بۇگىنگە دەيىن الەم بويىنشا 193 ميلليون ادام كوروناۆيرۋس جۇقتىرعان. وسىعان بايلانىستى جەر-جەردە كارانتين قاتاڭداتىلىپ، ۆاكتسيناتسيالاۋ قارقىنى ارتتى. بۇعان نارازى ەۋروپا حالقى ميتينگكە شىقسا، برازيليادا شەرۋشىلەر «پاندەمياعا توتەپ بەرە الماعان» ۇكىمەتتىڭ وتستاۆكاسىن تالاپ ەتتى.

قازىر ءولىم-ءجىتىم كورسەتكىشى مەن ناۋقاس سانى بويىنشا اقش، لاتىن امەريكاسى ەلدەرى جانە رەسەي انتيرەكورد تىزىمىندە. امەريكادا كوروناۆيرۋسپەن اۋىرعانداردىڭ سانى تاۋلىگىنە 45 مىڭنان اسقان بۇل وتكەن اپتامەن سالىستىرعاندا 65%-عا جوعارى كورسەتكىش. اۋرۋحاناعا تۇسكەندەردىڭ سانى دا ارتقان. ال ۆاكتسينالاۋ قارقىنى قاڭتاردان بەرگى ەڭ تومەنگى كورسەتكىشكە جەتتى.

اۋستراليا بيلىگى سيدنەي قالاسى مەن وعان قاراستى وكرۋگتەگى ىندەتتىڭ ءورشۋىن «ۇلتتىق دەڭگەيدەگى توتەنشە جاعداي» دەپ مالىمدەدى. جاڭا وتۇستىك ۋەلس شتاتىنىڭ پرەمەرى جۇقپالى دەرتپەن كۇرەسۋ ءۇشىن سيدنەيگە شۇعىل تۇردە ۆاكتسينا جەتكىزۋدى سۇرادى. رەسمي مالىمەتكە قاراعاندا، مۇندا سوڭعى ءبىر تاۋلىكتە 140 ادام ۆيرۋس جۇقتىرعان. سول سەبەپتى سيدنەيدە تۇرعىنداردىڭ ءجۇرىپ تۇرۋىنا شەكتەۋ ەنگىزىلگەن.

كوروناۆيرۋستىڭ دومينانتتى دەلتا شتامى قازىر ەۋروپانىڭ بارلىق دەرلىك ەلىندە تىركەلگەن. دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى الداعى ۋاقىتتا ول الەمدەگى باسىم شتامعا اينالاتىنىن ايتادى. قاۋىپتى شتاممەن قاتار، ۇلىبريتانيادا ۆيرۋستىڭ تاعى ءبىر جاڭا ءتۇرى انىقتالدى. مۋتاتسياعا ءالى اتاۋ بەرىلمەگەن. نەگىزى ونى جۇقتىرۋدىڭ الەمدەگى ەڭ العاشقى دەرەگى بيىل قاڭتاردا كولۋمبيادا تىركەلگەن. وسى كۇنگە دەيىن ول 26 ەلدە راستالدى. بريتاندىق ماماندار ۆيرۋستىڭ بۇل ءتۇرى ىندەتتىڭ اۋىر فورمادا وتەتىنىن، نە ۆاكتسينانىڭ تيىمدىلىگىن تومەندەتەنىن راستايتىن اقپارات جوق دەيدى.

وڭتۇستىك كورەياداعى احۋال دا ءماز ەمەس. بۇگىننەن باستاپ سەۋل مەن وعان قاراستى اۋدانداردا كوروناۆيرۋسقا قارسى شەكتەۋ شارالارى تاعى جارتى ايعا ۇزارتىلدى. سوڭعى ءبىر كۇندە بۇل ايماقتا 2 مىڭ ادام كوروناۆيرۋس جۇقتىرعان. بۇل شىلدەنىڭ باس كەزىندەگى كورسەتكىشتەن ەكى ەسە ارتىق. ماماندار ناۋقاستار سانىنىڭ كۇرت ارتۋىن «دەلتا» شتامىمەن بايلانىستىرىپ وتىر.

برازيليانىڭ سان-پاۋلۋ قالاسىندا پرەزيدەنتتىڭ وتستاۆكاسىن تالاپ ەتكەن جۇرت ەرەۋىل ۇيىمداستىردى. نارازىلىق اكتسياسىنىڭ سوڭى پوليتسەيلەرمەن قاقتىعىسقا ۇلاسقان.   پاندەميا كەزىندە برازيليا پرەزيدەنتىنىڭ حالىق اراسىنداعى بەدەلى كۇرت تومەندەگەن. ويتكەنى ونىڭ كوروناۆيرۋسپەن كۇرەس شارالارى كوبىنىڭ كوڭىلىنەن شىقپاي وتىر. ايتۋلارىنشا، مەملەكەت باسشىسىنىڭ ءوزى بىلتىر ىندەتپەن اۋىرسا دا، ءالى كۇنگە دەيىن ونىڭ قاۋپىن جەتە باعالامايدى.

ال لاتىن امەريكاسىنداعى بۇل ەلدە ۆيرۋسقا بايلانىستى كىسى ءولىمى جارتى ميلليوننان اسىپ كەتتى. ونىڭ ۇستىنە حالىق ۆاكتسينالاۋ ناۋقانىنىڭ باياۋ ءجۇرىپ جاتقانىن ايتادى. قازىرگە دەيىن ەكپەنىڭ ەكى دوزاسىن حالىقتىڭ 17%-ى العان.

نەگىزى كەلەسى جىلى برازيليادا پرەزيدەنتتىك سايلاۋ ءوتۋى ءتيىس. وعان قازىرگى مەملەكەت باسشىسىمەن قاتار ەكس-پرەزيدەنت لۋيس دە سيلۆا دا قاتىسۋى مۇمكىن. بىراق الەۋمەتتىك ساۋالناما ناتيجەلەرى حالىقتىڭ كوبى قازىرگى مەملەكەت باسشىسىنا ەمەس، دە سيلۆاعا داۋىس بەرۋگە دايىن ەكەنىن كورسەتكەن.

"The Qazaq Times"