بەلارۋس بيلىگى «پرەزيدەنت سىنشىلارىن» قاماپ جاتىر

بەلارۋستە تاۋەلسىز ۇيىمداردى ءتىنتۋ مەن جۋرناليستەردى قاماۋ ءالى دە جالعاسىپ جاتىر. وسى اپتادا «بەلارۋس حالىق شەبى» وپپوزيتسيالىق پارتياسىنىڭ توراعاسى گريگوري كوستۋسەۆ پەن تانىمال ساياساتتانۋشى الەكساندر فەدۋتا ۇستالدى.

بەلارۋس ۇلتتىق قاۋىپسىزدىك كوميتەتى ۇستالعاندارعا قانداي ايىپ تاعىلعانىن ازىرگە جاريالاعان جوق. ەلدى ۇزاق مەرزىم باسقارىپ وتىرعان پرەزيدەنت الەكساندر لۋكاشەنكونى سىناپ جۇرگەن ماسكەۋدە مەدياكەڭەسشى بولىپ ىستەيتىن ساياساتتانۋشى الەكساندر فەدۋتا 12 ساۋىردە حابارسىز كەتكەن.

بۇعان دەيىن بەلارۋستە پوليتسيا تاۋەلسىز جۋرناليستەر پەن قۇقىق قورعاۋشىلارعا ءتىنتۋ جۇرگىزگەن. ءتىنتۋ ەلدىڭ بارلىق وبلىس ورتالىقتارىندا – مينسك، برەست، گومەل جانە باسقا ايماقتاردا باستالعان. مينسكىدە ولار بەلارۋس جۋرناليستەر قاۋىمداستىعىنىڭ باسشىلىعىنا دا ءتىنتۋ جۇرگىزدى. كەيىننەن پوليتسيا ۇيىمنىڭ كەڭسەسىنە دە باردى. بۇل تاۋەلسىز ۇيىم 1995 جىلى بەلارۋس جۋرناليستەرىنىڭ رەسمي وداعىنا قارسى قۇرىلعان. گومەلدە سەگىز تاۋەلسىز جۋرناليست پەن قۇقىق قورعاۋشىلار، موگيلەۆتە ەكى جۋرناليست جانە «ۆەسنا» رتالىعىنىڭ ەكى ايماقتىق قىزمەتكەرىن تەكسەردى. ساراپشىلار بەلارۋس بيلىگىنىڭ بۇل قادامىن «ءسوز بوستاندىعىنا قايشىلىق جانە ديكتاتۋرانىڭ ايقىن كورىنىسى» دەپ سانايدى.

9 تامىزدا بەلارۋستە پرەزيدەنتتىك سايلاۋ ءوتىپ، ناتيجەسىندە ورتالىق سايلاۋ كوميسسياسى شيرەك عاسىر بيلىك ەتكەن الەكساندر لۋكاشەنكونىڭ جەڭىسىن جاريالادى. وپپوزيتسيا پرەزيدەنت سايلاۋىنىڭ رەسمي قورىتىندىسىن مويىنداۋدان باس تارتىپ، ەلدە ساياسي داعدارىس ۋشىعا ءتۇستى. ازاماتتىق بەلسەندىلەر سايلاۋ قورىتىندىسى بۇرمالاندى دەپ سانايدى. لۋكاشەنكونىڭ وتستاۆكاسىن تالاپ ەتكەن نارازىلىق شارالارى ەلدىڭ ءتۇرلى قالالارىندا جالعاسىپ جاتىر. سوڭعى ايلاردا نارازىلاردىڭ قاراسى ەداۋىر سيرەگەن. پوليتسيا جاپپاي نارازىلىقتى اياۋسىز باسىپ-جانشىپ، كوبىن ۇستاعان. 27 ناۋرىزدا جىل باسىنان بەرگى ەڭ ءىرى نارازىلىق كەزىندە 200-دەن استام ادام ۇستالعان.

"The Qazaq Times"