اقش پرەزيدەنتى جوۋ بايدەن قۇراما شتاتتار تايۋاندى (تايۆاندى) قورعاۋعا كومەكتەسەدى دەپ مالىمدەدى. وسىلايشا ۋاششينگتون بەيجىڭمەن شيەلەنىستىڭ ۋشىعىپ تۇرعانىنا قاراماستان قىتاي ءوزىنىڭ تەرريتورياسى دەپ سانايتىن ارالدى ەلدى قورعاۋعا ۋادە بەردى.
اقش پرەزيدەنتى جوۋ بايدەن CNN ارناسىنىڭ قويعان «ەگەر تايۋان قىتايدىڭ شابۋىلىنا تاپ بولسا، اقش تايۋاندى قورعاۋعا كومەكتەسە مە؟» دەگەن سۇراعىنا «ءبىز بۇعان مىندەتتىمىز» دەپ جاۋاپ بەرگەن.
«رەيتەردىڭ» بۇل تۋرالى حابارىندا، بايدەننىڭ ءسوزى اقش-تىڭ رەسمي سىرتقى ساياساتىنان اۋىتقىپ كەتتى دەپ باعالاعان. ولاي دەيتىنى، بۇعان دەيىن اقش-تايۋان قاتىناسى كونگرەسس قابىلداعان «تايۋانمەن قارىم-قاتىناس تۋرالى» زاڭعا سايكەس تەك قورعانىس قارۋلارىن ساتىپ بەرۋ، كەيبىر قورعانىس تاجىريبەلەرىمەن الماسۋ سەكىلدى شارالاردا جۇرگىزىپ كەلدى. ال، قىتاي تايۋانعا قارۋلى كۇش قولدانسا اقش-تىڭ قاي تۇرعىدا بولاتىنى ۇزاق ۋاقىتتان بەرى بەيمالىم ءارى ءتۇرلى بولجامدى كۇيدە بولىپ كەلگەن.
قازىر اقش پەن قىتاي اراسىنداعى ءتۇبىرلى قايشىلىق دەرجاۆالاردىڭ جاھاندىق كوشباسشىلىققا دەگەن باسەكەسى بولعانىمەن، ەكى دەرجاۆا ءۇشىن دە ماڭىزدى ءۇندى-تىنىق مۇحيت ايماعىنداعى مۇددەلەردىڭ قايشىلىعى بارىنەن باسىمىراق. بۇل تۇرعىدا تايۋان اقش ءۇشىن دەموكراتيانىڭ سوڭعى شەكاراسى، ال بەيجىڭ ءۇشىن ۇلتتىق مۇددەسىنىڭ باستى نىساناسى بولىپ وتىر. سوندىقتان دا تايۋان تاقىرىپ اقش-قىتاي قاتىناسىندا اسا ماڭىزدى مانگە يە.
