الماتى اكىمدىگى عيماراتىنىڭ الدىندا جازىلعان "مەسسەدج". 13 جەلتوقسان، 2020 جىل. فوتو: rukh2k19

جەكسەنبى، 13 جەلتوقسان كۇنى تاڭەرتەڭ الماتى قالاسى اكىمدىگىنىڭ الدىنداعى جەردە «ۇمىتىلماس 1986 2011» دەگەن جازۋ پايدا بولدى. بۇل جونىندە Instagram الەۋمەتتىك جەلىسىندە Rukh2k19 توبى حابارلادى.

«ءبىز بوستاندىق ۇرپاعىمىز. ءبىز 1986, 2011 جىلدارى بولعان رەپرەسسيا مەن حالىققا قارسى قىلمىستى ەش ۇمىتپايمىز ءارى بيلىكتى كەشىرمەيمىز. 2020 جىلعى 16 جەلتوقساندا ساعات 12:00-دە رەسپۋبليكامىزدىڭ الاڭدارىندا ءبىز، قازاقستاندىقتار، وزگەرىستەر ءۇشىن بىرىگەمىز!» – دەلىنگەن Rukh2k19 حابارلاماسىندا.

الماتى اكىمدىگى عيماراتىنىڭ الدىندا جازىلعان "مەسسەدج". 13 جەلتوقسان 2020 جىل. فوتو: rukh2k19

بىرەر ساعاتتان كەيىن اكىمدىك الدىنداعى جازۋدى ءوشىرىپ تاستالعان.

16 جەلتوقسان — قازاقستان تاۋەلسىزدىگى كۇنى. بۇل كۇن قازاقستاننىڭ جاڭا تاريحىندا تاعى ەكى وقيعامەن بايلانىستى اتالادى. وسىدان 34 جىل بۇرىن ءدال وسى كۇنى كرەملدەگى بيلىكتىڭ گەننادي كولبيندى سوۆەتتىك قازاقستانعا باسشى ەتىپ تاعايىنداعاننان كەيىن قازاق جاستارى الماتىنىڭ ورتالىق الاڭىنا جينالىپ، نارازىلىق تانىتقان. سوۆەت بيلىگى جاستاردىڭ بەيبىت ميتينگىسىن كۇش قولدانىپ، باسىپ-جانشىعان. ميتينگىدەن كەيىن جۇزگە جاۋاپقا تارتىپ، سوتتاعان، جۇمىستان شىعارعان. 2011 جىلى 16 جەلتوقساندا ماڭعىستاۋ وبلىسىنداعى جاڭاوزەن قالاسىندا ەڭبەك جاعدايىن جاقسارتۋدى تالاپ ەتكەن مۇنايشىلاردىڭ بىرنەشە ايعا جالعاسقان بەيبىت نارازىلىق اكتسياسىن پوليتسيا وق اتىپ تاراتقان. رەسمي مالىمەت بويىنشا، «جاڭاوزەن وقيعاسى» كەزىندە 17 ادام كوز جۇمعان.

الماتىداعى نۇرسۇلتان نازارباەۆ كوشەسىنىڭ بويىنا ەكس-پرەزيدەنت كۇنى ىلىنگەن باننەر. 1 جەلتوقسان 2020 جىل. فوتو: ايان قالمۇرات / ازاتتىق راديوسى

Rukh2k19 توبى بۇعان دەيىن بيىلعى 1 جەلتوقساندا الماتىدا بەلگىسىز بىرەۋلەردىڭ «ادام اتىنا 47,3 ملرد تەڭگە جۇمسادى» دەگەن جازباسى بار كولەمى ون مەتر باننەردى كوشەگە ىلىپ كەتكەنىن حابارلاعان. باننەردى قازاقستاندا بيلىك تۇڭعىش پرەزيدەنت كۇنى دەپ جاريالاعان 1 جەلتوقساندا تاڭ الدىندا قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ ەسىمى بەرىلگەن داڭعىلدىڭ بويىنا ءىلىپ قويعان.

"The Qazaq Times"