تۇركيا سوتى 2016 جىلعى ىسكە اسپاي قالعان اسكەري توڭكەرىسكە قاتىسى بار دەپ ايىپتالعان بىرقاتار بۇرىنعى اسكەري قىزمەتكەردى ءومىر بويى قاماۋ جازاسىنا كەسكەن. بۇعان دەيىن پرەزيدەنت ەردوعاندى سىناعانى ءۇشىن 10 ادميرال قاماۋعا الىنعان ەدى. بۇل تۋرالى تۇرىكتىڭ انادولى اقپارات اگەنتتىگى حابارلاعان بولاتىن.

وسىمەن ءبىر ۋاقىتتا «فرانس پرەسس» اگەنتتىگى ءوزىنىڭ اقپارات كوزدەرىنە سۇيەنە وتىرىپ تۇرىك سوتىنىڭ 22 ادامدى ءومىر بويى باس بوستاندىعىنان ايىرعانىن حابارلادى. سونداي-اق، باس بوستاندىعى شەكتەلگەن 22 ادامنىڭ دەرلىكتەي بۇرىنعى اسكەري قىزمەتكەرلەر ەكەنىن، ولاردىڭ قاتاڭ رەجيمدەگى اباقتىلاردا ۇستالاتىنى تۋرالى جازعان.

بۇل ارەكەتتەر رەجەپ تايىپ ەردوعاندى بيلىكتەن تايدىرۋ ءۇشىن جاسالعان اسكەري توڭكەرىسكە 5 جىل وتكەنىنە قاراماستان وعان قاتىستى قۋدالاۋ مەن تەرگەۋ ءالى دە بەلسەندى كۇيدە ەكەنىن كورسەتەدى.

انادولى اگەنتتىگى تاراتقان مالىمەتتەردە اتالعان بۇرىنعى اسكەري قىزمەتكەرلەرگە تەلەكانالدى باسىپ الىپ، توڭكەرىسشىلەر تۋرالى اقپارات تاراتۋعا ماجبۇرلەگەن جانە باس شتابتى باسىپ العان دەگەن ايىپتار تاعىلعانى ايتىلادى.

شىن مانىسىندە سارسەنبىدە وتكەن سوت 2016 جىلدان بەرگى عانا ەمەس، تۇركيا تاريحىنداعى ەڭ اۋقىمدى سوت پروتسەسىنىڭ ءبىرى بولدى. وندا ۇزىن سانى 497 ادامعا قاتىستى ايىپتار قارالدى.

تۇركيا بيلىگىندە ەردوعاننىڭ «ادىلەت جانە دامۋ» پارتياسى مەن اسكەريلەر اراسىنداعى تەكە-تىرەس سوت پروتسەسىنىڭ سىرتىندا دا ءجۇرىپ جاتىر. پرەزيدەنت ەردوعاننىڭ بوسفوردتى اينالىپ ءوتۋ ءۇشىن قارا تەڭىز بەن مارمار تەڭىزىن تۇتاستىراتىن كانال قازۋ جوسپارىنا قارسى اسكەريلەر اشىق حات جاريالاعان. وعان بۇرىنعى تەڭىز كۇشتەرى وفيتسەرلەرىنەن 104 ادامنىڭ قولى قويىلعان بولاتىن. الايدا، دۇيسەنبىدە پرەزيدەنتتىڭ جوسپارىن سىناعانى ءۇشىن سولاردىڭ اراسىنان 10 ادميرال قاماۋعا الىندى.

“The Qazaq Times”