موڭعولياداعى پرەزيدەنتتىك سايلاۋدا جەڭىسكە جەتكەن ۋحنااگين حۋرەلسۋح انت قابىلداپ، مەملەكەت باسشىسى رەتىندە قىزمەتىنە كىرىستى. بۇل تۋرالى مونتسامە اگەنتتىگى حابارلادى.

رەسمي شارادا حۋرەلسۋح: «مەن موڭعوليانىڭ تاۋەلسىزدىگىن، ەگەمەندىگىن، بوستاندىعىن جانە ۇلتتىق بىرلىگىن قورعاۋعا، كونستيتۋتسيانى ساقتاۋعا جانە پرەزيدەنتتىڭ مىندەتتەرىن ادال ورىندايمىن»، – دەپ انت قابىلدادى.

9 ماۋسىمدا موڭعوليادا پرەزيدەنت سايلاۋى ءوتتى. وعان سايلاۋشىلاردىڭ 69%-ى قاتىستى. سايلاۋدا قاززىرگى پرەزيدەنت حۋرەلسۋح 67,6% داۋىس جيناعان. ال پارلامەنتتىڭ بۇرىنعى دەپۋتاتى، «شىنشىل ادام – ەلەكتورات» كواليتسياسىنىڭ وكىلى دانگااسۋرەنگين ەنحباتقا سايلاۋشىلاردىڭ 20,2%-ى، وپپوزيتسيالىق باعىتتاعى دەموكراتيالىق پارتيانىڭ بۇرىنعى باسشىسى سودنومزۋندۋين ەردەنگە شامامەن 6%-ى داۋىس بەرگەن.

52 جاستاعى ۋحنااگين حۋرەلسۋح بۇعان دەيىن موڭعوليانىڭ پرەمەر-ءمينيسترى بولعان. ول وتكەن جىلى پاندەميا كەزىندە ەلدەگى دەنساۋلىق ساقتاۋ جۇيەسىنە قارسى نارازىلىقتار كەزىندە قىزمەتىنەن كەتتى.

موڭعوليادا وسىمەن سەگىزىنشى رەت پرەزيدەنت سايلاۋى ءوتتى. بۇعان دەيىن سايلاۋ 1993, 1997, 2001, 2005, 2009, 2013, 2017 جىلدارى بولعان.

"The Qazaq Times"