پاكىستان ءسىم باسشىسى قىتايلىق جۇمىسشىلارعا جانكەشتى شابۋىل جاساعانىن راستادى

شىلدەدە پاكىستانداعى سۋ بوگەتى قۇرىلىسىندا جۇمىس ىستەپ جاتقان قىتايلىق 9 جۇمىسشى اۆتوبۋس جارىلىسىنان قازا تاپقان بولاتىن. قىتاي تارابى پاكىستاندى وقيعانىڭ ءمان-جايىن تولىق انىقتاۋعا شاقىرعان. كەشە، 12 تامىز پاكىستان سىرتقى ىستەر ءمينيسترى شاح مەحمۋد كۋرەشي جارىلىستى ماقساتتى جانكەشتى شابۋىلى دەپ مالىمدەدى.

پاكىستان ءسىم جەتەكشىسى كۋرەشي Reuters اگەنتتىگىنە جارىلىسقا قاتىستى مالىمەتتەر بەرگەن. ول مالىمەتىندە تەرگەۋ ناتيجەلەرىنە سايكەس شابۋىلدا ءۇندىستان ۇكىمەت كابينەتى حاتشىلىعىنىڭ زەرتتەۋ جانە تالداۋ ءبولىمى (RAW) مەن اۋعانستان ۇلتتىق قاۋىپسىزدىك اگەنتتىگىنىڭ ىزدەرى بار دەپ كورسەتكەن. بۇندا اتاپ وتىرعان ءۇندىستان ۇكىمەت كابينەتى حاتشىلىعىنىڭ زەرتتەۋ جانە تالداۋ ءبولىمى ءۇندىستاننىڭ سىرتقى بارلاۋ اگەنتتىگى سانالادى.

دەگەنمەن، Reuters-ءتىڭ بۇل تۋرالى حابارىندا كۋرەشيدىڭ ءۇندىستان مەن اۋعانستان ارنايى قىزمەتىنە قاتىستى ناقتى دەرەكتەردى كورسەتپەگەنىن ايتادى. سوعان قوسا ءۇندىستان مەن اۋعانستاننىڭ بۇل مالىمدەمەگە قاتىستى رەاكتسياسى تۋرالى دا مالىمەت بەرىلمەگەن.

پاكىستانداعى اۆتوبۋس جارىلىسى 14 شىلدەدە بولعان ەدى. وندا كوحيستانداعى سۋ بوگەتى قۇرىلىسىندا جۇمىس ىستەپ جاتقان قىتايلىق ينجەنەرلەر وتىرعان اۆتوبۋستا جارىلىس بولىپ جالپى 13 ادامنىڭ ولىمىنە سەبەپ بولعان، قازا بولعانداردىڭ 9-ى قىتاي ازاماتى.

پاكىستان پوليتسياسى الدىمەن جارىلىستى اۆتوبۋستىڭ تەحنيكالىق اقاۋلارىنان بولۋى مۇمكىن دەگەن. الايدا، كەيىن وقيعا ورنىنان جارىلعىش زاتتاردىڭ قالدىقتارىن تاپقان بولاتىن. پاكىستان جاعى سول كەزدە دە جارىلىستىڭ تەراكت بولۋ مۇمكىندىگىن دە جوققا شىعارماعان ەدى.

ال، قىتاي جاعى بۇل وقيعانى بىردەن «تەراكت» دەپ باعالادى، ءارى پاكىستان ۇكىمەتىن كىنالىلەردى جاۋاپقا تارتۋعا شاقىردى. ءتىپتى، جارىلىستان 3 كۇن وتكەننەن كەيىن 15 ادامنان تۇراتىن زەرتتەۋ توبىن پاكىستانداعى جارىلىس بولعان جەرگە جىبەرگەن.

ايتا كەتۋ كەرەك، كوحيستانداعى گيدروەلەكتر ستانتسياسى قىتاي مەن پاكىستان اراسىنداعى ەكونوميكالىق ءدالىز جوباسىنىڭ ءبىر بولىگى سانالادى. ال، جالپى قۇنى 65 ملرد اقش دوللارى تۇراتىن قىتاي-پاكىستان ەكونوميكالىق ءدالىزى قازىرگى قىتاي باسشىسى العا تارتقان «ءبىر بەلدەۋ، ءبىر جول» ستراتەگيالىق جوباسىنىڭ ماڭىزدى تارماعى. بۇل ەكونوميكالىق ءدالىز قىتايدىڭ ستراتەگيالىق دامۋ جوسپارىندا اسا ماڭىزعا يە. ەگەر اقش پەن ونىڭ ءۇندى جانە تىنىق مۇحيتتاعى وداقتاس، سەرىكتەرى قىتايدى وسى تەڭىز جولدارىنان شەكتەيتىن بولسا، بەيجىڭ شىڭجاڭ شەكاراسىنان بىردەن پارسى شىعاناعىنا جاقىن تەڭىزگە شىعىپ كەتۋدىڭ اسا قاجەتتى ءدالىزىن پاكىستان ارقىلى جۇزەگە اسىرا الادى.

سوندىقتان دا، قىتاي مەن ونىڭ ماڭىزدى ستراتەگيالىق وداقتاسى سانالاتىن پاكىستان ءۇشىن بىرلەسكەن جوبالاردىڭ قاۋىپسىزدىگى مەن اقاۋسىزدىعى اسا جوعارى مانگە يە. ال، 14 شىلدەدەگى جارىلىس پاكىستانداعى قىتايمەن بىرلەسكەن جوبالارعا نەمەسە قىتاي ازاماتتارىنا جاسالعان العاشقى شابۋىل ەمەس. بۇعان دەيىن دە بەلۋجيستان، كاراچي جەرلەرىندە دە وسىعان ۇقساس شابۋىلدار بولعان.

الايدا، پاكىستان ءسىم جەتەكشىسىنىڭ مالىمدەمەسىنە قاراماستان، اۋعانستان مەن ءۇندىستان تارابى شابۋىلعا قاتىستى مالىمدەمە جاسامادى. ەشبىر تەررورلىق ۇيىم دا شابۋىلدى ءوز موينىنا العان جوق.

The Qazaq Times