فوتو: interaffairs

اۆستراليا رەسەيدەن كەلگەن جەكە تۇلعاعا جانە قىرىم كوپىرىنىڭ قۇرىلىسىنا قاتىسقان ءتورت رەسەيلىك كومپانياعا سانكتسيالار ەنگىزدى.

اۆستراليا ءسىم باسشىسى ماريس پەين مالىمدەمەسىندە شەكتەۋ تۋرالى شەشىم كانادا بيلىگىمەن بىرگە قابىلدانعانىن ايتتى. قازىر اۋستراليانىڭ ۋكراينا بوفنشا سانكتسيالار تىزىمىندە 168 جەكە تۇلعا جانە 52 زاڭدى تۇلعا بار.

بۇعان دەيىن كانادا قىرىمنىڭ اننەكسيالاۋىنا بايلانىستى رەسەيگە قارسى جاڭا سانكتسيالار ەنگىزگەن. سانكتسيالار تىزىمىنە «گراند سەرۆيس ەكسپرەسس» كولىك كومپانياسىنىڭ باس ديرەكتورى الەكساندر گانوۆ، «موستوترەستتىڭ» باس ديرەكتورى لەونيد رىجەنكين، سونداي-اق «لەنپرومترانسپروەكت» كاسىپورنى، «بەركاكيت تومموت ياكۋتسك تەمىر جول قۇرىلىسى ديرەكتسياسى»، «قىرىم تەمىر جولى» فەدەرالدى مەملەكەتتىك ۋنيتارلىق كاسىپورنى جانە ساقتاندىرۋ كومپانياسى ەنگىزىلگەن.

2014 جىلى 16 ناۋرىزدا ۋكراينا قۇرامىنداعى قىرىم تۇبەگىندە رەسەي كۇشتەرىنىڭ باقىلاۋىمەن «رەفەرەندۋم» ءوتىپ، ونىڭ قورىتىندىسى بويىنشا «حالىقتىڭ 93%-ى اۆتونوميالى رەسپۋبليكانىڭ ۋكراينادان ءبولىنىپ، رەسەيگە قوسىلۋىن جاقتاعانى» جاريالانعان. ماسكەۋ قىرىم تۇبەگىن اننەكسيالاپ، رەسەي فەدەراتسياسىنىڭ قۇرامىنداعى سۋبەكت دەپ تانىعان. سول جىلى ساۋىردە ۋكراينانىڭ دونەتسك جانە لۋگانسك وبلىستارىندا رەسەيشىل سەپاراتيستەر مەن ۋكراينا اسكەرى اراسىندا قارۋلى قاقتىعىس باستالدى. سودان بەرى بۇل سوعىستا 13 مىڭنان استام ادام قازا تاپقان.

باتىس ەلدەرى كرەملدىڭ ۋكرايناعا قاتىستى ءىس-ارەكەتىن ايىپتاپ، قىرىمدى رەسەي جەرى دەپ مويىنداۋدان باس تارتتى. 2015 جىلى اقپاندا مينسكىدە ۋكراينانىڭ شىعىسىنداعى سوعىستى توقتاتۋ جونىندە كەلىسىم جاسالعانىمەن، قۇجات شارتتارى ءالى كۇنگە تولىق ورىندالماي كەلەدى.

"The Qazaq Times"