پورتۋگاليا. فوتو: footboom.net

ۇلىبريتانيا قاۋىپسىز ايماق دەپ سانالاتىن «جاسىل تىزىمنەن» پورتۋگاليانى شىعارىپ تاستادى. بۇعان وڭىردەگى ەپيداحۋالدىڭ ناشارلاۋى سەبەپ بولعان.

ءوز كەزەگىندە پورتۋگاليا پرەمەر-ءمينيسترى ۇلىبريتانيانىڭ بۇل شەشىمىن قاتاڭ سىنعا الىپ، لوندونعا ەۋروپادا ماقۇلدانعان تسيفرلىق سەرتيفيكات ۇلگىسىن ەنگىزۋدى ۇسىندى. ايتۋىنشا، بۇل حالىقتىڭ قوزعالىسىن شەكتەمەۋى ءۇشىن قاجەت.

ەندى سانيتارلىق ەرەجە بويىنشا بۇگىننەن باستاپ پورتۋگاليادان كەلەتىن كەز كەلگەن بريتاندىق 10 كۇن كارانتيندە وتىرىپ، ەكى مارتە كوروناۆيرۋستى انىقتايتىن تەست تاپسىرۋى ءتيىس. زاڭداعى وزگەرىسكە پورتۋگاليادا دەمالىپ جۇرگەن انگليا تۇرعىندارى نارازى. تۋريستەر ەلىنە جوسپارلانعان مەرزىمنەن بۇرىن قايتۋ ءۇشىن فارۋ حالىقارالىق اۋەجايىندا بيلەتتەرىن اۋىستىرا باستادى.

پاندەميا باستالعالى پورتۋگاليادا 853 مىڭ جاعداي تىركەلىپ، 17 مىڭنان استام ادام اجال قۇشقان.

"The Qazaq Times"