ەۋروپادا پاندەميانىڭ ءۇشىنشى تولقىنى باستالدى

ەۋروپادا كوروناۆيرۋستىڭ ءۇشىنشى تولقىنى باستالدى. قازىر ەۋرووداق ەلدەرى كارانتيندى قايتادان قاتاڭداتا باستادى. سونىمەن قاتار، ۆاكتسيناتسيا باستاعان ەلدەر AstraZeneca ەكپەسىن ساتىپ الۋدان باس تارتىپ وتىر. سەبەبى، «پرەپاراتتىڭ قان اينالىمىن ناشارلاتىپ، ترومبىلاردىڭ تۇزىلۋىنە ىقپال ەتەتىنى» انىقتالعان.

جاقىندا عانا كارانتين شەكتەۋلەرى جەڭىلدەي باستاعان گەرمانيادا بريتاندىق شتام دەرەگى ارتقان. گەرمانيا دەنساۋلىق ساقتاۋ مينيسترلىگى حالىقتىڭ 80%-ى ۆاكتسينا قابىلداعاندا عانا كوروناۆيرۋستىق شەكتەۋلەر الىناتىنىن مالىمدەدى. ەكىنشى توقساندا نەمىس حالقى 60 ميلليون دوزا سالدىرادى. ونىڭ جارتىسى BioNTech جانە Pfizer پرەپاراتىنا تيەسىلى. AstraZeneca ۆاكتسيناسىنان بىرقاتار ەل باس تارتىپ وتىرسا دا، گەرمانيا بۇل ەكپەنىڭ 17 ميلليون دوزاسىن ساتىپ الماقشى. بيلىك اتالعان پرەپاراتتى جاسى 65-تەن اسقان تۇرعىندارعا ەگۋگە رۇقسات بەرگەن. بۇعان دەيىن نەمىس ەلىنىڭ 6 ميلليون ازاماتى كوۆيدتەن قورعايتىن العاشقى دوزانى العان. ال ەكىنشى دوزانى ازىرگە 2 ميلليون 700 مىڭداي تۇرعىن سالدىردى.

ۆەنگريادا ۆيرۋس بۇرىنعىدان گورى تەز تاراپ بارادى جانە جۇقتىرعاندار اراسىندا جاستار كوپ. سونداي-اق، اۋرۋى اسقىنعان ناۋقاستار كوبەيگەن. ەلدە بىلتىر قاراشادا ەنگىزىلگەن كومەندانتتىق ساعات ءالى كۇشى جويمادى. مەيرامحانالاردا تاماقتى تەك وزىمەن بىرگە اكەتۋگە عانا بولادى. ياعني ىشتە وتىرۋعا رۇقسات جوق. جوعارى سىنىپ وقۋشىلارى مەن ستۋدەنتتەر قاشىقتان ءبىلىم الادى. ال ەندى احۋالدىڭ ۋشىعۋىنا بايلانىستى شەكتەۋ شارالارى كۇشەيتىلدى: باستاۋىش مەكتەپتەر، بالاباقشالار جابىق; دۇكەندەردىڭ باسىم بولىگى جۇمىسىن توقتاتقان.

اۆستريانىڭ دەنساۋلىق ساقتاۋ ءمينيسترى ەلدە كوروناۆيرۋستىڭ ءۇشىنشى تولقىنى باستالعانىن جاريا ەتتى. وسى رەتتە بيلىك وڭىرلەردە باقىلاۋ-وتكىزۋ بەكەتتەرىن قويدى. سونداي-اق تۇرعىنداردى وزگە ايماققا كىرەردە تەست تاپسىرۋعا مىندەتتەدى. نەگىزى، ەلدەگى ەپيدەميولوگيالىق احۋال وسى ايدا ناشارلادى. ويتكەنى كارانتين جەڭىلدەتىلگەن. ءسويتىپ قازىر كۇندەلىكتى ءوسىم 3 مىڭ شاماسىندا. ال قاتاڭ كارانتين كەزىندە، ماسەلەن، اقپاندا بۇل كورسەتكىش 2 مىڭنىڭ ماڭايىندا بولاتىن.

پاندەميادان زارداپ شەككەن ەلدەردىڭ ءبىرى – يتاليادا بيلىك بار وڭىرلەردىڭ تورتتەن ءۇشىن قىزىل ايماققا جاتقىزىپ، 6 ساۋىرگە دەيىن كارانتين جاريالادى. قىزىل ايماقتاعى مەكتەپتەر مەن جوعارى وقۋ ورىندارى جابىلادى. مەيرامحانالار مەن بارلار قوناقتار قابىلدامايدى. تاماقتى تەك وزىمەن بىرگە اكەتۋگە بولادى. نەگىزى وتكەن اپتادا مۇندا 150 مىڭ ادامنىڭ تاپسىرعان تەستى وڭ ناتيجە كورسەتكەن.

ۆيرۋستىڭ الدىن الۋ ءۇشىن وتكەن دۇيسەنبىدەن باستاپ چەحيادا مەكتەپتەر مەن دۇكەندەر جابىلدى. اۋرۋحانالاردا ورىن از بولعاندىقتان، چەحيا بيلىگى ناۋقاستاردى پولشاعا جىبەرۋگە ءماجبۇر. قازىر بۇل مەملەكەتتە ەۋروپادا ۆيرۋس جۇقتىرۋ دەرەگى بويىنشا انتيرەكورد ورناعان – سوڭعى 14 كۇندە ميلليون ادامعا شاققاندا 15 مىڭ جاعداي تىركەلگەن.

العاشقى تولقىن الەۋمەتتىك، ەكونوميكالىق جاعدايىنا اۋىر سوققى بولعان ەۋروپانىڭ تاعى ءبىر ەلى يسپانيادا ۆيرۋس دەرەگى، كەرىسىنشە، كۇرت تومەندەدى قاڭتاردىڭ سوڭىندا 100 مىڭ ادامعا شاققاندا 900-گە جۋىق جاعداي تىركەلدى. ال 10 ناۋرىزدا 153 كەيس انىقتالدى. جاقىندا يسپانيادا بارلىق دەنساۋلىق ساقتاۋ قىزمەتكەرلەرى: اۋرۋحانالاردان ەمحانالارعا دەيىن، قارتتار ۇيلەرىنەن جەدەل جاردەم مەدبيكەلەرىنە دەيىن ەرەۋىلگە شىقتى. ولار 35 ساعاتتىق ءۇزىلىسسىز جۇمىستان شارشاعانىن ايتىپ، بيلىكتەن دارىگەرلەردىڭ جاعدايىن جاقسارتۋدى تالاپ ەتتى.

"The Qazaq Times"