سانكتسيا قۇرساۋىندا: اقش رەسەيگە كومەك كورسەتۋدى توقتاتتى

اقش ناۆالنىي ىسىنە بايلانىستى رەسەيگە قارسى سانكتسيا ەنگىزىپ، ەكونوميكا، قورعانىس سالاسىندا كومەك كورسەتۋ باعدارلامالارىن توقتاتتى. سانكتسيا 1991 جىلى قابىلدانعان «حيميالىق جانە بيولوگيالىق قارۋدى باقىلاۋ جانە ونى قولدانۋعا تىيىم سالۋ تۋرالى» زاڭ اياسىندا جۇزەگە اسىپ وتىر. بۇل تۋرالى مەملەكەتتىك دەپارتامەنتتىڭ جازباشا مالىمدەمەسىندە ايتىلعان.

قۇجاتتا: «اقش رەسەي ۇكىمەتىنىڭ «حيميالىق قارۋعا تىيىم سالۋ تۋرالى» كونۆەنتسيانى بۇزىپ، ءوز ازاماتتارىنا قارسى حيميالىق قارۋ قولدانعانىن انىقتادى. ناتيجەسىندە، كونگرەسستىڭ 15 كۇندىك حابارلاما مەرزىمى اياقتالعاننان كەيىن جاڭا سانكتسيالار جۇزەگە اسادى»، – دەلىنگەن. ەندى ۆاشينگتون ماسكەۋگە شۇعىل گۋمانيتارلىق كومەكتى قوسپاعاند، 1961 جىلى قابىلدانعان زاڭ بويىنشا ەكونوميكالىق جاعىنان كومەك كورسەتۋدى توقتاتادى. سونداي-اق، اقش رەسەيگە كەز كەلگەن قورعانىس ونىمدەرىن ساتۋدى جانە ەكسپورتتاۋدى، قارۋ-جاراق ەكسپورتىنا ليتسەنزيالار مەن رۇقساتتار بەرۋدى دە توقتاتتى.

سانكتسيادان كەيىن رەسەيگە شەتەلدىك اسكەري قارجىلاندىرۋدى كوزدەيتىن اقش-تىڭ بارلىق باعدارلامسى كۇشىن جويدى. ۆاشينگتون، سونىمەن بىرگە، ماسكەۋگە اقش ۇكىمەتىنىڭ مينيسترلىكتەرى مەن باسقارمالارى، ونىڭ ىشىندە ەكسپورت-يمپورت بانكى ارقىلى نەسيە نەمەسە باسقا قارجىلىق كومەك بەرۋدەن دە باس تارتادى. امەريكادان رەسەيگە «ۇلتتىق قاۋىپسىزدىك ءۇشىن ماڭىزدى تاۋارلار مەن تەحنولوگيالاردى ەكسپورتتاۋعا» دا شەكتەۋلەر ەنگىزىلۋدە.

رەسمي مالىمدەمەدە مەملەكەتتىك دەپارتامەنت 1991 جىلعى زاڭعا سايكەس 2018 جىلعى ناۋرىزدا بۇرىنعى بارلاۋ قىزمەتكەرى سەرگەي سكريپال مەن ونىڭ قىزى يۋلياعا قاتىستى جاعدايدان كەيىن رەسەيگە العاش رەت ەنگىزىلگەن سانكتسيالار ءتىزىمىن ارتتىردى. جوعارىدا اتالعان شەكتەۋلەردەن بولەك، اقش-تىڭ سىرتقى ساياسات ءبولىمى رەسەيدى «قورعانىس سالاسى بويىنشا قولداۋ كورسەتىلمەيتىن ەلدەر تىزىمىنە» قوستى.

سانكتسيالاردىڭ قولدانىلۋ مەرزىمى

رەسەيگە قارسى ەنگىزىلگەن سانكتسيالار كەم دەگەندە 12 اي زاكڭدى كۇشىندە بولادى. اقش سىرتقى ىستەر مينيسترلىگى ەگەر رەسەي ۇكىمەتى «حيميالىق جانە بيولوگيالىق قارۋدى باقىلاۋ جانە ونى قولدانۋعا تىيىم سالۋ تۋرالى» زاڭدا بەلگىلەنگەن بىرنەشە شارتتاردى ورىنداسا، سانكتسيالار جەڭىلدەيتىنىن ايتتى. مۇنىمەن قاتار، رەسەي بۇۇ باقىلاۋشىلارىنىڭ ءوز اۋماعىندا ءتيىستى تەكسەرۋلەر جۇرگىزۋىنە مۇمكىندىك بەرۋى ءتيىس.

وسى اپتادا اقش مەملەكەتتىك دەپارتامەنتى فسب، رەسەي مەملەكەتتىك ورگانيكالىق حيميا جانە تەحنولوگيا عىلىمي-زەرتتەۋ ينستيتۋتى، 33-ءشى ورتالىق عىلىمي-زەرتتەۋ ينستيتۋتى، رەسەي فەدەراتسياسى قورعانىس مينيسترلىگىنىڭ 27-ءشى عىلىمي ورتالىعى، رەسەي قارۋلى كۇشتەرى باس شتابىنىڭ باس كەڭسەسى، سونداي-اق رەسەيلىك رۋسلان بوشيروۆ پەن الەكساندر پەتروۆتىڭ ۆيزالارىنا شەكتەۋلەر ەنگىزدى. ولاردىڭ بارلىعى سەيسەنبىدە اقش قارجى مينيسترلىگىنىڭ قارا تىزىمىنە ەنگەن.

وسى اپتادا ەۋرووداقتىڭ تۇراقتى وكىلدەرى وپپوزيتسيالىق ساياساتكەر الەكسەي ناۆالنىيدى قۋدالاۋعا قاتىسى بار دەلىنگەن ءتورت رەسەيلىك شەنەۋنىككە سانكتسيا سالۋدى ماقۇلدادى. بۇعان دەيىن رەسەي سىرتى ىستەر ءمينيسترى سەرگەي لاۆروۆ «بريۋسسەل سانكتسيانى كۇشەيتسە، ماسكەۋ ەو-مەن قاتىناستى ۇزۋگە دايىن» دەگەن. رەسەي بيلىگى ەو-نى ەلدىڭ ىشكى ىسىنە ارالاستى دەپ ايىپتاپ، وپپوزيتسيالىق ساياساتكەردىڭ قامالۋىنا ساياساتتىڭ قاتىسى جوعىن ايتقان.

ەۋرووداق ەنگىزەتىن شەكتەۋلەر رەسەي تەرگەۋ كوميتەتىنىڭ باسشىسى، فەدەرالدىق قىلمىستىق جازانى اتقارۋ قىزمەتىنىڭ ديرەكتورى، روسگۆارديا باستىعى، باس پروكۋرىنا قاتىستى. رەسەيدە تەرگەۋ كوميتەتىن – الەكساندر باسترىكين، روسگۆارديانى – ۆيكتور زولوتوۆ، فەدەرالدىق قىلمىستىق جازانى اتقارۋ قىزمەتىن – الەكساندر كالاشنيكوۆ باسقارادى.

ساراپشىلاردىڭ پىكىرىنشە، بايدەن اكىمشىلىگىنىڭ بۇل شەشىمى ماسكەۋگە «كۇشتى سيگنال» بولماق. بۇعان دەيىنگى اقش پرەزيدەنتى ناۆالنىيدىڭ ۋلانۋى مەن قامالۋىنا بايلانىسى رەسەيمەن ديالوگ جۇرگىزبەگەن. دەمەك، بايدەن ادام قۇقىقتارى ماسەلەسىندە ترامپتىڭ ساياساتىن جالعاستىرمايدى. بۇل جولى سانكتسيالاردان كەيىن رەسەي كەيبىر ەكسپورتتىق ليتسەنزيالارىنان ايىرىلۋى مۇمكىن.

"The Qazaq Times"