تاجىكستان اۋعانستاننان 400-دەن استام بوسقىندى ەلگە كىرگىزدى. قازىر ميگرانتتار تاۋلى باداحشان اۆتونومدى وبلىسىنىڭ اۋماعىنا ورنالاستىرىلعان.

تاجىكستان شەكاراسىنداعى قاۋىپسىزدىككە تونگەن قاتەر ەل ەكونوميكاسىن ءبىر بۇيىردەن قىستى. ساراپشىلار الداعى ۋاقىتتا بوسقىندار سانى ارتادى دەيدى. سول سەبەپتى ەل بيلىگى بوسقىندارعا الەۋمەتتىك كومەك پاكەتىن دايىنداپ جاتىر.

اۋعانستانداعى جاعداي اقش اسكەرى شىعارىلعاننىن كەيىن ۋشىعا ءتۇستى. «تاليبان» قوزعالىسى ءىرى قالالارعا شابۋىل جاساپ، اۋىلداردى باسىپ الىپ جاتىر. تاجىك تاراپىنىڭ اقپاراتى بويىنشا تالىپتەر قازىردىڭ وزىندە ەكى ەلگە ورتاق مەملەكەتتىك شەكارانىڭ 70% بولىگىنە باقىلاۋ ورناتقان.

5 شىلدەدە تاجىكستاننىڭ شەكارا قىزمەتى تاليبان سودىرلارى باداحشان ەلدى-مەكەنىنىڭ حوحون، شيكاي، نۋساي، موحيماي، شۋگنون جانە سۋلتان يشكاشيم اۋداندارىن تولىعىمەن باسىپ العانىن جاريالادى. باداحشان ايماعىنداعى تاجىكستان مەن اۋعانستان شەكاراسىنىڭ ۇزىندىعى – 910 شاقىرىم.

ءبىر كۇن بۇرىن تاجىكستان اۋعانستانمەن شەكارادا قاۋىپسىزدىكتى كۇشەيتۋ ءۇشىن ۇجىمدىق قاۋىپسىزدىك شارتى ۇيىمىنان كومەك سۇراعان. تاجىكستاننىڭ ۇقشۇ-داعى وكىلى حاسان سۋلتونوۆ مالىمدەمەسىندە: «ايماقتاعى جاعدايدى ەسكەرسەك، سونىمەن بىرگە اۋعانستانمەن شەكاراداعى جەكەلەگەن اۋماقتىڭ تاۋلى اۋداندا شوعىرلانعانىن ەسەپكە الساق، ماسەلەنى جەكە شەشە المايمىز»، – دەدى. ونىڭ سوزىنە قاراعاندا، كەيىنگى ەكى اپتادا تالىپتەرمەن سوعىستا كەرى شەگىنگەن اۋعان ۇكىمەت كۇشتەرىنىڭ 1,5 مىڭعا جۋىق جاۋىنگەرى تاجىك شەكاراسىنان كەسىپ وتكەن.

"The Qazaq Times"