الماتى قالاسىنىڭ اكىمدىگى قۇقىق قورعاۋشىلارعا بەيبىت جيىن وتكىزۋگە تاعى دا رۇقسات بەرمەدى. پرەزيدەنت توقاەۆتىڭ «ەش رۇقساتتىڭ كەرەگى جوق»، ميتينگ ۇيىمداستىرۋ ءتارتىبى بويىنشا جەرگىلىكتى بيلىكتى قۇلاقتاندىرۋ جەتكىلىكتى دەگەن ۋاجىنە قاراماستان، «ار. رۋح. حاق» قوعامدىق قورىنىڭ كەزەكتى ءوتىنىشى قاناعاتتاندىرىلماعان.
سەيسەنبى، 16 قاراشادا «ار. رۋح. حاق» قوعامدىق قورىنىڭ جەتەكشىسى، قۇقىق قورعاۋشى باقىتجان تورەعوجينا Facebook جەلىسىندەگى جەكە پاراقشاسىندا اكىمدىكتىڭ مونتاج-جوندەۋ جۇمىستارىن العا تارتىپ، رۇقسات بەرۋدەن باس تارتىلعانىن جازدى. رەسمي جاۋاپقا قالالىق قوعامدىق دامۋ باسقارماسى جەتەكشىسىنىڭ ورىنباسارى ا.ەسەنبەكوۆ قول قويعان.
باقىتجان تورەعوجينانىڭ ايتۋىنشا، اكىمدىكتەگىلەر ولارعا 11 جەلتوقساننىڭ ورنىنا 27 قاراشادا ميتينگ وتكىزۋدى ۇسىنعان. قۇقىق قورعاۋشىلار باس تارتقان. بۇعان دەيىن ولار شەرۋ وتكىزۋگە رۇقسات بەرمەگەن اكىمدىكتى سوتقا بەرگەن ەدى. العاشقى وتىرىس 17 قاراشادا ءوتۋى ءتيىس.
«يلليۋزياعا بەرىلمەيمىز، شەشىمدى سوتقا بەرىپ، قاۋلىسىن العاننان كەيىن بۇل ەلدە زاڭ دا، قيسىن دا، كونستيتۋتسيا دا، پرەزيدەنت ءسوزىنىڭ دە سالماعى جوق. ادام قۇقىعىن ەشكىم ساقتىعىسى كەلمەيدى» دەپ جازدى قۇقىق قورعاۋشى (ازاتتىق راديوسىنىڭ اۋدارما نۇسقاسىندا بەرىلدى).
ءوتىنىم بەرۋشىلەر كەزەكتى تىيىمعا بايلانىستى تاعى دا سوتقا شاعىم تۇسىرەتىنىن ايتتى. وسىمەن اكىمدىك ءبىر ايعا جۋىق ىشىندە قۇقىق قورعاۋشى باقىتجان تورەعوجينا مەن Liberty قورىنىڭ جەتەكشىسى عالىم اعەلەۋوۆكە شەرۋ وتكىزۋگە ەكىنشى رەت رۇقسات بەرمەي وتىر. ولار سوڭعى رەت 8 قاراشادا حات تاپسىرىپ، 11 جەلتوقساندا ماحاتما گاندي الاڭىنان باستاپ، شەۆچەنكو كوشەسىنىڭ بويىمەن ءجۇرىپ، شوقان ءۋاليحانوۆ الاڭىنا دەيىن 4 ساعات شەرۋ وتكىزەتىنىن حابارلاعان. ميتينگ تاقىرىبىن «بارلىعىنىڭ قۇقىقتارى مەن ەركىندىگى ساقتالسىن!»، «ديسكريميناتسياعا جول جوق!» دەپ كورسەتكەن.
قازاقستاندا بيلىكشىل تاراپتار «ساياسي رەفورمانىڭ كورىنىسى» رەتىندە ءجيى ماقتايتىن ميتينگ تۋرالى زاڭ بىلتىر كوكتەمدە پاندەميانىڭ الاساپىران كەزىندە اسىعىس قابىلدانعان. پرەزيدەنت توقاەۆ «ميتينگ وتكىزۋ ايتارلىقتاي جەڭىلدەدى» دەگەنىمەن، جەرگىلىكتى بيلىكتەر بەلسەندىلەردىڭ كوپ ءوتىنىشىن ورىنداماي، ءتۇرلى سەبەپتى سىلتاۋراتىپ، رۇقسات بەرمەيدى. ال مۇنداي سانكتسيالانباعان جيىندارعا كەلگەندەر ادەتتە ۇستالىپ، اكىمشىلىك جاۋاپقا تارتىلادى. حالىقارالىق قۇقىق قورعاۋ ۇيىمدارى قازاقستان بيلىگىن پاندەميانى ءوز ىڭعايىنا قولدانىپ، ادام قۇقىعىن شەكتەۋگە كوشكەنىن قاتتى سىناپ، ادام حاقى دەكلاراتسياسىنداعى مىندەتتەردى ورىنداۋعا شاقىرعان.
ءبىز رەسەيدىڭ گۋبەرنياسى ەمەسپىز! سوۆەت تۋىن جۇلىپ العانى ءۇشىن قامالعان ازامات شىقتى
شوقپار اۋىلىنداعى ۋران قاتەرى. اكىم جوققا شىعارادى. تۇرعىندار رادياتسيا دەپ ۇرەيلەنەدى
قاندى قاڭتار سوتى. بەس جىلعا سوتتالعان ارتىقباەۆ ەشقانداي دالەل جوق دەپ ۇكىممەن كەلىسپەيدى
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى