ساكەن مايعازيەۆ ءوزى جايلى ۆيدەو تۇسىرگەن بەلسەندىنى سوتقا بەردى

شىمكەنت قالالىق مادەنيەت ءۇيىن باسقاراتىن ءانشى ساكەن مايعازيەۆ ءوزى جايلى ۆيدەو تۇسىرگەن ازاماتتىق بەلسەندى ارۋجان دۇيسەباەۆانى سوتقا بەردى. بۇل تۋرالى 13 شىلدە كۇنى كەشكە قاراي تىركەلمەگەن "دەمپارتيا" جەتەكشىسى جانبولات ماماي ءوزىنىڭ Fاسebook پاراعىندا جازدى.

Sud.kz رەسمي سايتىنداعى اقپاراتقا قاراعاندا، مايعازيەۆ دۇيسەباەۆانىڭ ۇستىنەن 30 ماۋسىمدا شاعىم تۇسىرگەن. شىمكەنت قالاسىنىڭ قاراتاۋ اۋداندىق سوتى ءانشىنىڭ شاعىمىن 8 شىلدەدە نەگىزدى دەپ تاۋىپ، وندىرىسكە العان. سۋديا م.امىربەكوۆ شىعارعان قاۋلىعا قاراعاندا، ءانشى بەلسەندىنىڭ ۇستىنەن قىلمىستىق كودەكستىڭ 131-بابى ("قورلاۋ") بويىنشا شاعىم تۇسىرگەن. دەمەك مايعازيەۆ دۇيسەباەۆانى "كوپشiلiك الدىندا نەمەسە بۇقارالىق اقپارات قۇرالدارىن نەمەسە تەلەكوممۋنيكاتسيالار جەلىلەرىن پايدالانا وتىرىپ ابىرويىم مەن قادiر-قاسيەتiمدى ادەپسiز تۇردە كەمسiتتى" دەپ ايىپتاپ وتىر.

ءانشىنىڭ بەلسەندىنىڭ ۇستىنە شىعام تۇسىرۋىنە نە سەبەپ؟

بىرنەشە اي بۇرىن "دەمپارتيانىڭ" Youtube ۆيدەو جەلىسىندەگى رەسمي ارناسىندا ساكەن مايعازيەۆ شىمكەنتتە قانشا اقشا تونادى؟، ساكەن مايعازيەۆ پەن شىمكەنت شەنەۋنىكتەرى بيۋدجەتتى قالاي توناپ جاتىر؟ دەگەن ەكى ۆيدەو جاريالانعان. اتالعان ەكى ۆيدەودا ارۋجان دۇيسەباەۆا ساكەن مايعازيەۆ باسقاراتىن مەكەمەنىڭ شىمكەتتەگى ناۋرىز تويىنا جارتى ملرد تەڭگەدەن استام قارجى بولگەنىن سىناپ، ءانشىنى "جەمقور" دەپ اتاعان. دۇيسەباەۆا ەكى ۆيدەودا دا جۋرناليستەر مەن مەملەكەتتىك ساتىپ الۋ سالاسىن زەرتتەۋشى ماماندار كەلتىرگەن دەرەكتەردى نەگىزگە العان.

"دەمپارتيا" بەلسەندىسى ارۋجان دۇيسەباەۆا بيلىككە قارسى نارزىلىق شاراسىندا سويلەپ تۇر. الماتى قالاسى. 6 شىلدە 2021 جىل. فوتو: QT / كۇلتەگىن اسپانۇلى

دۇيسەباەۆانىڭ The Qazaq Times تىلشىسىنە ايتۋىنا قاراعاندا، وعان ءوزىنىڭ ۇستىنەن قىلمىستىق ءىس قوزعالعانى جايلى حابارلاما 10 شىلدەدە جەكە نومەرىنە كەلگەن، الايدا حابارلامادا ءىستىڭ ءمان-جايى ناقتى باياندالماعان.

– سوت حابارلاماسىن العان سوڭ كورسەتىلگەن نومىرگە حابارلاستىم، بىراق سويلەسە المادىم. ماعان كەلگەن حابارلامادا ۇستىمنەن 191-باپ بويىنشا ءىس قوزعالعانى جايلى ايتىلعان ەدى. بۇگىن سوتتان حابارلاستى. ساكەن مايعازيەۆ قىلمىستىق كودەكستىڭ 131-بابى بويىنشا شىعىمدانىپتى. 15 شىلدە كۇنى سوتقا كەلۋىم قاجەت ەكەنىن ايتتى. مايعازيەۆ جايلى بىرنەشە اي بۇرىن ەكى ۆيدەو دايىنداعانبىز. ەكەۋىندە دە جۋرناليستەردىڭ ول باسقاراتىن مەكەمە ناۋرىز تويلاۋعا جارتى ملرد تەڭگەدەن استام قارجى جۇمسادى دەگەن دەرەگىن نەگىزگە الدىم. مايعازيەۆتىڭ جەكە باسىن قورلايتىنداي ەشتەمە ايتقان جوقپىن، – دەيدى دۇيسەباەۆا.

ال جانبولات مامايدىڭ پايىمداۋىنشا، ساكەن مايعازيەۆتىڭ باسقا ەمەس، ءدال ارۋجان دۇيسەباەۆانى سوتقا بەرۋىندە ساياسي استار بار.

ء"بىزدىڭ پايىمداۋىمىزشا، مايعازيەۆ ناۋرىز ايىندا بولعان داۋ-دامايعا قاتىستى سوتقا ارىزدانىپ وتىر. ول كەزدە جۋرناليستەر شىمكەنت اكىمدىگىنىڭ ناۋرىز تويلاۋعا جۇزدەگەن ميلليون تەڭگە بولگەنىن جازدى. اراسىندا مايعازيەۆتىڭ دە فاميلياسى اتالدى. بۇل تۋرالى ارۋجان دۇيسەباەۆا دا ايتقان بولاتىن. بىراق ونداي جاعدايدا مايعازيەۆ نەگە باسقا جۋرناليستەردى سوتقا بەرمەي، ءدال ارۋجانعا قارسى ارىز جازدى؟ دەمەك مۇنىڭ استارىندا ساياسي سەبەپ جاتۋى مۇمكىن. شىندىقتى ايتىپ، ميتينگتەرگە شىعىپ جۇرگەن قازاقتىڭ قىزىن قۋدالاۋ ءۇشىن" دەپ جازدى ج.ماماي Facebook پاراعىنداعى جازباسىندا.

شىمكەنتتەگى ناۋرىز تويىنىڭ جاي-جاپسارى

ءۇش جارىم اي بۇرىن مەملەكەتتىك ساتىپ الۋ پورتالىنداعى رەسمي دەرەكتەردى نەگىزگە العان جۋرناليستەر مەن بەلسەندىلەر ءانشى ساكەن مايعازيەۆ باسقاراتىن شىمكەنت قالالىق مادەنيەت ءۇيىنىڭ ناۋرىزعا ارنالعان ءىس-شارالارعا 595 ملن تەڭگە قارجى بولگەنىن انىقتاعان. سول كەزدە بۇل وقيعا قوعامدا ۇلكەن شۋ تۋدىرعان ەدى.

جۋرناليستەر زەرتتەۋىندە شىمكەنت قالالىق مادەنيەت ءۇيىنىڭ ناۋرىزعا وراي جاساسقان كەلىسىمشارتتاردا تەحنيكالىق ەرەكشەلىەكتەردى دۇرىس تولتىرماعانى ايتىلعان. بۇعان قوسا، وسى ماسەلەنى كوتەرگەن بەلسەندىلەر ءىس-شارالارعا بولىنگەن قارجى تىم كوپ ەكەندىگىنە جانە تەندەردى تاجىريبەسى جوق كومپانيالاردىڭ ۇتقانىنا باسا نازار اۋدارعان.

شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مەن شىمكەنت قالالىق مادەنيەت ءۇيىنىڭ ديرەكتورى ساكەن مايعازيەۆ

ماسەلە قوعامدا قىزۋ تالقىلانىپ جاتقاندا ساكەن مايعازيەۆ تە، شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان دا جۋرناليستەر كەلتىرگەن دەرەكتى جوققا شىعاردى. ولار "ناۋرىزعا تەك 213  ملن تەڭگە بولىنگەنىن، جۋرناليستەر كەلتىرگەن 595 ملن تەڭگە جىل بويى وتەتىن ءىس-شارالارعا قاراستىرىلعانىن" ءۋاج ەتتى. بىراق ولاردىڭ بۇل مالىمەتى مەملەكەتتىك ساتىپ الۋ پورتالىنداعى رەسمي دەرەككە قايشى بولدى. ويتكەنى مايعازيەۆ باسقاراتىن مادەنيەت ءۇيى ءتۇرلى كومپانيالارمەن جاساسقان 7 كەلىسىمشارتتا دا ءىس-شارالاردىڭ ناۋرىز مەرەكەسىنە وراي ەكەنى انىق جازىلعان.

24 ماۋسىمدا ورتالىق كوممۋنيكاتسيالار قىزمەتىندە وتكەن بريفينگتە "قازاقتايمس" ءتىلشىسىنىڭ سۇراعىنا جاۋاپ بەرگەن شىمكەنت قالاسىنىڭ اكىمى مۇرات ايتەنوۆ تە 595 ملن تەڭگە تەك ناۋرىز تويلاۋعا ەمەس، جىل بويى وتەتىن ءىس-شارالارعا دا قاراستىرىلعانىن ايتتى. ونىڭ سوزىنشە، مەملەكەتتىك ساتىپ الۋ پورتالىنداعى 595 ملن تەڭگەگە جاسالعان كەلىسىمشارتتىڭ بارىندە ناۋرىز مەرەكەسى دەپ جازىلىپ تۇرۋىنا "مەكەمە قىزمەتكەرىنىڭ قاتەلىگى سەبەپ" بولعان.

ايتەنوۆتىڭ "ناۋرىزعا 213 ملن تەڭگە ءبولىندى، 595 ملن تەڭگە جىل بويى وتەتىن ءىس-شارالار ءۇشىن قاراستىرىلعان" دەگەنى مەملەكەتتىك ساتىپ الۋ پورتالىنداعى رەسمي دەرەككە قايشى. ويتكەنى شىمكەنت قالالىق مادەنيەت ءۇيىنىڭ جىل باستالعالى مەرەكەلىك ءىس-شارالار ءۇشىن جاساسقان كەلىسىمشارتتارىنىڭ جالپى قۇنى قازىردىڭ وزىندە 680 ملن تەڭگەدەن اسىپ كەتتى. مەملەكەتتىك ساتىپ الۋ پورتالىنداعى مالىمەتكە قارعاندا، شىمكەنت اكىمدىگى مەرەكەلىك ءىس-شارالارعا 2021 جىلى 800 ملن تەڭگەدەن استام قاراجات جۇمساۋدى جوسپارلاپ وتىر.

"The Qazaq Times"