بايدەن مەن شي اراسىنداعى كەزدەسۋ. 6 جىل بۇرىن. فوتو: Financial Times

ۋاشينگتون ۋاقىتىمەن دۇيسەنبىنىڭ كەشىندە، اقش پرەزيدەنتى جو بايدەن مەن قىتاي باسشىسى شي جينپيڭ ونلاين فورماتتا بەتپە-بەت كەزدەسەدى. بۇل ۆيرتۋالدى جۇزدەسۋدە قاتاڭ باسەكەلەستىك قارىم-قاتىناسىنداعى اقش پەن قىتايدىڭ باسەلەستىك ارەكەتتەرىنىڭ شارتتارى تالقىلانباق. بىراق، كوپتەگەن ساراپشىلار بۇل كەزدەسۋدە بەيجىڭ مەن ۋاشينگتون اراسىنداعى كەلىسپەۋشىلىكتەر شەشىلىپ كەتپەيدى دەپ سانايدى.

اقش رەسميلەرى دە كەزەكتى ونلاين سويلەسۋدە شيەلەنىستەردىڭ شەشىلۋىنەن ءۇمىتى از. ونى وتكەن اپتا سوڭىنداعى اق ءۇيدىڭ رەسمي مالىمدەمەسىنەن دە اڭعارۋعا بولادى. اق ءۇيدىڭ رەسمي وكىلى شاكي جۇما كۇنگى مالىمدەمەسىندە: «ليدەرلەر تەك ەكى ەل اراسىنداعى باسەكەلەستىكتى جاۋاپكەرشىلىكپەن باسقارۋ جولدارىن جانە سايكەس مۇددەلەر كەزىندە ىنتىماقتاستىق جاساۋ جولدارىن تالقىلايدى»، – دەدى. ونىڭ ايتۋىنشا سويلەسۋ بارىسىندا بايدەن اقش-تىڭ ماقسات-تىلەگىن، باسىمدىقتارى مەن مۇددەسىن انىقتاي ايتىپ، قىتاعا قاتىستى الاڭداۋشىلىقتارىن اشىق ورتاعا سالماق.

جاڭا دەرجاۆا رەتىندە قىتاي ءوزىنىڭ الەمدەگى ەكونوميكالىق، اسكەري جانە ساياسي ىقپالىن بارعان سايىن كەڭەيتۋدى كوزدەپ كەلەدى. ال، اقش بولسا قىتايدى ءوزىنىڭ باستى ستراتەگيالىق قارسىلاسى رەتىندە قاراستىرادى. وسىنداي باسەكەلەستىك قاتىناستان كەلىپ شىققان قايشىلىقتار ەكى ەل قارىم-قاتىناسىن كۇردەلى دەڭگەيگە كوتەردى. ەل ليدەرلەرى بەت جىلتىسىپ، اشىق سويلەسپەسە ەندىگى قايشىلىق تەكە-تىرەسكە، ونىڭ ارى جاعى قاقتىعىس قاۋپىنە باستاۋى دا بەك مۇمكىن. سوندىقتان ونلاين كەزدەسۋ الدىندا تاراپتار ءبىر-بىرىنە دەگەن كەيبىر قاتاڭ مامىلەلەرىن كەيىنگە سيىرىپ، سوزدەرىن جۇمساتتى.

ۋاشينگتون مەن بەيجىڭنىڭ ءبىر-بىرىنە ءسال دە بولسا جول بەرىسكەنى گلازگوداعى ءسامميتتىڭ سوڭعى كۇندەرىندە كورىنە باستادى. كۇتپەگەن جەرلەن ەكى ەل زياندى گاز شىعارىندىلارىن ازايتۋ، وسىعان ۇقساس كليمات ماسەلەلەرىندە تۇراقتى ىنتىماقتاستىققا كۇش سالاتىندارىن ءبىلدىرىستى. سويتەتىن دە ءجونى بار، قىتاي مەن اقش الەمدە اتموسفەراعا كومىرقىشقىل گازىن ەڭ كوپ شىعاراتن ەل سانالادى.

ال، ءبىزدىڭ ۋاقىتپەن ەرتەڭ تاڭ سارىدە بولاتىن ونلاين سامميت تۋرالى ساراپشىلار پىكىرى الۋان ءتۇرلى. سونىڭ ءبىر پاراسى، بايدەن مەن شي تۇراقتىلىققا، ىنتىماقتاستىققا ۇمتىلۋعا دا، قاجەت بولسا باسەكەلەستىك پەن تەكە-تىرەس قاتىناسقا وتۋگە دە دايىن تۇرعانىن ايتادى.

قالاي بولساسىن بەيجىڭ مەن ۋاشينگتون ورتاسىنداعى باسەكەلەستىك قاتىناس ۇزاق ۋاقىتقا جالعاسارى انىق. بۇنىڭ قاتارىندا گونكونگ پەن شىڭجاڭداعى ادام قۇقىعىنا قاتىستى قايشىلىقتار، ساۋدا سوعىسى، كەمە قاتىناسى ەركىندىگى جانە بەيجىڭنىڭ وڭتۇستىك قىتاي تەڭىزى مەن تايۋان بۇعازىنداعى اسكەري كۇشتەرىن ارتتىرۋ سياقتى ماسەلەلەر جاقىن ارادا شەشىم تابا قويماق ەمەس.

The Qazaq Times