەتكىزگەن. ەندى كەلىسسوز ناتيجەسىنە قاراي وتىرىپ، بۇل ۇمىتتەردىڭ اقتالماعانى كورىنەدى.

The Qazaq Times